သျှမ်းပြည်တောင်ပိုင်း ညောင်ရွှေမြို့နယ် ဘုရားတောင်ကျေးရွာတွင် ပအိုဝ်းပြည်သူ့စစ် (PNO) တပ်ဖွဲ့မှ ဒေသခံ(၅)ဉီးကို ရိုက်နှက်ဖမ်းဆီး စစ်ဆေးပြီး ပြန်လွှတ်ပေးလာကြောင်း စုံစမ်းသိရသည်။
ညောင်ရွှေမြို့နယ် အင်းလေးဒေသအရှေ့ဘက်ခြမ်းရှိ ဘုရားတောင်ကျေးရွာတွင် ဒေသခံ(၅)ဉီးကို PNO တပ်ဖွဲ့မှ ရိုက်နှက်ဖမ်းဆီး စစ်ဆေးမေးမြန်းပြီး ပြန်လွတ်လာပေးကြောင်း ဖမ်းဆီးခံရသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
“အဲရွာဘက်မှာက စစ်ရေးတွေ တင်းမာနေတယ်။ တိုက်ပွဲကလည်း ဘေးတဝိုက်မှာ ဖြစ်နေတယ်၊ အသံတွေလည်း ကြားရတယ်။ PNO က ရွာပြင်မထွက်ခိုင်းတာတွေ ပြီးတော့ သူတို့ရှောင်ခိုင်းတဲ့ အချိန်မှာ မရှောင်ပဲ ရွာက ထွက်တာတွေ့ရင် ဖမ်းသွားပြီး စစ်ဆေးတာ။ သူတို့ဖမ်းချင်တဲ့အချိန် ထဖမ်းပြီး ငွေနဲ့ ပြန်ရွေးခိုင်းတာမျိုးတွေ ရှိတယ်။ တချို့ဆို အရိုက်ခံရပြီးမှ ပြန်လွတ်ပေးတာ ရှိတယ်”ဟု ကိုယ်တိုင်ကြုံတွေ့ခဲ့သည့် ၎င်းအမျိုးသားက ပြောသည်။
ထို့အပြင် ပြီးခဲ့သည့် ဖေဖော်ဝါရီ ၁၄ ရက်နေ့ နံနက်ပိုင်းအချိန်တွင် စစ်ရှောင်ရန် စက်လှေဖြင့် ထွက်ခွာသွားသော ဘုရားတောင်ကျေးရွာ ဒေသခံ ၅ ဦးကို PNO ပြည်သူစစ်များက ဖမ်းဆီးပြီး ရိုက်နှက်ကာ ငွေသား သိန်း ၂၀ ပါ ပေးလိုက်ရကြောင်း နီးစပ်သည့် ဆွေမျိုးထံမှ သိရသည်။
အဆိုပါ ရိုက်နှက်ခံရသူ ၅ ဦးထဲတွင် အသက် (၃၈)နှစ်ရှိသည့် အမျိုးသားတစ်ဦးသည် PNO တပ်ဖွဲ့မှ ရိုက်နှက်ထားသည့် ဒဏ်ကြောင့် ဦးခေါင်းပေါက်ကာ ဒဏ်ရာပြင်းထန်နေကြောင့် လက်ရှိ စံကားဆေးရုံတွင် ဆေးကုသမှုခံယူနေရကြောင်း ၎င်းက ဆက်ပြောသည်။
“ခုက ကျေးရွာအနီးမှာ ရှိတဲ့ဒေသခံတွေလည်း စစ်ရှောင်နေကြတယ်။ တချို့ကလှေတွေနဲ့ ညောင်ရွှေမြို့ဘက် ရှောင်တဲ့သူလည်း ရှိကြတယ်။ အဲလိုရှောင်တဲ့ အချိန်မှာပဲ PNO က ဖမ်းသွားတယ် ရိုက်နှက်မှုပါ လုပ်တယ်။ ခေါင်းပေါက်လို့ အခု ဆေးရုံတင်ထားရတယ်။ ဆေးရုံရောက်မှ သတင်းက ထွက်လာတာ ဘာလို့ဆို အကုန်လုံးကလည်း ဘေးလုံခြုံဖို့ ပြေးတဲ့အချိန်မို့ ဘယ်သူ့ကိုမှ သတိမထားမိတာရှိတယ်”ဟု ၎င်းက ပြောသည်။
စစ်ကောင်စီတပ်မှ လက်နက်ကြီး ရမ်းသမ်းပစ်ခတ်မှုကြောင့် ကျေးရွာ (၁၀) ရွာခန့်ရှိ ဒေသခံ ၃ ထောင်ကျော် ထွက်ပြေး တိမ်းရှောင်နေရကြောင်း ဒေသခံပြောပြချက်အရ သိရသည်။
ညောင်ရွှေမြို့နယ် အင်းလေးဒေသရှိ ရေပူ(ထီခိုး) ကျေးရွာအနီးတဝိုက်ရှိ ကျေးရွာဘေးပတ်လည်တွင် စစ်ကောင်စီတပ်နှင့် ပအိုဝ်းပြည်သူ့စစ် PNO တို့ စစ်အင်အား အလုံးအရင်းဖြင့် စစ်ကြောင်းထိုးလာကြောင်း အမှတ်(၁၀၀၉) အင်းလေးပြည်သူ့ကာကွယ်ရေးတပ် (LPDF) နှင့် ပူပေါင်းတပ်ဖွဲ့များက ဖေဖော်ဝါရီ ၁၆ ရက်နေ့တွင် ထုတ်ပြန်ထားသည်။
Leave a Comments