သျှမ်းပြည် နောင်ချိုမြို့နယ် တောင်းခမ်းဒေသရှိ TNLA နှင့် ပူးပေါင်းတပ်ဖွဲ့များ ထိန်းချုပ်နိုင်ခဲ့သည့် အမြောက်တပ်စခန်း နေရာအချို့ကို လက်လွတ်လိုက်ရပြီး စစ်ကောင်စီတပ်မှ ပြန်လည်ထိန်းချုပ်နိုင်ခဲ့ကြောင်း စုံစမ်းသိရသည်။

မတ်လဆန်းမှ စတင်ပြီး နောင်ချိုမြို့နယ် တောင်းခမ်းဒေသရှိ တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ပူးပေါင်းတပ်ဖွဲ့များ လအတော်ကြာ ထိန်းချုပ်ထားနိုင်ခဲ့သည့် အမြောက်တပ်စခန်း နေရာအချို့ကို စစ်ကောင်စီတပ်မှ အပြင်းအထန် ထိုးစစ်ဆင် တိုက်ခိုက်ခဲ့ခြင်းကြောင့် စစ်ကောင်စီထံ ပြန်လည်လက်လွတ်လိုက်ရကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“စစ်တပ်က ဒရုန်းနဲ့ပါ အုပ်လိုက် တက်လာတာ ဒီတစ်ခေါက်က၊ မြေပြင်ထိုးစစ်ကော တော်တော်လေး အင်အားဖြည့်လာတာ တွေ့တယ်။ သိမ်းထားတဲ့ စခန်းတချို့ကနေ တော်လှန်ရေးဘက်က နောက်ဆုတ်လိုက်ရတယ်လို့ ပြောတယ်”ဟု နောင်ချိုမြို့နယ်မှ စစ်ရေးသတင်းရင်းမြစ်က ပြောဆိုသည်။

နောင်ချိုမြို့နယ်‌ တောင်းခမ်းဒေသရှိ TNLA နှင့် ပူးပေါင်းတပ်ဖွဲ့များ လအတော်ကြာ ထိန်းချုပ်ထားနိုင်ခဲ့သည့် အမြောက်တပ်စခန်းအချို့ကို စစ်ကောင်စီထံ လက်လွှတ်လိုက်ရခြင်းနှင့် ပတ်သက်ပြီး သျှမ်းသံတော်ဆင့်မှ TNLA ပြောရေးဆိုခွင့်ရှိသူ လွေးယေဦးထံ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပေ။

အလားတူ တောင်းခမ်းဒေသရှိ အရှေ့မြောက် တိုင်းစစ်ဌာနချုပ် လက်အောက်ခံ အမြောက်စခန်းကွပ်ကဲမှုဌာနချုပ် (မစခ-၉၀၂) နှင့် အမတ-၃၅၄ တို့မှ တပ်ရင်းများကို စစ်ကောင်စီတပ်မှ အပြောင်းအလဲ ပြုလုပ်ခဲ့ကြောင်း စစ်ရေးသတင်းရင်းမြစ်ထံမှ သိရသည်။

ထို့အပြင် တောင်းခမ်းတိုက်ပွဲမှ ပြန်လာသည့် စစ်ကောင်စီတပ်သားများကို တပ်မိသားစုဝင်များက ကြိုဆိုနေကြသည်ကို စစ်ကောင်စီဝါဒဖြန့် တယ်လီဂရမ်များထဲ ယမန်နေ့ (မတ်လ ၁၀ ရက်)တွင် ဖြန့်ဝေကြသည်။

ဖေဖော်ဝါရီလအတွင်း တောင်းခမ်းဒေသရှိ စစ်ကောင်စီအမြောက်တပ်ရင်း ဌာနချုပ်ကို TNLA ပူးပေါင်းတပ်ဖွဲ့မှ အပြင်းအထန် ထိုးစစ်ဆင် တိုက်ခိုက်ခဲ့ရာ စစ်ကောင်စီဘက်မှ လက်နက်ကြီး ပစ်ခတ်ခြင်းနှင့် လေကြောင်းဖြင့် ပြန်လည်တိုက်ခိုက်ခဲ့ခြင်းကြောင့် ရွှေမုဌော၊ တောင်ရှည်၊ ရေဖြူ၊ နားရှိုး၊ မကျည်းပင် စသည့် ကျေးရွာများမှ ပြည်သူများ ထိခိုက်သေဆုံးရပြီး နေအိမ်အများအပြား ထိခိုက်ပျက်စီးခဲ့ရသည်။

TNLA နှင့် စစ်ကောင်စီတို့ ရှစ်လနီးပါး တိုက်ပွဲပြင်းထန်နေသည့် တောင်းခမ်းဒေသသည် နောင်ချိုမြို့နှင့် မိုင် ၂၀ ခန့်၊ စစ်တက္ကသိုလ် တည်ရှိရာ ပြင်ဦးလွင်မြို့နှင့် မိုင် ၄၀ ကျော်သာ ကွာဝေးပြီး မန္တလေးတိုင်းနှင့် သျှမ်းပြည်တောင်ပိုင်းသို့ ဆက်လက်သွားရောက်နိုင်ခြင်းကြောင့် စစ်ရေးအရ အချက်အခြာကျသည့် ဒေသဖြစ်သည်။