ထိုင်းနိုင်ငံရောက် မြန်မာရွှေ့ပြောင်းအလုပ်သမားများ၏ အခက်ခဲများကို ကူညီဆောက်ရွက်ပေးနေသည့် AAC မဟာမိတ်အဖွဲ့၏ရုံးကို ယမန်နေ့ (ဖေဖော်ဝါရီလ ၁၈ ရက်) မနက်ပိုင်းတွင် ထိုင်းအာဏာပိုင်းများက လာရောက်စစ်ဆေးပြီး ရုံးပိတ်သိမ်းရန် ပြောဆိုသွားကြောင်း AAC မဟာမိတ်အဖွဲ့ထံမှ သိရသည်။

“လက်တွဲကူညီ AAC မဟာမိတ်” အဖွဲ့သည် ထိုင်းအစိုးရထံမှ တရားဝင်မှတ်ပုံတင်ထားခြင်း မရှိသဖြင့် ရုံးပိတ်သိမ်းရန် ညွှန်ကြားခဲ့ခြင်းဖြစ်ကြောင်း သိရသည်။

ထို့ပြင် ရုံးသို့လာရောက်တိုင်ကြားနေသည့် မြန်မာလုပ်သား ၁၀၀ ကျော်၏ အထောက်အထားများကိုလည်း စစ်ဆေးခဲ့သည်ဟု သိရသည်။

AAC တွင် လာရောက်ခိုလှုံနေသူများသည် အထောက်အထားရှိသော်လည်း နေရပ်လိပ်စာ ပြောင်းလဲကြောင်း အကြောင်းမကြားထားသည့်အတွက် ပတ်စပိုစ့်နှင့် နေထိုင်ခွင့်လက်မှတ်များကို သိမ်းဆည်းသွားကြောင်း၊ အလုပ်သမားများက တစ်ဦးလျှင် ဘတ် ၄,၀၀၀ စီနှင့် အိမ်ရှင်က ဘတ် ၁,၆၀၀ ပေးဆောင်ပြီးမှသာ စာရွက်စာတမ်းများ ပြန်လည်ရရှိမည်ဟု ဆိုသည်။

AAC သည် ရုံးအနေဖြင့် စတင်ဖွင့်လှစ်ခဲ့သည်မှာ ၂၀၁၅ ခုနှစ်ကစတင်ခဲ့ခြင်းဟု သိရပြီး ထိုင်းနိုင်ငံသို့ ရောက်ရှိလာသော မြန်မာရွှေ့ပြောင်းလုပ်သားအရေးကို ဆယ်စုနှစ်နှင့်ချီ၍ အခကြေးငွေရယူခြင်းမရှိဘဲ ကူညီလုပ်ဆောင်ပေးနေကြောင်း သိရသည်။