သျှမ်းပြည်တောင်ပိုင်းအတွင်း ရောက်ရှိနေသည့် စစ်ဘေးရှောင်များအတွက် ဆေးဝါးပြတ်လပ်မှု စတင်ကြုံတွေ့နေရပြီး အမျိုးသမီးများအတွက်လည်း အရေးပေါ် သန္ဓေတားဆေး ပြတ်လပ်မှု ဖြစ်လာနိုင်ကြောင်း သတင်းရရှိသည်။
လက်ရှိ ဆေးဝါးပြတ်လပ်နေသည့် စစ်ဘေးရှောင်စခန်းများမှာ ဆီဆိုင်၊ အင်းလေးဒေသ နှင့် သျှမ်း-ကရင်နီ နယ်စပ်တကြော ဖြစ်သည်။
“ကျမတို့ဆီမှာက ဆေးဝါးတွေကတော့ စပြတ်နေပြီ၊ အမျိုးသမီးတွေ အတွက်ကတော့ သန္ဓေတားဆေး ပြတ်လာမယ့် အခြေအနေတော့ ရှိတယ်။ ထောက်ပံ့တဲ့ အဖွဲ့အစည်းတွေကလည်း ရှားလာတော့ အစစအရာရာ ပြတ်နေတာ ဟု လွိုင်ကော်မြို့မှ သျှမ်းတောင်ဘက်သို့ ရောက်လာသည့် စစ်ဘေးရှောင် အမျိုးသမီးတစ်ဉီးက သျှမ်းသံတော်ဆင့်ကို ပြောသည်။
ကရင်နီပြည်နယ် လွိုင်ကော်မြို့အတွင်း ဖြစ်ပွားခဲ့သည့် တိုက်ပွဲများကြောင့် ညောင်ရွှေမြို့နယ်အတွင်းသို့ ရောက်ရှိလာသည့် စစ်ဘေးရှောင် အမျိုးသမီးများအတွက် ကျန်းမာရေးဆိုင်ရာ အသိပညာပေးခြင်းနှင့် လိင်ပိုင်းဆိုင်ရာ အသိပညာပေးမှုများ ပြုလုပ်ပေးရန် လိုအပ်ကြောင်းလည်း ၎င်းစစ်ဘေးရှောင် အမျိုးသမီးက ဆိုသည်။
“စစ်ဘေးရှောင်စခန်းမှာ အများနဲ့နေရတော့ အဆင်မပြေတာတွေ များတာပေါ့။ စစ်ရှောင်စခန်းမှာနေတဲ့ အမျိုးသမီးရော အမျိုးသားတွေအတွက်ပါ ကျန်းမာရေးဆိုင်ရာတွေ၊ နောက်ပြီး သားဆက်ခြားနည်းလိုမျိုး လိင်ပိုင်းဆိုင်ရာ ပညာပေးသင်တန်းတွေ လုပ်ဖို့ လိုအပ်တယ်။ အခု သန္ဓေတားဆေးက ပြတ်လာတော့ ဘယ်လိုကာကွယ်သင့်လဲကစ အသိပညာပေးတွေ ပေးဖို့လိုတယ်” ဟု ဆယ်ကျော်သက် သမီး၏ မိခင်တစ်ဉီးက သျှမ်းသံတော်ဆင့်ကို ပြောသည်။
ထို့အပြင် ဆီဆိုင်မြို့နယ်နှင့် အင်းလေးဒေသရှိ ကျေးရွားအများစုသည် ကျေးလက်ဆေးပေးခန်း မရှိသည့် အပြင် ဒေသခံများလည်း သားဆက်ခြားခြင်းနှင့် ပတ်သက်သည့် အသိပညာ အလွန်နည်းပါးနေသည့်အတွက် အိမ်ထောင်သည် အမျိုးသမီးငယ် သေဆုံးမှုများရှိနေကြောင်း သျှမ်းတောင်တွင် တက်ကြွလုပ်ရှားနေသည့် အမျိုးသမီးတစ်ဦးက ပြောသည်။
“သားဆက်ခြား အသိပညာပေးက အိမ်ထောင်ရှင်ရော နောက် ဆယ်ကျော်သက် အမျိုးသား၊ အမျိုးသမီးတွေပါ ပေးဖို့လိုအပ်တယ်။ အခုက သားဆက်ခြားဆေးတွေ မရတော့ ဘယ်လို ကာကွယ်လို့ရလဲ ဆိုတာတော့ ပေးဖို့လိုအပ်တယ်”ဟု ၎င်းအမျိုးသမီးက ဆိုသည်။
ထို့အပြင် အမေရိကန် အစိုးရ၏ USAID မှ ဒုက္ခသည်များကို ကူညီပေးသည့် အသုံးစရိတ်ကို ဇန်နဝါရီ ၂၇ ရက် မှစပြီး ရက်ပေါင်း ၉၀ အတွင်း ယာယီရပ်ဆိုင်းထားသဖြင့် ကျန်းမာရေး ဝန်ဆောင်မှုလုပ်ငန်းများလည်း ယာယီဆိုင်းငံ့ထားရပြီး သန္ဓေတားဆေး သုံးစွဲနေသည့် စစ်ရှောင်စခန်းမှ အမျိုးသမီးများအတွက် ယခုလကုန်ထိသာ ဝန်ဆောင်မှု ပေးနိုင်တော့မည်ဟုလည်း ကရင်နီ ကျန်းမာရေး အဖွဲ့က ပြောဆိုလိုက်သည်။
ဆက်လက်ပြီး စစ်ဘေးရှောင်များ နေထိုင်သည့်နေရာတွင် ရေသန့်ရှင်းမှု မရှိသဖြင့် ကလေးငယ်များ ဝမ်းပျက် ဝမ်းလျှော၊ ယားနာများ ဖြစ်ပွားမှုနှုန်း မြင့်တက်လာသည့်အတွက် ဆေးဝါးများ အထူးလိုအပ်နေကြောင်း သိရသည်။
“တိုက်ပွဲကြောင့် နှစ်ချီစစ်ရှောင်နေရတဲ့ ကျမတို့က ဝမ်းစာအတွက်သာ လုပ်ကိုင်ရှာဖွေ နေရတယ်ဆိုပေမဲ့ ကိုယ့်ကျန်းမာရေး ပြဿနာကို ပြန်ကြည့်ဖို့ မေ့နေကြတယ်။ အခုဆိုရင် ကလေးငယ်တွေ ရေမသန့်လို့ ဝမ်းလျှော ဝမ်းပျက်တာတွေ ယားယံတာတွေ တအားနဲ့ဖြစ်တယ်။ ပြီးတော့ အိမ်ထောင်သည် အမျိုးသမီးတွေက သားဆက်ခြားဖို့ ဆေးဝါးတွေလည်း အရမ်းလိုလာတယ်။ ပြတ်တော့မယ့် အခြေအနေမျိုးရှိတော့မယ်”ဟု ၎င်းက ပြောသည်။
သျှမ်း-ကရင်နီ နယ်စပ်တကြောတွင် နေထိုင်သည့် စစ်ဘေးရှောင်များကို သွားရောက် အကူအညီ ထောက်ပံ့ပေးမည် ဆိုလျှင်လည်း စစ်ကောင်စီနှင့် ၎င်းလက်အောက်ခံ ပအိုဝ်းပြည့်သူစစ် (PNO) တပ်သားများက တားဆီးပိတ်ပင်နေကြောင်း သိရသည်။
Leave a Comments