သျှမ်းပြည် လားရှိုးမြို့နယ် မိုင်းယော်ကျေးရွာအုပ်စုအတွင်း ကိုးကန့်တပ်ဖွဲ့ MNDAA မှ ဖမ်းဆီးထားသည့် အသက်(၁၅)နှစ်အရွယ် နန်းယိင်းဟွမ်မှာ ဖမ်းဆီးခံရပြီး တစ်လတိတိတွင် ပြန်လည်လွတ်မြောက်လာကြောင်း စုံစမ်းသိရသည်။

ယနေ့ (မတ်လ ၇ ရက်) ညနေ ၃ နာရီခွဲတွင် လားရှိုးမြို့နယ် မိုင်းယော်တိုက်နယ်ရှိ လုံမွန်းဘုန်းကြီးကျောင်းတွင် အခြေချတပ်စွဲထားသည့် ကိုးကန့်တပ်ဖွဲ့ MNDAA မှ တစ်လအကြာ ဖမ်းဆီးထိန်းသိမ်းထားသည့် အသက် (၁၅) နှစ်အရွယ် နန်းယိင်းဟွမ်ကို မိဘများထံ ပြန်လည်အပ်နှံလိုက်ကြောင်း မိသားစုနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

“မိုင်းယော်က ကိုးကန့်တပ်တွေ ဖမ်းထားတဲ့ ကောင်မလေးကို ဒီနေ့လယ် ၃ နာရီခွဲအချိန်မှာ ပြန်လွှတ်ပေးလိုက်တယ်။ မိဘတွေကတော့ သူတို့သမီး ပြန်လွတ်လာလို့ မပြောပြတတ်အောင် ဝမ်းသာနေတယ်။ အဘက်ဘက်က ကူညီပေးတဲ့ လူပုဂ္ဂိုလ်၊ အဖွဲ့အစည်းတွေ အားလုံးကိုလည်း ကျေးဇူးတင်တယ်လို့ စကားပါးလိုက်တယ်”ဟု မိသားစုနှင့် နီးစပ်သည့် ၎င်းဒေသခံ အမျိုးသားက ပြောဆိုသည်။

ပြီးခဲ့သည့် ဖေဖော်ဝါရီလ (၇) ရက်တွင် လားရှိုးမြို့နယ် မိုင်းယော်တိုက်နယ်ရှိ အသက်မပြည့်သေးသည့် မိန်းကလေးတစ်ဦးကို အပြိုင်လိုက်ကြိုက်ရာမှ အချင်းချင်း ပြန်ပစ်သတ်ခဲ့သည့် ကိုးကန့်တပ်သားနှစ်ဦးနှင့် ဆက်စပ်သည်ဟု စွပ်စွဲကာ MNDAA တပ်သားများမှ ၎င်းတို့ စခန်းချတပ်စွဲထားသည့် လုံမွန်းရွာ ဘုန်းကြီးကျောင်းသို့ အသက် (၁၅) နှစ်အရွယ် နန်းယိင်းဟွမ်ကို ဖမ်းဆီးခေါ်ဆောင်သွားခဲ့သည်။

ကိုးကန့်တပ်ဖွဲ့မှ ယနေ့ မွန်းလွဲပိုင်းတွင် ပြန်လွှတ်ပေးလိုက်သည့် နန်းယိင်းဟွမ်မှာ MNDAA တပ်စခန်းတွင် တစ်လတိတိ ထိန်းသိမ်းခံထားခဲ့ရပြီး ယင်းအတောအတွင်း သေနတ်ပစ်သတ်ခံခဲ့ရ၍ သေဆုံးသွားသည့် ကိုးကန့်စစ်သား၏ မိခင်မှ လာရောက်ခြိမ်းခြောက် ပြောဆိုခဲ့ကြောင်း သိရသည်။

မတ်လ (၄) ရက်နေ့တွင် မိုင်းယော်တိုက်နယ် MNDAA တပ်စခန်းသို့ မိဘများမှ သွားရောက်တွေ့ဆုံချိန်တွင် နန်းယိင်းဟွမ်၏ ကျန်းမာရေးနှင့် စိတ်ပိုင်းဆိုင်ရာ စိုးရိမ်နေရကြောင်း ဒေသခံများက ပြောသည်။

ကိုးကန့်စစ်သားနှစ်ဦး အချင်းချင်း သေနတ်ဖြင့် ပစ်ခတ်ခဲ့သည့်ဖြစ်စဉ်တွင် ကျူးလွန်ခဲ့သည့် ကိုးကန့်စစ်သားကို MNDAA မှ မိုင်းယော်ကျေးရွာအုပ်စုအတွင်း ကနဦး ဖမ်းဆီးထိန်းသိမ်း ထားခဲ့သော်လည်း ပြစ်ဒဏ်ချမှတ်ခြင်း မခံရမီ အခြားနေရာသို့ ပြောင်းရွှေ့လိုက်ကြောင်း သိရသည်။

MNDAA ထံ ဖမ်းဆီးထိန်းသိမ်းခံထားရသည့် နန်းယိင်းဟွမ် ပြန်လည်လွတ်မြောက်ရေးအတွက် သျှမ်းအရပ်ဘက် အဖွဲ့အစည်းများမှ ဦးဆောင်၍ “Free Nang Ying Hom” အွန်လိုင်းကမ်ပိန်းကိုလည်း ပြုလုပ်ထားပြီး “MNDAA မှ ဖမ်းဆီးသွားသော နန်းယိင်းဟွမ်ကို အမြန်လွှတ်ပေးပါ”၊ “Civilian is not Hostage” စသည့် စာသားများဖြင့် တောင်းဆိုခဲ့ကြသည်။

ထို့အပြင် နိုင်ငံတကာ လူ့အခွင့်အရေး လှုပ်ရှားသည့် အဖွဲ့များနှင့် ကုလသမဂ္ဂ၊ အာဆီယံ၊ တရုတ်နှင့် ထိုင်း စသည့် သံရုံးများသို့ လိပ်မူ၍ သျှမ်းအရပ်ဘက် အဖွဲ့အစည်းများမှ မတ်လ (၁) ရက်တွင် စာရေးသားပေးပို့ခဲ့သည်။

အလားတူ မိဘများမှ လားရှိုးမြို့သို့ လာရောက်၍ မြို့ပေါ်ရှိ သျှမ်းအရပ်ဘက် အဖွဲ့အစည်းများနှင့်အတူ နန်းယိင်းဟွမ် ပြန်လည်လွတ်မြောက်ရေးအတွက် UWSA ‘ဝ’ဆက်ဆံရေးရုံးသို့ ဖေဖော်ဝါရီ ၂၂ ရက်တွင် သွားရောက် အကူအညီ တောင်းခံကာ လောက်ကိုင်မြို့ရှိ MNDAA ဌာနချုပ်သို့လည်း စာပေးပို့ခဲ့ကြောင်း သိရသည်။