ထိုင်းနိုင်ငံ ချင်းမိုင်မြို့သို့ လာရောက်အလုပ်လုပ်ကိုင်နေသော ရွှေ့ပြောင်းအလုပ်သမား လူငယ် ၂ ဦး ကို အမည်မသိ ထိုင်းနိုင်ငံသားလူငယ်အုပ်စုက ဝိုင်းရိုက်သဖြင့် ဒဏ်ရာပြင်းထန်ကြောင်း စုံစမ်းသိရသည်။

ပြီးခဲ့သည့် မတ်လ ၁၀ ရက် ညသန်းခေါင်ချိန်တွင် အဆိုပါရွှေ့ပြောင်းအလုပ်သမား အသက် (၂၀) ဝန်းကျင် လူငယ် ၂ ဦးသည် ချင်းမိုင်မြို့ရှိ ဘိလိယက်ဆိုင်တစ်ဆိုင်၌ ဘိလိယက်ထိုးနေစဉ် အမည်မသိ ထိုင်းနိုင်ငံသား လူငယ်အုပ်စု၏ ဝိုင်းရိုက်ခြင်းကို ခံခဲ့ရကြောင်း ၎င်းမိသားစုဝင်းများက သျှမ်းသံတော်ဆင့်ကိုပြောသည်။

“ဘိလိယက်ထိုးနေတဲ့အချိန်မှာ ဟိုဘက်ဝိုင်းက ထိုင်းလူငယ်တွေက သူတို့ကို ဘာလူမျိုးလဲလို့ လာမေးတာ။ သူတို့က ဘာမှမသိတော့ ထိုင်းယိုင် (သျှမ်း) လူမျိုးလို့ ပြောတာ။ အဲ့နဲ့အပြင်ထွက်လာတော့ အုပ်စုဖွဲ့ရိုက်နှက်ခံရတာ” ဟု ၎င်းမိသားစုဝင် အမျိုးသားတစ်ဉီးက ပြောသည်။

ထို့သို့ ရိုက်နှက်ခံရပြီး ရွှေ့ပြောင်းအလုပ်သမား လူငယ် ၂ ဦးမှာ မျက်နှာနှင့် ဦးခေါင်းတဝိုက် ဒဏ်ရာရရှိခဲ့ပြီး ဆေးရုံသို့ ပို့ဆောင်လိုက်ရကြောင်း သိရသည်။

ဆေးရုံတွင် ၂ ရက်ကြာ ဆေးကုသယူခံပြီးနောက် ယမန်နေ့ မတ်လ ၁၂ ရက်တွင် ဆေးရုံမှ ဆင်းလာခဲ့ကြောင်း ၎င်း၏မိသားစုဝင်တစ်ဦးက ပြောပြသည်။

“အခုတော့ ဆေးရုံကဆင်းရပြီ။ တစ်ယောက်ကတော့ ဘတ် ၄,၀၀၀ ကျော်ကုန်တယ်။ နောက်တစ်ယောက်ကတော့ ၇၀၀ ကျော်တယ်။ ဘယ်သူက သူတို့ကို ရိုက်ခဲ့မှန်းမသိတော့ အမူဖွင့်လို မရဘူး” ဟု ၎င်းကပြောသည်။

၎င်းတို့သည် ထိုင်းနိုင်ငံ ချင်းမိုင်တွင် အလုပ်လုပ်ကိုင်နေသည့် ရွှေ့ပြောင်းအလုပ်သမားဖြစ်ကြပြီး မည်သည့် ဂိုဏ်းအဖွဲ့တွင် ပါဝင်ထားခြင်းမရှိကြောင်း၊ လူမှားပြီး အုပ်စုဖွဲ့ရိုက်နှက်ခြင်းခံရခြင်းဖြစ်ကြောင်း ၎င်း၏မိသားစုဝင်များက ပြောသည်။

ပြီးခဲ့သည့် မတ်လ ၄ ရက်တွင် ချင်းမိုင်မြို့ရှိ ဈေးထဲ၌ အသက် ၁၈ နှစ်အရွယ် ထိုင်းအမျိုးသားတစ်ဦးကို ထိုင်းနိုင်ငံသား ထိုင်းယိုင် (ခ)သျှမ်းလူမျိုးများ (၅၇၅) ဂိုဏ်းအဖွဲ့မှ ဓားထိုးသတ်မှုဖြစ်ခဲ့သည်။

ထိုဖြစ်စဉ် ဖြစ်ပွားခဲ့ပြီးနောက် ထိုင်းရောက် ရွှေ့ပြောင်းအလုပ်သမားများ အထူးသဖြင့် ထိုင်းယိုင် (ခေါ်) သျှမ်းလူမျိုးများသည် လူမျိုးရေး အမုန်းတရားဖြစ်လာမည်ကို စိုးရိမ်နေကြသည်ဟုပြောသည်။

“ဘိလိယက်ဆိုင်တွေတော့ အမျိုးမျိုးရှိတယ်။ ဆိုင်တွေအပေါ်မှာ မူတည်တာပေါ့။ တချို့ဆိုင်တွေလည်း လူကြီးတွေ ဆော့တယ်။ တချို့ဆိုင်တွေလည်း လူငယ်တွေဆော့တယ်။ ဒါပေမဲ့ လူငယ်တွေ ဆော့တဲ့ဆိုင်တွေ သွားရင်တော့ သတိထားရတာပေါ့။ များသောအားဖြင့် လူငယ်များတဲ့ ဆိုင်တွေက အကြည့်ချင်းဆုံမိရင် မရဘူး။ ဘာကြည့်တာလဲဆိုပြီး ရန်ရှာတတ်တယ်။ ပြီးတော့ မြန်မာပြည်ကလူတွေဆိုရင် သိပ်မကြည့်တော့လေ ပေးမဆော့ချင်ဘူး” ဟု ထိုင်းရောက် မြန်မာရွှေ့ပြောင်းအလုပ်သမားတစ်ဦးက ပြောသည်။

ထိုကြောင့် ထိုင်းရောက် မြန်မာရွှေ့ပြောင်းအလုပ်သမားများအနေဖြင့် မလိုအပ်ဘဲ ညဘက်အပြင်သို့ သွားလည်ခြင်း၊ ရန်ခိုက်ဖြစ်ပွားခြင်း မပြုလုပ်ကြရန် အသိပေးအပ်ပါသည်။ အကယ်၍ ဘိလိယက်ဆိုင်သို့ သွားရောက် ဆော့ကစားပါက သတိထားရန်နှင့် လူငယ်အချင်းချင်း အကြည့်ချင်းမဆုံမိအောင် ရှောင်ရှားရန်လိုအပ်သည်။