သျှမ်းပြည်တောင်ပိုင်း၊ ဆီဆိုင်မြို့နယ် တောင်ရှေ့ကျေးရွာ အုပ်စုကို စစ်ကောင်စီနှင့် ပအိုဝ်းပြည်သူ့စစ် (PNO)တို့က ဆီဆိုင်မြို့အတွင်း ဈေးလာသုံးခွင့် ပိတ်ပင်လိုက်ကြောင်း ဒေသခံများထံမှ သိရသည်။

စစ်ကောင်စီ၊ PNOနှင့် PNLA တော်လှန်ရေးတပ်ပေါင်းစုတို့ တိုက်ပွဲ ဖြစ်ပွားရာ အနီးတဝိုက် တွင်ရှိသည့် တောင်ရှေ့ကျေးရွာအုပ်စုသည် ဆီဆိုင်မြို့နှင့် နာရီဝက်မျှသာ သွားလာရပြီး စားသုံးကုန်စည်များကို ဆီဆိုင်မြို့ဈေးတွင် ဝယ်ယူအားထားအသုံးပြုနေရသည့် ဒေသဖြစ်သည်။

ပြီးခဲ့သည့် (၂၀၂၄ ခုနှစ်) ဒီဇင်ဘာ လ အစောပိုင်း ကာလမှစပြီး စစ်ကောင်စီနှင့် PNOတို့က တောင်ရှေ့ကျေးရွာအုပ်စု ဒေသခံများကို ဆီဆိုင်တွင် ဈေး လာရောက်ဝယ်ယူခွင့် တားမြစ်ခဲ့သည်။

ထိုဒေသက ပြည်သူများသည် ဆီဆိုင်မြို့အတွင်း ဝင်ထွက်လျှင် စစ်ကောင်းနှင့် PNO က စစ်ဆေးမှုတင်းကြပ်ပြီး ဝယ်ယူထားသည့် စားသုံးကုန်များကိုလည်း သိမ်းဆည်း ထားကြောင်း ဒေသခံ အမျိုးသမီး တစ်ဦးက ပြောသည်။

“သူတို့ ဘာလို့ ဒီလိုလုပ်လိုက်လဲ ဆိုတာကတော့ ပြည်သူတွေကို သံသယရှိလို့ထင်တယ်။ အဲဘက်ရွာက တော်လှန်ရေး တပ်သားတွေ ၊PDFတွေ PNLAတို့ နေတဲ့ နေရာနဲ့ နီးတယ်။ သူတို့ကို PNOနဲ့ စစ်ကောင်စီက PDFတွေ အတွက် ဈေးဝယ်ပေးနေတယ် အထင်နဲ့ တားမြစ်တာဖြစ်မယ်။ ပြီးရင် ဒေသခံဆိုပြီး ဆီဆိုင်မြို့ထဲ အဝင်အထွက် လုပ်နေတဲ့ PDFတွေလည်း ရှိတော့ အခုလို ပိတ်လိုက်တာ ဖြစ်မယ်။” ဟု အဆိုပါ အမျိုးသမီးက သျှမ်းသံတော်ဆင့်ကို ပြောသည်။

အဆိုပါ တောင်ရှေ့ ကျေးရွာအုပ်စုသည့် ရေရှားပါးသည့် ဒေသဖြစ်ပြီး ဆီဆိုင်မြို့တွင် စားသုံးကုန်များ ဝယ်ယူခွင့် ပိတ်ထားသောကြောင့် ယခင်က စုဆောင်းထားသည့် သီးနှံများကိုသာ အမှီပြု စားသောက်နေကြရသည်ဟု ဆိုသည်။

ထို့အပြင် ပြီးခဲ့သည့် (ဇန်နဝါရီလ ပထမ ပတ်) တွင် စစ်ကောင်စီမှ နောင်ထောဝ် ကျေးရွာဖက်ကို လေကြောင်းဖြင့် ဗုံးကြဲတိုက်ခိုက်ခဲ့ပြီး အနီးနားရှိ လွယ်တဖြီးတောင်တွင် တည်ထားသည့် ဘုရားဆင်းတုတော်ကို ထိမှန်ခဲ့ပြီး ယခုကာလတွင် ပြုပြင်မှုများလုပ်ဆောင်နေသည်ဟု ဒေသခံများက ပြောသည်။

ထိုကဲ့သို့ ပြုပြင်မှုများ ပြုလုပ်နေခြင်းကြောင့် တောင်ရှေ့ကျေးရွာအုပ်စုကို ဈေးသုံးခွင့် ယာယီပြန်လည်ခွင့် ပြုထားသော်လည်း ဆီဆိုင်ဈေးတွင် လာရောက်ဝယ်ယူသူ နည်းပါးနေသည်ဟု မြို့ခံ တစ်ဦးက ပြောသည်။

“အခုရက်ပိုင်းမှ တောင်ရှေ့က လူတွေကို ဈေးဝယ်ခွင့်ပေးတာ။အဲဒါတောင် လွယ်တဖြီးမှာ ဘုရားတည်နေလို့ဈေးဝယ်လို့ ရတာ ။ဘုရားပြန်လည် ပြုပြင်နေတဲ့ တောင်ကိုသွားဖို့ တောင်ရှေ့ကျေးရွာအုပ်စုကို ဖြတ်ပြီးမှ သွားရတော့ ခွင့်ပြုထားတာ။ ဒါပေမဲ့ ဈေးလာတဲ့သူ သိပ်မရှိဘူး အစစ်ဆေးကလည်း ကြမ်းတယ်လေ။” ဟု ၎င်း မြို့ခံ တစ်ဦးက သျှမ်းသံတော်ဆင့်ကို ပြောသည်။

ယခုလက်ရှိ ဆီဆိုင်မြို့တွင် တိုက်ပွဲဖြစ်ပွားခြင်း မရှိဘဲ လက်နက်ကြီးဖြင့် ပစ်ခတ်ခြင်း ဒရုန်းဖြင့် ဗုံးကြဲခြင်းများ လုပ်ဆောင်နေပြီး ဒေသခံများ ကြောက်လန့်နေကြရသည်ဟု သိရသည်။

ပြီးခဲ့သည့် (ဖေဖော်ဝါရီလ ၆ ရက်)တွင် စစ်ကောင်စီမှ ဒရုန်းဖြင့် ဗုံးကြဲတိုက်ခိုက်သောကြောင့် ကောင်ထိုကျေးရွာမှ စပါးသယ်ပြီး ပြန်လာသည့် လင်မယားနှစ်ဦးနေရာတွင် ပွဲချင်းပြီး သေဆုံးသွားခဲ့သည်။

အလုပ်သင် သတင်းထောက် နန်းခမ်းကူ ရေးသားသည်။