ထိုင်းနိုင်ငံ ချင်းမိုင်မြို့တွင် တရားမဝင်အလုပ်လုပ်ကိုင်နေသော မြန်မာနိုင်ငံသား ၂ ဦးနှင့် ထိုင်းအလုပ်ရှင်ကို ဖမ်းဆီးရမိကြောင်း Chiangmai Immigration က သတင်းထုတ်ပြန်သည်။

ယနေ့ (ဖေဖော်ဝါရီလ ၂၇ ရက်)တွင် ချင်းမိုင်ခရိုင် လူဝင်မှုကြီးကြပ်ရေး ရဲတပ်ဖွဲ့မှ ဒုရဲမှူးကြီးက စုံစမ်းစစ်ဆေးရေးအဖွဲ့ကို ဦးဆောင်ပြီး ချင်းမိုင်ခရိုင်အတွင်း စီးပွားရေးလုပ်ငန်းများအား စစ်ဆေးခဲ့ကြောင်း ဖော်ပြသည်။

ထိုသို့ စစ်ဆေးခဲ့ရာတွင် ချင်းမိုင်ခရိုင် Chang Phueak တွင် နိုင်ငံခြားသားများတရားမဝင် ဝင်ရောက် အလုပ်လုပ်ကိုင်နေကြောင်း သတင်းရရှိသည့်အတွက် အလုပ်လုပ်နေသူ မြန်မာနိုင်ငံသား ၂ ဦးနှင့် ထိုင်းအလုပ်ရှင်ကို ဖမ်းဆီးခဲ့ကြောင်းဆိုသည်။

ထိုင်းနိုင်ငံမှာ နိုင်ငံခြားသားများ အလုပ်လုပ်ကိုင်ခွင့်ပြုထားသော်လည်း အကြောင်းကြားမှု မရှိသဖြင့် ဖမ်းဆီးခဲ့ခြင်း ဖြစ်ကြောင်း၊ ထိုင်းအလုပ်ရှင်ကလည်း အမည်စာရင်း မှတ်ပုံတင်အရာရှိအား အသိပေးခြင်းမရှိဘဲ အလုပ်ခန့်မှုဖြင့် ထိုင်းအလုပ်ရှင်ပါ ဖမ်းဆီးခဲ့ခြင်း ဖြစ်ကြောင်း ဖော်ပြထားသည်။

ဖမ်းဆီးခံရသော မြန်မာနိုင်ငံသား ၂ ဦးသည် ထိုဆိုင်တွင် အလုပ်လုပ်ကိုင်နေသည်မှာ ၁ လခန့်သာရှိသေးသည်ဟု သိရသည်။

လက်ရှိတွင် တရားခံအားလုံးကို ထိုင်းရဲတပ်ဖွဲ့က ဖမ်းဆီးထိန်းသိမ်းထားပြီး ချင်းမိုင်မြို့မရဲစခန်း၏ ဥပဒေအရ အရေးယူဆောင်ရွက်သွားမည်ဖြစ်ကြောင်း သိရသည်။

အလားတူ ထိုင်းနိုင်ငံတောင်ပိုင်း ရနောင်းခရိုင်တွင် အွန်းလိုင်းပေါ်မှ ပစ္စည်းရောင်းချသည့် မြန်မာစုံတွဲအား ထိုင်းဘတ်ငွေ ၁၂ သိန်းကျော် တန်းဖိုရှိကုန်ပစ္စည်းများနှင့်အတူ ဖေဖော်ဝါရီ ၂၅ ရက်က ဖမ်းဆီးရမိကြောင်း ထိုင်းသတင်းဌာနက ဖော်ပြသည်။

အဆိုပါ မြန်မာစုံတွဲသည် နာမည်ကြီး အမှတ်တံဆိပ်ပါ အလှကုန်အမျိုးမျိုးကို အွန်လိုင်းပေါ်မှ ကြော်ကြာကာ Applications ဖြင့် ရောင်းချနေသည်ဟု သိရသည့်အတွက် ရနောင်းခရိုင်တရားရုံး၏ ဖမ်းဝရမ်းနှင့်အတူ သွားရောက်ဖမ်းဆီးခဲ့ခြင်းဖြစ်ကြောင်း ဖော်ပြသည်။

ယင်းပစ္စည်းများမှာ ထိုင်နိုင်ငံတွင် တရားမဝင် မှတ်ပုံတင်ထားသော တံဆိပ်များမပါရှိဘဲ နိုင်ငံခြားမှ တင်သွင်းသည့် အထောက်အထားများလည်းမရှိသည့်အတွက် သိမ်းဆည်းခဲ့ကြောင်း ဆိုသည်။

ထို့ပြင် နေအိမ်အတွင်း ဝင်ရောက်စစ်ဆေးရာတွင် ဘတ်တသန်းကျော်ရှိသည့် ထိုင်းငွေစုဘဏ် စာအုပ် ၂ အုပ်၊ ဘတ် ၁၂ သိန်းကျော် တန်းဖိုးရှိ ကုန်ပစ္စည်းအရေအတွက်ပေါင်း ၅,၀၀၀ ကျော်ကိုပါ သိမ်းဆည်းခဲ့သည်။

ထို့အတူ မြန်မာစုံတွဲကို တရားမဝင် ဝင်ရောက်လုပ်ကိုင်မှု၊ ကန့်သတ်ထားသော လုပ်ငန်းမျိုးအမျိုးအစား လုပ်ကိုင်မှု၊ အကောက်ခွန် ဥပဒေများဖြင့် အရေးယူသွားမည်ဖြစ်ကြောင်း သတင်း၌ ဖော်ပြထားသည်။

ထိုင်းနိုင်ငံတောင်ပိုင်းရှိ ခရိုင် ၇ ခုတွင် ထိုင်းလူမျိုးမှ နာမည်ခံပေးပြီး နိုင်ငံခြားသားများ လုပ်ကိုင်နေသည့် တရားမဝင်လုပ်ငန်းများအပေါ် အကြီးစားနှိမ်မှုများ လုပ်ဆောင်နေကြောင်း ဘန်ကောက်ပို့စ် သတင်းစာကလည်း ဖော်ပြထားသည်။

ယင်းကဲ့သို့ တရားမဝင်လုပ်ငန်းများကြောင့် ထိခိုက်ဆုံးရှုံးမှုက ဖူးခက်မှာတင် ဘတ် ၁ ဘီလီယံကျော်ရှိသည်ဟု ထိုင်းရဲခရိုင် ၈ (PPR8) ကလည်း ထုတ်ပြန်သည်။

ထိုင်းနိုင်ငံတွင် ရွှေ့ပြောင်းအလုပ်သမားများ လုပ်ပိုင်ခွင့်မရှိသည့် လုပ်ငန်း ၂၇ မျိုးရှိသည်။

ထိုထဲတွင် ဧည့်လမ်းညွှန်လုပ်ငန်း၊ ယာဉ်မောင်းလုပ်ငန်း၊ ပွဲစားနှင့် အေဂျင်စီ လုပ်ငန်းနှင့် ဈေး/ လှည့်လည်ရောင်းခြင်း လုပ်ငန်းတို့ ပါဝင်ထားသည်။

ထိုင်းအစိုးရမှ အလုပ်လုပ်ခွင့် တားမြစ်ထားသော လုပ်ငန်းများကို လုပ်ကိုင်နေကြောင်း စစ်ဆေးတွေ့ရှိပါက ဒဏ်ငွေ ဘတ် ၅,၀၀၀ မှ ဘတ် ၅၀,၀၀၀ အထိ ချမှတ်ခံရမည်ဖြစ်ပြီး ထိုင်းနိုင်ငံအတွင်း ၂ နှစ်အလုပ်လုပ်ကိုင်ခွင့် ပိတ်သိမ်းပြီး မိခင်နိုင်ငံကို ပြန်လည်ပို့ဆောင်ခံရမည်ဖြစ်သည်။