ထိုင်းနိုင်ငံတွင် တစ်ပတ်အတွင်း မြန်မာ ၄,၈၀၀ ကျော်ဖမ်းဆီးခံရကြောင်း ထိုင်းတော်ဝင်ရဲတပ်ဖွဲ့က ဖေဖော်ဝါရီလ ၂၆ ရက်တွင် သတင်းထုတ်ပြန်သည်။

ဖေဖော်ဝါရီလ ၁၈ ရက်မှ ၂၄ ရက်အထိ ထိုင်းနယ်စပ်တစ်လျှောက်နှင့် ခရိုင်အသီးသီးတွင် တရားမဝင် ဝင်ရောက်လာသူများ၊ တရားမဝင် နေထိုင်သူများ၊ ရာဇဝတ်မှုကျူးလွန်သူများ၊ အွန်လိုင်းငွေလိမ်လုပ်ငန်းများနှင့် ပတ်သက်သူများကို ထိုင်းရဲတပ်ဖွဲ့က ဖမ်းဆီးစစ်ဆေးခဲ့သည်။

ဖမ်းဆီးစစ်ဆေးမှု ၆ ရက်သာအတွင်း ပြစ်မှုကျူးလွန်သူ နိုင်ငံခြားသား စုစုပေါင်း ၉,၅၃၂ ဦးကို ဖမ်းဆီးအရေးယူနိုင်ခဲ့ကြောင်း ဖော်ပြထားသည်။

ထိုထဲတွင် ဖမ်းဝရမ်းထုတ်သားပြီးသူ ၂၀၇ ဦး၊ တရားမဝင် ရွှေ့ပြောင်းနေထိုင်သူ ၆,၂၃၉ ဦး၊ တည်းခိုနေထိုင်သူ ၈၇၅ ဦးနှင့် နိုင်ငံသားမှတ်ပုံတင် ရုပ်သိမ်းခံထားရသူ ၁၂၀ ဦး၊ ခွင့်မပြုထားသည့် တားမြစ်လုပ်ငန်းများ လုပ်ကိုင်သူ ၄၆၃ဦး နှင့် အခြားဥပဒေချိုးဖောက်သူ ၁,၆၂၈ ဦးတို့ ပါဝင်ကြောင်း ဆိုသည်။

ထို့ပြင် နိုင်ငံအလိုက်ဖမ်းဆီးအရေးယူမှုတွင် ထိုင်းနိုင်ငံသား ၅၆၄ ဦး၊ မြန်မာနိုင်ငံသား ၄,၈၇၉ ဦး၊ လာအိုနိုင်ငံသား ၁,၆၉၉ ဦး၊ ကမ္ဘောဒီးယားနိုင်ငံသား ၁,၃၇၆ ဦး၊ ဗီယက်နမ်နိုင်ငံသား ၁၀၃ ဦးနှင့် အခြားနိုင်ငံသား ၉၁၁ ဦးတို့ပါဝင်ကြောင်း ဖော်ပြထားသည်။

ထိုင်းနိုင်ငံ နေရာဒေသအသီးသီးရှိ နိုင်ငံခြားသားများ၏ ဥပဒေနှင့်မညီသော လှုပ်ရှားမှုများကို စောင့်ကြည့်အရေးယူရန် ထိုင်းရဲချုပ် Kitrat Panphet က (ဖေဖော်ဝါရီလ ၁၇ ရက်မှာ) အမိန့်ထုတ်ပြန်လိုက်ပြီးနောက် ယင်းကဲ့သို့ဖမ်းဆီးခံရမှုများရှိလာခြင်း ဖြစ်သည်။

ထိုကြောင့် ထိုင်းရောက် မြန်မာပြောင်းရွှေနေထိုင်သူများ၊ အလုပ်သမားများအနေဖြင့် ထိုင်းနိုင်ငံ ဥပဒေများအား လိုက်နာကြရန်နှင် သတိထား သွားလာနေထိုင်ကြရန် အသိပေးအပ်ပါသည်။

လက်ရှိ မြန်မာနိုင်ငံတွင် တိုက်ပွဲများနှင့် စစ်မှုထမ်းဥပဒေများကြောင့် ထိုင်းနိုင်ငံသို့ ထွက်ပြေးတိမ်းရှောင်လာသူများသည် ယခုရက်ပိုင်းအတွင်း အစုလိုက်အပြုံလိုက်ဖမ်းဆီးခံနေရသည်။

“အခုချိန်မှာ ဘတ်ရိုက်နေတဲ့အချိန်လည်း ဖြစ်တော့ အကုန်လုံးကိုစိုးရိမ်နေရတာပဲ။ Name List ရှိလည်း အခုဖမ်းနေတယ်ပြောတယ်။ ဖမ်းခံရရင်တော့ တကယ်မလွယ်ဘူး။ မြန်မာပြည် ပြန်ပို့ခံရရင်တော့ ဘဝကြီးကသွားပြီ” ဟု ထိုင်းရောက်မြန်မာရွှေ့ပြောင်းအလုပ်သမားတစ်ဦးက ပြောသည်။

ထိုသို့ ဖမ်းဆီးရမိသော မြန်မာနိုင်ငံသားများကို ထိုင်းရဲတပ်ဖွဲ့က ပြည်နှင်ဒဏ်ပေးပြီး မြန်မာနိုင်ငံသို့ ပြန်ပို့ခဲ့သည်။ ထိုသို့ ပြန်ပို့ခံရသည့် မြန်မာလူငယ်များကို စစ်ကောင်စီက စစ်မှုထမ်းရန် ဖမ်းဆီးခေါ်ဆောင်ခြင်းများ ရှိခဲ့ကြောင်း သိရသည်။

ပြီးခဲ့သည့် ဖေဖော်ဝါရီလ ၂၁ ရက်နှင့် ၂၂ ရက်တွင်လည်း နေပြည်တော်မှာ ထိုင်းနိုင်ငံခြားရေးဝန်ကြီး နှင့် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်တို့ တွေ့ဆုံခဲ့ရာ ကျားဖြန့်၊ အွန်လိုင်းလောင်းကစား အပါအဝင် တရားမဝင်လုပ်ငန်းများ တိုက်ဖျက်ရေးနှင့် နှစ်နိုင်ငံသတင်း အချက်အလက်ဖလှယ်ရေး အကြောင်းများ ဆွေးနွေးခဲ့ကြသည်။