သျှမ်းပြည်တောင်ပိုင်း နမ့်စန်မြို့နယ်တွင် စစ်ကောင်စီဝန်ထမ်းများမှ ရပ်ကွက်အတွင်း သန်းခေါင်စာရင်း ထပ်မံကောက်ယူနေသဖြင့် ၎င်းကို အခြေခံကာ စစ်မှုထမ်းခေါ်ယူခံရမည်ကို စိုးရိမ်နေရကြောင်း စုံစမ်းသိရသည်။

ဖေဖော်ဝါရီ (၂၁) ရက်မှ စတင်ပြီး နမ့်စန်မြို့ပေါ် ရပ်ကွက်များတွင် စစ်ကောင်စီလက်အောက်ခံ အထွေထွေအုပ်ချုပ်ရေးဉီးစီးဌာနမှ ဝန်ထမ်းများနှင့် ရပ်ကွက်လူကြီးများ လိုက်ပါလျက် တစ်အိမ်တက်ဆင်း အိမ်ထောင်စုစာရင်းပါ လူဦးရေနှင့် အလုပ်အကိုင်တို့ကို မေးမြန်း ကောက်ယူနေကြောင်း သိရသည်။

နမ့်စန်မြို့ပေါ် စစ်ကောင်စီဝန်ထမ်းများမှ (၅) လအတွင်း သန်းခေါင်စာရင်းကို ဒုတိယအကြိမ် ထပ်မံ ကောက်ခံလာခြင်းကြောင့် ၎င်းသန်းခေါင်စာရင်းကို အခြေခံ၍ စစ်မှုထမ်း ခေါ်ယူခံရမည်ကို စိုးရိမ်နေကြောင်း နမ့်စန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဒီတိုင်း ရုတ်တရက် လိုက်စစ်နေတာ၊ လူဦးရေစာရင်း လိုက်ကောက်တယ်လို့ပဲ ပြောတာ။ ရွေးကောက်ပွဲ အတွက်လား၊ စစ်မှုထမ်းအတွက်လား ဘာအတွက် လိုက်ကောက်တယ်ဆိုတာ သေချာ မသိရဘူး။ အိမ်မှာ လူဘယ်ယောက်နေလဲ၊ ဘာအလုပ်လုပ်လဲ ဘယ်သွားကြလဲ အဲ့လိုတော့ မေးတယ်။ ငါးလအတွင်း ဒီလို သန်းခေါင်စာရင်းလာကောက်တာ ၂ ခါရှိပြီ”ဟု အသက် (၄၀) ကျော်အရွယ် ၎င်းဒေသခံ အမျိုးသမီးက ပြောသည်။

ယမန်နှစ် ၂၀၂၄ အောက်တိုဘာလအတွင်း စစ်ကောင်စီဝန်ထမ်းများမှ ရွေးကောက်ပွဲအတွက်ဟု ပြောဆိုကာ နမ့်စန်မြို့ပေါ် သန်းခေါင်စာရင်း ကောက်ခံခဲ့သည်ဟု ဆိုသည်။

ယခု ဒုတိယအကြိမ် သန်းခေါင်စာရင်း ထပ်မံကောက်ခံရာတွင် နမ့်စန်မြို့ပေါ် ရပ်ကွက် (၁၊ ၂၊ ၃၊ ၄) တို့ဖြစ်ကြောင်း သိရသည်။

နမ့်စန်မြို့နယ်တွင် ယခင်က စစ်မှုထမ်းအတွက် မူးယစ်ဆေးဝါး သုံးစွဲသူများကို ဖမ်းဆီးကာ စေလွှတ်ခဲ့သော်လည်း ရပ်ကွက်အတွင်း သန်းခေါင်စာရင်း ထပ်မံကောက်ခံနေခြင်းကြောင့် စိုးရိမ်ရကြောင်း ဒေသခံများက ပြောသည်။

“နမ့်စန်မှာတော့ ဘိန်းစားဖမ်းပြီး စစ်မှုထမ်းလွှတ်တာ များတယ်။ တစ်လနည်းနည်းစီပေါ့၊ အပတ်စဉ် (၉) ထိ ရပြီလို့တော့ ကြားတယ်။ ရပ်ကွက်ထဲ စစ်မှုထမ်းလိုက်ကောက်တာတော့ မတွေ့သေးဘူး။ စစ်မှုထမ်း ထောက်ပံ့ဖို့ ပိုက်ဆံလာကောက်တာလည်း မရှိသေးဘူး။ အခု တစ်အိမ်ဝင် တစ်အိမ်ထွက် အိမ်ထောင်စုစာရင်း လိုက်စစ်မှပဲ ပြည်သူတွေ လန့်နေတာ”ဟု နမ့်စန်ဒေသခံ ၎င်းအမျိုးသမီးက ဆက်ပြောသည်။

အခြားတစ်ဘက်တွင် စစ်ကောင်စီက စစ်မှုထမ်းခေါ်ယူရာတွင် သန်းခေါင်စာရင်းကို အခြေခံ ခေါ်ယူသည့် စနစ်ကို ပြောင်းလဲမည်ဖြစ်ပြီး စစ်မှုထမ်းရန် ပျက်ကွက်ပါက အမည်ပျက်စာရင်းနှင့် ဖမ်းဝရမ်းပါ ထုတ်ခံရနိုင်ကြောင်း စစ်ကောင်စီ သတင်းရင်းမြစ်ကို ကိုးကား၍ ခေတ်သစ်သတင်းဌာနမှ ယမန်နေ့ (ဖေဖော်ဝါရီ ၂၅ ရက်) တွင် သတင်းဖော်ပြသည်။

စစ်မှုထမ်း အပတ်စဉ် (၁) မှ (၁၀) အထိကို ကျေးရွာနှင့် ရပ်ကွက်အုပ်ချုပ်ရေးမှူးအဖွဲ့များက တင်ပြသည့် စာရင်းအပေါ် အခြေခံကာ ခေါ်ယူခဲ့သော်လည်း ယခုအခါ လူဝင်မှုကြီးကြပ်ရေးဌာန လဝက မှ ၂၀၂၄ ခုနှစ်အတွင်း ကောက်ယူထားသည့် သန်းခေါင်စာရင်းကို အခြေခံ၍ ခေါ်ယူမည်ဖြစ်ကြောင်း သိရသည်။

ထို့အပြင် စစ်မှုထမ်းအကျုံးဝင်သည့် ပြည်ပရောက် မြန်မာနိုင်ငံသားများကိုလည်း မိသားစုမှတဆင့် ဆက်သွယ်ပြီး စစ်မှုထမ်းရန် မလာရောက်ပါက အမည်ပျက် စာရင်းသွင်းခြင်း၊ ဖမ်းဝရမ်း ထုတ်ခံရခြင်း စသည်ဖြင့် အရေးယူခံရမည်ဟု သိရှိရသည်။

ယမန်နှစ်က စစ်ကောင်စီ အတည်ပြုပြဋ္ဌာန်းခဲ့သည့် ပြည်သူ့စစ်မှုထမ်းဥပဒေ နောက်ဆက်တွဲအဖြစ် နည်းဥပဒေကို ဇန်နဝါရီ နောက်ဆုံးပတ်တွင် ထုတ်ပြန်ခဲ့ရာ စစ်မှုထမ်း အကျုံးဝင်သည့် လူငယ်အားလုံးကို ခွင့်ပြုချက်မရဘဲ ပြည်ပထွက်ခွာခွင့် မပြုကြောင်း ထပ်မံကန့်သတ်လိုက်သည်။