သျှမ်းပြည် ကျောက်မဲမြို့နယ်အတွင်းရှိ မိုင်းငေါ့မြို့နယ်ခွဲတွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA တို့ ပူးပေါင်းပြီး စက်ယန္တရားများဖြင့် အကြီးအကျယ် ရွှေတူးဖော်နေကြောင်း စုံစမ်းသိရသည်။

ယမန်နှစ် ၂၀၂၄ နှစ်ကုန်ပိုင်းမှ စတင်ပြီး TNLA ထိန်းချုပ်ထားသည့် ကျောက်မဲ – မိုင်းငေါ့ ကားလမ်းပေါ်ရှိ ပုံးလုံကျေးရွာအုပ်စု မန်ပင့်ရွာ အနီးတဝိုက်တွင် ဒေသခံများ အစဉ်အဆက် လုပ်ကိုင်ခဲ့သည့် လက်ငုတ်လက်ရင်း ရွှေတွင်းများကို TNLA နှင့် MNDAA ပူးပေါင်းကာ စက်ယန္တရားကြီးများဖြင့် အကြီးအကျယ် တူးဖော်နေကြကြောင်း ကျောက်မဲဒေသခံများက ပြောသည်။

“မိုင်းငေါ့ဘက် မန်ပင့်ရွာတဝိုက်မှာ အရင်ကတည်းက ရွှေတွင်းတွေ ရှိထားတယ်။ TNLA စသိမ်းတုန်းက ဒေသခံ လက်ငုတ်လက်ရင်းတွေ ဆက်လုပ်လို့ ရသေးပေမယ့် နောက်ပိုင်းကျတော့ TNLA က အခွန်အများကြီး လိုချင်တယ် ဖြစ်သွားရော၊ ကိုးကန့်တွေပါ ရောက်လာပြီးတော့ ဒေသခံတွေကို ပေးမလုပ်တော့ဘူး။ ဘတ်ဖိုးအကြီးတွေနဲ့ တကယ့်ကုမ္ပဏီလို ရွှေလာတူးကြတာ”ဟု ကျောက်မဲဒေသခံ အသက်(၃၀) ကျော်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နှင့် မိုင်းငေါ့မြို့အကြား TNLA မှ အကြီးအကျယ် ရွှေတူးဖော်ခြင်းနှင့် ပတ်သက်၍ TNLA ပြောရေးဆိုခွင့်ရှိသူ လွေးယေဦးထံ သျှမ်းသံတော်ဆင့်မှ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

မိုင်းငေါ့မြို့နယ်ခွဲရှိ ပုံးလုံကျေးရွာအုပ်စု အနီးတဝိုက်တွင် TNLA နှင့် MNDAA ပူးပေါင်းပြီး စက်ယန္တရားများဖြင့် ရွှေတူးဖော်နေခြင်းကြောင့် သစ်တောများလည်း ဖျက်စီးခံရပြီး ချောင်းတိမ်ကောလုနီးပါး ဖြစ်နေကြောင်း ဒေသခံများထံမှ သိရသည်။

“ရွှေတူးရင်တော့ သစ်တောတွေလည်း ဖျက်စီးထားသလိုပဲ တောပြုန်းတာပေါ့။ ချောင်းတွေဆို ကောပြီးတော့ ပျက်စီးကုန်ပြီ။ သူတို့ ဘယ်လောက်ကြာကြာ ထိန်းချုပ်ရမလဲ မသေချာတော့ အခု ဘတ်ဖိုးကြီးနဲ့ ရသလောက် တူးနေကြတယ်”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

TNLA ထိန်းချုပ်ထားသည့် မိုင်းငေါ့မြို့သည် ကျောက်မဲမြို့နှင့် (၃၂) မိုင်ခန့် ကွာဝေးပြီး “၁၀၂၇ စစ်ဆင်ရေး” ပထမပိုင်းအတွင်း ယမန်နှစ် ဇန်နဝါရီလ၌ သိမ်းပိုက်ထားခဲ့သည်။

အလားတူ TNLA ထိန်းချုပ်ထားသည့် ကွတ်ခိုင်မြို့နယ် မိုင်းယုလေးကျေးရွာတွင်လည်း ရွှေအလွန်အကျွံ တူးဖော်မှုကြောင့် နမ့်မောချောင်းရေ အရောင်ပြောင်းကာ ရေနှောက်လာပြီး အသုံးပြုရန် ခက်ခဲနေကြောင်း ဒေသခံများထံမှ သိရသည်။

“ရွှေတူးတဲ့ လောပန်းတွေကို ပလောင်စစ်သားတွေ ခေါ်လာပြီးတော့ သူတို့ပဲ လုံခြုံရေးယူပေးတာ။ တချို့လည်း မိုင်းပေါက်ဘက်က လာတဲ့ ‘ဝ’နဲ့ ကျားဖြန့်တရုတ်တွေ။ မိုင်းယုလေးအပေါ်ဘက် မိုင်းဝီးမှာ ရွှေတူးနေတာ တစ်လကျော် ရှိပြီ၊ ချောင်းရေလည်း ၂၄ နာရီ နှောက်လာတယ်။ ရပ်ချင်ရင်တော့ ပလောင်စစ်သား လက်ထဲမှာပဲရှိတယ်”ဟု ကွတ်ခိုင်ဒေသခံ အမျိုးသမီးတစ်ဦးက ပြောဆိုသည်။

မိုင်းယုလေးနှင့် နမ့်ဖတ်ကာကြားရှိ နမ့်မောချောင်းတစ်လျှောက်နှင့် မိုင်းဝီးကျေးရွာတွင် ရွှေတူးဖော်မှုကို ၂၀၂၄ နှစ်ကုန်ပိုင်းမှ စတင်၍ TNLA ဘက်က ပြန်လည်ခွင့်ပြုမှုကြောင့် ဒေသခံ ကိုယ်ထူကိုယ်ထ တူးဖော်မှုရှိသလို မိုင်းပေါက်မြို့နယ်ဘက်မှ ရောက်လာသည့် တရုတ် သို့မဟုတ် ‘ဝ’ကုမ္ပဏီများလည်း လာရောက်တူးဖော်ကြောင်း သိရသည်။

ပြီးခဲ့သည့် ဖေဖော်ဝါရီလ (၁၀) ရက်တွင် TNLA ထိန်းချုပ် မိုးကုတ်မြို့၌ ကျောက်တူးဖော်နေသည့် လုပ်ကွက်များကို စစ်ကောင်စီမှ လေကြောင်းဖြင့် ထပ်မံတိုက်ခိုက်ခဲ့ရာ အရပ်သား (၅) ဦး သေဆုံးပြီး (၁၉) ဦး ထိခိုက်ဒဏ်ရာရရှိခဲ့ကြောင်း TNLA သတင်းနှင့် ပြန်ကြားရေးဌာနမှ ထုတ်ပြန်ထားသည်။