သျှမ်းပြည်တောင်ပိုင်း၊ တောင်ကြီးမြို့တွင် စက်သုံးဆီဈေး မြင့်တက်နေပြီး စက်သုံးဆီများကို အလုအယက် ဝယ်ယူမှုများရှိနေသည်ဟု စုံစမ်းသိရှိရသည်။
ပြီးခဲ့သည့် (ဖေဖော်ဝါရီလ ၅ ရက်) နေ့ နံနက်အစောပိုင်းမှ စတင်ပြီး အွန်လိုင်းကျားဖြန့်ကိစ္စကြောင့် ထိုင်းနိုင်ငံမှ မြန်မာဘက်သို့ တင်ပို့ရောင်းချနေသည့် လျှပ်စစ်မီး၊ ဖုန်းအင်တာနက်လိုင်း နှင့် စက်သုံးဆီများကို မြန်မာနယ်စပ်တကြော တာချီလိတ်မြို့၊ မြဝတီမြို့ နှင့် ဘုရားသုံးဆူမြို့ တို့ကို စတင် ဖြတ်တောက်လိုက်သည်။
ထိုကြောင့် တာချီလိတ်မြို့ဘက် ဆီများပြတ်တောက်နေသောကြောင့် တောင်ကြီးမြို့ပေါ်တွင်လည်း စက်သုံးဆီများပြတ်လပ်လာမည်ကို စိုးရိမ်စိတ်ကြောင့် အလုယက်ဝယ်ယူနေကြကာ စက်သုံးဆီဈေးနူန်းများလည်း တက်လာသည်ဟု မြို့ခံတစ်ဦးက သျှမ်းသံတော်ဆင့်ကို ပြောသည်။
“သတင်းတွေကို သေချာဖတ်စေချင်တယ်။ မြဝတီတို့ တာချီလိတ်တို့ဖက်က မီးတွေ ဆီတွေဖြတ်တာက ကျားဖြန့်ကြောင့်ဖြတ်တာ။ဒီဖက်က ဘာဆိုင်လို့ ဆီပြတ်ရမှာတုန်း။သူတို့တွေလုပ်တာနဲ့ ဒီကလည်း အပြေးအလွှားဝယ်တော့ ဆီဈေးက တက်သွားရော။” ဟု အဆိုပါ မြို့ခံ တစ်ဦးက ပြောသည်။
ယခင်က ဆိုင်ကယ်ဆီဖြည့်ရာတွင် ငွေ ကျပ်(၈၀၀၀)ဆိုလျှင် ဆီအပြည့် ရရှိသော်လည်း ယခုတွင် ငွေကျပ်(၁၀၀၀၀) မှ ဆီအပြည့်ရကြောင်း ၎င်းအမျိုးသားက ပြောသည်။
ဖေဖော်ဝါရီလ (၅)ရက် မတိုင်မီက တောင်ကြီးတွင် စက်သုံးဆီဈေးမှာ 92 တစ်လီတာကို ၃၂၅၅ကျပ် ရှိပြီး ယခုကာလတွင် 92 တစ်လီတာကို ၃၂၈၀ မျှ ဈေးတက်နေသည်ဟု သိရသည်။
စက်သုံးဆီဈေးမှာ ယခုရက်ပိုင်းအတွင်း မတည်မငြိမ်ဖြစ်နေပြီး ညနေပိုင်းအလုပ်ဆင်းချိန်နှင့် ပိတ်ရက်များတွင် တန်းစီဝယ်ယူနေရဆဲ ဖြစ်သည်ဟု မြို့ခံများ ထံမှသိရသည်။
“ဈေးမငြိမ်တာက လူတွေက စိုးရိမ်စိတ်နဲ့ လာလာဝယ်ကြတယ်။တစ်ခါငြိမ်သွားတယ်။ အဲဒါနဲ့ ဆီဆိုင်တွေကလည်း သူတို့အမြတ်စားတာပေါ့။ နိုင်ငံရေးမကောင်းတာကို အခွင့်ကောင်းယူပြီး လုပ်စားနေတာ။” ဟု တောင်ကြီး မြို့ခံ အမျိုးသားတစ်ဦးက ပြောသည်။
မြန်မာနိုင်ငံရှိ စက်သုံးဆီ သုံးစွဲမှု ပမာဏ၏ ၉၀ ရာခိုင်နူန်းကျော်မှာ စင်္ကာပူနိုင်ငံမှ အဓိက တင်သွင်း သိုလှောင် ဖြန့်ဖြူးပေးနေပြီး တစ်လလျှင် ပျမ်းမျှ ၅.၀ မက်ထရစ် တန်သန်းဝန်းကျင် တင်သွင်းဖြန်ဖြူးနေသည်ဟု စက်သုံးဆီ သိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီက ၂၀၂၃ ခုနှစ်တွင် ပြောထားသည်။
ဆက်လက်ပြီး စက်သုံးဆီများအား လိုင်စင်မဲ့ သယ်ယူပို့ဆောင်ခြင်း၊ သိုလှောင်ခြင်း၊ ရောင်းချခြင်းများ ပြုလုပ်ပါက ဒဏ်ငွေကျပ်သိန်း (၅၀) အထိဖြစ်စေ၊ တစ်နှစ်ထက်မပိုသော ထောင်ဒဏ်ဖြစ်စေ ပြစ်ဒဏ်နှစ်ရပ်လုံး ဖြစ်စေ စီရင်ချက် ချမှတ်နိုင်သည့် ဥပဒေ ပြဌာန်းထားသည်။
အလုပ်သင် သတင်းထောက် နန်းခမ်းကူ ရေးသားသည်။
Leave a Comments