သျှမ်း-ကရင်နီ နယ်စပ် သျှမ်းပြည်တောင်ပိုင်း မိုးဗြဲ၊ ဖယ်ခုံနှင့် အင်းလေးဒေသတို့တွင် တိုက်ပွဲ ပြင်းထန်နေပြီး အင်းလေး တိုက်ပွဲတွင် PNAစစ်သုံ့ပန်း (၄)ဦး ဖမ်းမိခဲ့ကြောင်း စုံစမ်းသိရသည်။
ပြီးခဲ့သည့် ဖေဖော်ဝါရီလ (၁၆)ရက် ညနေ (၂နာရီခွဲ) ဝန်းကျင်တွင် ညောင်ရွှေမြို့နယ်၊ အင်းလေးဒေသကို စစ်ကောင်စီနှင့် ပအိုဝ်း ပြည်သူ့စစ် (PNO) တို့က အင်အား (၁၀၀)ကျော်ဖြင့် ထိုးစစ်ဆင်တိုက်ခိုက်လာခဲ့ပြီး တိုက်ပွဲအတွင်း PNAဘက်မှ စစ်သုံ့ပန်း (၄)ဦးကို ဖမ်းမိခဲ့သည်ဟု အင်းလေးPDFကထုတ်ပြန်ထားသည်။
“တိုက်ပွဲမှာ PNAတပ်သား(၄)ဦး ဖမ်းမိတယ်။ ၊သူတို့ဘက် သေဆုံးတာက (၅)ယောက်ရှိတယ်။ ကျနော်တို့ဘက်ကတော့ အထိခိုက်မရှိဘူး။ လက်နက်ပစ္စည်းတွေလည်း သိမ်းဆည်း ရမိလိုက်တယ်။”ဟု အင်းလေး PDFတစ်ဉီးက သျှမ်းသံတော်ဆင့်ကို ပြောသည်။
ပွင့်လင်းရာသီရောက်လာသည်နှင့် အမျှ စစ်ကောင်စီဘက်မှ အင်းလေးဒေသအပါဝင် သျှမ်း-ကရင်နီ နယ်စပ်ကို ထိုးစစ်ဆင်တိုက်ခိုက်လာခြင်းကြောင့် တိုက်ပွဲများ ပြင်းထန်နေသည် ဟု ဒေသတစ်ဦးက ပြောသည်။
“အခုက ပွင့်လင်းရာသီလည်း ဖြစ်တော့ စစ်ကောင်စီဘက်က ထိုးစစ်ဆင် တိုက်ခိုက်လာတာဖြစ်မယ်။ ပြီးတော့ PNOတို့က အင်းလေးဒေသကို စိုးမိုးချင်နေတာဖြစ်မယ်။ ဒါကြောင့် လာပြီး တိုက်နေတာထင်တယ်။” ဟု ၎င်း အင်းလေးဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
အလားတူ မိုးဗြဲနှင့် ဖယ်ခုံဘက်တွင် လည်း စစ်ကောင်စီနှင့် KNDFတို့ တိုက်ပွဲ ပြင်းထန်နေပြီး လွိုင်ကော် အမြောက်တပ်နှင့် လွိုင်လင်လေး ခြေမြန်တပ်ရင်း (ခမရ- ၅၃၀) တပ်တို့က စစ်ကောင်စီကို လာကူညီနေပြီး လက်နက်ကြီး ၊လေကြောင်းတို့ဖြင့် တိုက်ခိုက်နေကြောင်း မိုးဗြဲ စစ်ဘေးရှောင် အမျိုးသမီး တစ်ဉီးက သျှမ်းသံတော်ဆင့် ကပြောသည်။
“မိုးဗြဲတို့ ဖယ်ခုံတို့က တိုက်ပွဲ ပြင်းထန်နေတာ တစ်လလောက်ရှိပြီ။ လက်နက်သံတွေလည်း အမြဲတမ်းကြားနေရတယ်။ မိုးဗြဲတို့ အနီးတဝိုက်က ရွာတွေလည်း စစ်ရှောင်နေရတယ်။ ပိုက်ဆံရှိတဲ့ သူတွေက တခြားမြို့တွေ သွားရှောင်ကြတယ်။ တစ်ချို့ကျတော့လည်း တောထဲတွေမှာ ရှောင်ကြတယ်။”ဟု ၎င်းကဆိုသည်။
ထို့အပြင် ယခုကဲ့သို့ သျှမ်း-ကရင်နီ နယ်စပ်ကို ထိုးစစ်ဆင်တိုက်ခိုက်နေသည်မှာ စစ်ကောင်စီဘက်မှ မိုးဗြဲမြို့ကို ပြန်လည် ထိန်းချုပ်ရန် ကြိုးပမ်းနေသောကြောင့် တိုက်ပွဲတွေ ပြင်းထန်လာနေခြင်း ဖြစ်သည်ဟု ၎င်းစစ်ဘေးရှောင် အမျိုးသမီးက ဆက်လက်ပြောသည်။
ပြီးခဲ့သည့် ဖေဖော်ဝါရီလ (၁၃)ရက်နေ့တွင် စစ်ကောင်စီက ဖယ်ခုံအနောက်ဖက် ကမ်းမှနေ၍ လက်နက်ကြီးဖြင့် ပစ်ခတ်သောကြောင့် ညောင်ရွှေမြို့နယ် တောင်ပို့ကွဲရွာအတွင်း ကျရောက်ပေါက်ကွဲခဲ့ပြီး အသက်(၃၀)ကျော် အမျိုးသားတစ်ဦး ထိခိုက်ဒဏ်ရာ ရရှိခဲ့သည်။
ယခုလက်ရှိ ညောင်ရွှေမြို့နယ်တွင် ကျေးရွာ (၁၀)ရွာခန့် ထွက်ပြေးတိမ်းရှောင်နေရပြီး စစ်ရှောင် (၃ထောင်)ကျော် ဘေးလွတ်ရာသို့ ရွှေ့ပြောင်း နေထိုင်နေရသည်။
Leave a Comments