စစ်ကောင်စီနှင့် တအာင်း(ပလောင်)အမျိုးသားတပ်မတော် (TNLA)တို့ ဆွေးနွေးမှု မအောင်မြင်မှုကြောင့် စစ်ကောင်စီမှ နောင်ချိုကို ဗုံးကြဲတိုက်ခိုက်ခဲ့ကာ (၃)ဦး သေဆုံးပြီး (၄)ဦးဒဏ်ရာ ရရှိသည်ဟု စုံစမ်းသိရှိရသည်။

TNLAနှင့် စစ်ကောင်စီတို့ကြား ဆွေးနွေးပွဲတွင် နှစ်ဖက်အပြန်အလှန်တောင်းဆိုမှုများပြုလုပ်ခဲ့ပြီး ဆွေးနွေးညှိနိူင်းရန်ခက်ခဲသောကြောင့် ဖေဖော်ဝါရီလ (၁၇)ရက် ညနေပိုင်းတွင် တွေ့ဆုံပွဲ ရပ်ဆိုင်းခဲ့ရသည်။

စစ်ကောင်စီကို TNLA ဘက်မှ အချက် (၃)ချက်တောင်းဆိုရာတွင် နှစ်ဘက်တပ်ရောက်ရှိနေသော နေရာတွင် ရပ်တန့်ထားပြီး အပစ်ခတ် ရပ်စဲရန်၊ နှစ်ဘက်စလုံး ထိုးစစ်များပြုလုပ်ခြင်း၊ ဒရုန်း၊လက်နက်ကြီး၊ လေယာဉ် အစရှိသည့် စစ်ရေးလှုပ်ရှားမှုများ ရပ်တန့်ရန် နှင့် နှစ်ဘက်ထိန်းချုပ်ဒေသအတွင်း ဒေသခံများ စားဝတ်နေရေးနှင့် ဆေးဝါးများသယ်ဆောင်နိုင်ရန်အတွက် ဖြတ်သန်းသွားလာခွင့်ပြုရန် အစရှိသည်တို့ ဖြစ်သည်။

ထို့ကြောင့် ဆွေးနွေးပွဲ ပြီးဆုံးပြီး ယမန်နေ့ ဖေဖော်ဝါရီလ (၁၉)ရက်နေ့ညနေ (၈) နာရီကျော် အချိန်တွင် တိုက်ပွဲ ဖြစ်ပွားခြင်းမရှိဘဲ လေကြောင်းဖြင့် တိုက်ခိုက်သောကြောင့် နောင်ချိုမြို့ ဘူတာရပ်ကွက်နှင့် ပြည်သူ့ဆေးရုံပေါ် ဗုံးကျရောက် ပေါက်ကွဲခဲ့ပြီး ဒေသခံ (၃)ဦး သေဆုံးပြီး (၄)ဦး ထိခိုက်ဒဏ်ရာ ရရှိခဲ့သည်ဟု TNLAမှ ထုတ်ပြန်ထားသည်။

စစ်ကောင်စီနှင့် TNLAတို့ ဆွေးနွေးမှု မအောင်မြင်လျှင် လေကြောင်းတိုက်ခိုက်မှု ပိုမိုဆိုးရွားလာနိုင်သည်ဟု နိုင်ငံရေးလေ့လာသုံးသပ်သူ ဦးသန်းစိုးနိုင်မှ သျှမ်းသံတော်ဆင့်ကို ပြောသည်။

“သူတို့တွေ ဆွေးနွေးတာ မအောင်မြင်ရင်တော့ လေကြောင်းတိုက်ခိုက်တာ ပိုဆိုးလာနိုင်တယ်။ ဒါတွေက စစ်ကောင်စီဖက်မှ လုပ်ဆောင်လာခဲ့တဲ့ နည်းပရိယာယ်တစ်ခုဖြစ်တယ်။ တရုတ်ဖက်ကလည်း စစ်ကောင်စီကို လေကြောင်းတိုက်ခိုက်မှုတွေ မလုပ်ဆောင်ဖို့တော့ ပြောထားပေမဲ့ တားဆီးခြင်းမရှိတော့ ပိုပြီး တိုက်ခိုက်လာနိုင်တယ်။” ဟု သုံးသပ်ပြောဆိုထားသည်။

စစ်ကောင်စီနှင့် TNLAတို့သည့် “၁၀၂၇ စစ်ဆင်ရေး” နောက်ပိုင်း ၂၀၁၄ခုနစ် အောက်တိုဘာလမှစတင်ကာ ထိတွေ့တိုက်ပွဲမဖြစ်ပွားခဲ့ဘဲ စစ်ကောင်စီဘက်မှ တဖက်သတ် လက်နက်ကြီးလက်နက်ငယ်နှင့် လေကြောင်းထိုစစ်ဆင်မှုသာ ရှိခဲ့သည်။

၂၀၂၄ခုနစ် အောက်တိုဘာလ သီပေါမြို့က TNLA သိမ်းပိုက်ပြီးနောက် တိုက်ပွဲများငြိမ်သက်လာသဖြင့် သီပေါမြို့ ဒေသခံများက မိမိနေရပ်ကို ပြန်နေကြသည်။ သို့သော် လက်ရှိမှာ စစ်ကောင်စီနှင့် TNLA တို့ ဆွေးနွေးမှုများ အဆင်မပြေဘဲ စစ်ကောင်စီဘက်မှ လေကြောင်းဖြင့် ဖိအားပေး ထိုးစစ်ပြန်စလာမည်ကို ပြည်သူများက စိုးရိမ်နေရသည်။

“ TNLA ထိန်းချုပ်တဲ့နေရာတွေ ကတော့ စိတ်ပူနေရတယ်။ စစ်ကောင်စီရဲ့ အကျင့်ပဲလေ။ ဆွေးနွေးမှုမနိုင်ရင် လေကြောင်းနဲ့ဗုံးကြဲဖိအားပေးမယ်။ တိုက်ပွဲငြိမ်လို့ ပြည်သူက နေရပ်ပြန်ကာစရှိသေး အခုက ပြန်ကြောက်နေရပြီ၊ ပြည်သူတွေဘေးကင်းဖို့ပဲ ဆုတောင်းနေရတယ်” ဟု တောင်ကြီးရောက် သီပေါမြို့မှ စစ်ဘေးရှောင်လာသူ တစ်ဉီးက ပြောသည်။

ဆက်လက်ပြီး စစ်ကောင်စီနှင့် TNLA တို့တရုတ်မှာ ဆွေးနွေးနေစဉ်အတောအတွင်းမှာလည်း နောင်ချိုမြို့နယ်ရှိ ကျေးရွာ(၄)ရွာကို ပြီးခဲ့သည့် ဖေဖော်ဝါရီလ (၁၅)ရက်နေ့ တွင် လေကြောင်းဖြင့် ဗုံးကြဲတိုက်ခိုက်ခဲ့သောကြောင့် စာသင်ကျောင်း ထိခိုက်ပျက်စီးခဲ့ရသည်။

ထို့နောက် ဖေဖော်ဝါရီလ (၁၆)ရက်နေ့တွင်လည်း TNLAထိန်းချုပ်ထားသည့် ကွတ်ခိုင်-နမ္မတူကြားကို စစ်တပ်မှ လေကြောင်း အသုံးပြုတိုက်ခိုက်သောကြောင့် ဒေသခံများ ကြောက်လန့်နေခဲ့ကြသည်။

အလားတူ ပြီးခဲ့သည့် ဖေဖော်ဝါရီလ (၁၀)ရက်နေ့တွင် TNLAထိန်းချုပ်နယ်မြေဖြစ်သည့် မိုးကုတ်မြို့ကို စစ်တပ်မှ လေကြောင်းအသုံးပြုတိုက်ခိုက်ခြင်းကြောင့် ဒေသခံ (၅)ဦးသေဆုံးပြီး (၁၉)ဦး ဒဏ်ရာရရှိခဲ့သည်။

စစ်ကောင်စီမှ တိုက်ပွဲဖြစ်ပွားခြင်းမရှိဘဲ အရပ်သားများကို ရည်ရွယ်ချက်ရှိရှိ လေကြောင်းတိုက်ခိုက်နေသောကြောင့် ပြည်သူများအနေဖြင့် လေကြောင်းအန္တရာယ်ရှောင်ရှားနိုင်စေရန် စစ်ရေးအမြဲသတိရှိရန်လိုအပ်သည်ဟု TNLAမှ အသိပေးပြောကြားထားသည်။