ကရင်နီ (ကယားပြည်) ဒီးမော့ဆိုမြို့ ချယ်ရီကုန်း အနီးရှိ စစ်ရှောင်စခန်းတစ်ခုကို စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ကာ စစ်ရှောင်အမျိုးသမီး တစ်ဉီး ဒဏ်ရာရရှိကြောင်း သတင်းရရှိသည်။
ယမန်နေ့ (မတ်လ ၄ ) နေ့လယ် ၁၂ နာရီဝန်းကျင်တွင် ဒီးမော့ဆိုအနောက်ခြမ်းရှိ KTV နှင့် ချယ်ရီကုန်း စျေးအနီးတွင် ဂျက်ဖိုက်တာဖြင့် ဗုံးကြဲတိုက်ခိုက်သဖြင့် စစ်ရှောင်အမျိုးသမီး တစ်ဉီး ထိခိုက်ဒဏ်ရာရရှိပြီး နေအိမ်ပျက်စီးမှုရှိကြောင်း စစ်ရေး သတင်းရင်းမြစ်တစ်ဉီးက သျှမ်းသံတော်ဆင့်ကိုပြောသည်။
“ မနေ့က နေ့လယ် ၁၂နာရီလောက်မှ လာကြဲသွားတာ။ ချယ်ရီကုန်းစျေးအနားကြဲတော့ စျေးရော စစ်ရှောင်စခန်းပါကြဲသွားတာ။ အမျိုးသမီးတစ်ဉီး ထိခိုက်ဒဏ်ရာရသွားတယ်။ ခြေထောက်ထိသွားတယ်။ စစ်ရှောင်တဲတွေလည်း ပျက်စီးသွားတယ်။” ဟု စစ်ရေး သတင်းရင်းမြစ်တစ်ဉီးက ဆိုသည်။
စစ်ကောင်စီသည့် အရပ်သားများ နှင့် စစ်ရှောင်များနေထိုင်သည့် နေရာကို ဉီးတည်ပြီး လေကြောင်းဖြင့် တိုက်ခိုက်လာခဲ့သည်မှာ ပထမဆုံး အကြိမ်ဖြစ်ကြောင်း သိရသည်။
“ အခု စစ်ရှောင်စခန်းကိုပါ ဗုံးကြဲတော့ စစ်ရှောင်တွေတော့ ပြောင်းရွှေ့နေစရာမရှိတော့ဘူး။ ဒီအနီးနားမှာပဲ ရွှေ့နေရင် ဘာမှ မထူးဘူး။ စစ်တပ်က နေ့တိုင်းလိုက်ပစ် လိုက်ကြဲနေတာ။ သတိနဲ့နေဖို့ပဲလိုတယ်” ဟု ၎င်းစစ်ရေး သတင်းရင်းမြစ်က ဆိုသည်။
ယမန်နေ့ စစ်ကောင်စီလေကြောင်းဖြင့် ကြဲသည့်နေရာသည် စစ်ရှောင်များ ဘေးကင်းလုံခြုံမည်ဟု အထင်ဖြင့် ပြောင်းရွှေ့ကာ စစ်ရှောင်စခန်းအနေဖြင့် တဲထိုးကာ နေထိုင်လာခြင်းဖြစ်သည်။
“ စစ်ရှောင်တွေက အခုကြဲတဲ့နေရာမှာ အဆင်ပြေမယ်ထင်လို့ပြောင်းလာတာ။ နောက်ပြီး ဆိုင်တွကလည်း ရှိ တော့ ပြည်သူတွေကို ပစ်မှတ်မထားဘူးထင်ပြီး လာနေကြတာ” ဟု မြေပြင် သတင်းရင်းမြစ်က ဆိုပြန်သည်။
စစ်ကောင်စီ သည် လေကြောင်းဖြင့်ပစ်ခတ်သည့် အပြင် လွိုင်ကောာ်မြို့ရှိ စစ်ကောင်စီ တပ်မှ လည်း လက်နက်ကြီးဖြင့် လှမ်းပစ်ခတ်မှု ဆက်လုပ်နေကြောင်း သိရသည်။
စစ်ကောင်စီတပ်သည် အရပ်သားများကိုပါ ပစ်မှတ်ထားပြီ လေကြောင်းဗုံးကြဲတိုက်ခိုက်ပိုများလာပြီး ဖေဖော်ဝါရီလအတွင်း ကရင်နီပြည်၌ အသက် ၁၀နှစ်အရွယ်ရှိ ကလေး ၂ဦး ၊ အသက် ၁၇နှစ်အရွယ်ရှိ လူငယ် နှစ်ဉီး နှင့် အရပ်သားသားပြည်သူ တစ်ဉီး စုစုပေါင်း သေဆုံးပြီး ၁၁ဉီး ထိခိုက်ဒဏ်ရာရရှိခဲ့သည်။
Leave a Comments