သျှမ်းပြည် လားရှိုးမြို့နယ်တွင် လောင်းကစားဝိုင်းများ ပြန်လည်ဖွင့်လှစ်မှု များပြားလာသည့်နောက် ခိုးဆိုးလုယက်မှု များနေသဖြင့် ဒေသခံများအတွက် လုံခြုံရေး စိုးရိမ်နေရကြောင်း စုံစမ်းသိရသည်။

ကိုးကန့်တပ်ဖွဲ့ (MNDAA) ထိန်းချုပ်ထားသည့် လားရှိုးမြို့နယ်တွင် ပြီးခဲ့သည့် ဇန်နဝါရီလ ၂၈ ရက်မှ စတင်၍ တရုတ်နှစ်သစ်ကူး အ‌ကြောင်းပြကာ မြို့ပေါ်ရပ်ကွက်အတွင်းနှင့် နမ့်အွန်ကျေးရွာတို့တွင် လောင်းကစားဝိုင်းများကို ဖေဖော်ဝါရီ လကုန်ပိုင်းအထိ ဖွင့်လှစ်သွားမည်ဖြစ်ကြောင်း သိရသည်။

ထိုသို့ လောင်းကစားဝိုင်းများ ပေါများလာသည့်အပြင် ခိုးဆိုးလုယက်မှုများလည်း ရှိလာခြင်းကြောင့် ဒေသခံများ လုံခြုံရေးအတွက် စိုးရိမ်မှုများရှိလာကြောင်း အသက် ၄၀ ဝန်းကျင်ဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။

“မောဝ်စတားမှာဆို လောင်းကစားဝိုင်းက တစ်လလောက် ဖွင့်မယ်လို့ ပြောတယ်။ သူတို့ဖွင့်လာတာက‌တော့ နှစ်သစ်ကူးကတည်းကပဲ။ လောင်းကစားဝိုင်းတွေ များလာတော့ သူခိုးတွေ၊ လုယက်မှုတွေ၊ ဆိုင်ကယ်ခိုးတာတွေ၊ ဓားနဲ့ လိုက်ခုတ်တဲ့အထိ ရှိတယ်။ တိုက်ပွဲတွေဖြစ်ပြီး ပြည်သူတွေ ဒုက္ခရောက်နေတာတောင် ပြန်လည်ထူထောင်ဖို့ မကူညီတဲ့အပြင် သူတို့အကျိုးစီးပွား အတွက်ပဲ လုပ်နေတာ”ဟု ၎င်းဒေသခံအမျိုးသမီးက ပြောဆိုသည်။

လားရှိုးမြို့တွင် ဂုံးဂင်းဝိုင်း၊ ရှမ်းကိုးမီး ဖဲဝိုင်း၊ ငါးပစ်ဝိုင်း စသည့် လောင်းကစားဝိုင်း အမျိုးမျိုးကို ဖွင့်လှစ်ထားပြီး၊ ထိုလောင်းကစားဖွင့်လှစ်ထားသော ဒိုင်များသည် ကိုးကန့်တပ်ဖွဲ့ MNDAA ထံ အခွန်ပေးဆောင်ရကြောင်း အသက် ၄၀ ဝန်းကျင်ဒေသခံ အမျိုးသမီးက ဆက်ပြောသည်။

“လောင်းကစားဝိုင်းတွေကတော့ အမျိုးမျိုးပါ။ ဒိုင်အသေးတွေကအစ တစ်ဝိုင်းကို ၁၀ သိန်း၊ အဲ့တာက ၁ ညစာ‌အတွက်ပဲ။ ပြီးတော့ လောင်းကစားဝိုင်းမှာ အလုပ်လုပ်တဲ့ လူတွေကလည်း တစ်ညကို တစ်သိန်းရတယ်။ တချို့ လောင်းကစားဒိုင်တွေက တစ်လစာကို သိန်း ၂၀၀ လောက် ပေးထားရတယ်”ဟု အသက် ၄၀ ဝန်းကျင် ဒေသခံ အမျိုးသမီးက ပြောသည်။

အလားတူ သိန္နီမြို့တွင်လည်း တရုတ်နှစ်သစ်ကူးမှ စတင်၍ ကိုးကန့်တပ်ဖွဲ့ MNDAA မှ လောင်းကစားဝိုင်းများ ဖွင့်လှစ်ရန် ခွင့်ပြုထားပြီး သိန္နီမြို့လယ်နှင့် မိုင်းပါးကျေးရွာ၊ စယ်အူကျေးရွာ၊ ပန်လော့ကျေးရွာ၊ နမ့်စလပ်ကျေးရွာ စသည့်ကျေးရွာများတွင် ဖွင့်လှစ်ထားကြောင်း ဒေသခံများက ပြောသည်။

“သိန္နီမှာလည်း လားရှိုးလိုပါပဲ၊ လောင်းကစား အမျိုးမျိုးရှိတယ်။ သူတို့ကတော့ တစ်ဝိုင်းကို လောင်းကစားလုပ်တဲ့ ဒိုင်တွေက ၆ သိန်း ကိုးကန့်တပ်ဆီ အခွန်ဆောင်ရတယ် တစ်လ စာပေါ့။ သူတို့ သိန္နီမှာတော့ တစ်နှစ်လုံး ဖွင့်သွားမယ်လို့တော့ ပြောတယ်”ဟု ၎င်းသိန္နီဒေသခံက ပြောသည်။

အဆိုပါ လောင်းကစားဝိုင်းများသည် လားရှိုးမြို့၊ သိန္နီမြို့တွင်းတွင် ပေါ်ပေါ်ထင်ထင် ပြုလုပ်နေပြီး MNDAA ထံ အခွန်ပေးဆောင်ကာ ဖွင့်လှစ်ထားပြီး၊ လက်ရှိ MNDAA ထိန်းချုပ်ထားသော ဒေသများတွင် လောင်းကစားဝိုင်းများအပြင် KTV နှင့် မာဆက် အနှိပ်ဆိုင်များ ပိုမိုပေါများလာကြောင်း ဒေသခံများက ပြောသည်။