သျှမ်းပြည်တောင်ပိုင်း ရပ်စောက်မြို့နယ် ကျောက်ဂူဒေသတွင် စစ်ကောင်စီနှင့် ဓနုအမျိုးသားလွတ်မြောက်ရေး တပ်ဦး (DPLF)တပ်ဖွဲ့ဝင် တိုက်ပွဲ ဆက်လက်ပြင်းထန်နေကြောင်း စုံစမ်းသိရသည်။

ကျောက်ဂူဒေသတွင် ပြီးခဲ့သည့် (ဇန်နဝါရီ ၁၁ ရက်)နေ့မှ ယနေ့ (ဇန်နဝါရီ ၁၃ ရက်)နေ့အထိ စစ်ကောင်စီနှင့် ဓနုတပ် (DPLF) တို့ တိုက်ပွဲ ဆက်လက်ပြင်းထန်ပြီး ကျောက်ဂူဒေသခံ ရွာလုံးကျွတ် ထွက်ပြေးတိမ်းရှောင် နေရကြောင်း စစ်ရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။

“ပြီးခဲ့တဲ့ ၁၁ ရက်နေ့က ရွာအတွင်းထဲတော့ မရောက်သေးဘူး ရွာဘေးက ရွာတွေမှာဖြစ်တာ မနေ့က ညနေ ၂ နာရီလောက် ရွာအတွင်းထဲကို ဝင်ပြီး တိုက်ပွဲဖြစ်တာ။ ကျနော်တို့လည်း ယူစရာရှိတာ မြန်မြန်ယူပြီး ရွာလုံးကျွတ်ကို ထွက်ပြေးကုန်ကြတယ်။ ပြန်လည်းမပြန်ရဲဘူး။ တောင်ယာတွေထဲ ပြေးနေနေတာတောင် လက်နက်သံတွေ ကြားနေရတုန်း”ဟု ၎င်းက ပြောသည်။

စစ်ကောင်စီတပ်သည် ကျောက်ဂူအနီးတဝိုက် ပယင်းကျေးရွာ၊ ထမင်းပေါင်းကျေးရွာနှင့်နောင်ဝိုးကျေးရွာ စသည့် ကျေးရွာငယ်များတွင် နေ့စဉ်လက်နက်ကြီးဖြင့် ပစ်ခတ်မှု ပြုလုပ်နေကြောင်း ဒေသအားလုံးနီးပါး ထပ်မံတိမ်းရှောင်နေရကြောင်း နောင်ဝိုးဒေသခံအမျိုးသမီးတစ်ဦးက ပြောသည်။

စစ်ကောင်စီတပ်သည် ကျေးရွာဒေသများတွင် လေ‌ကြောင်းဖြင့် နေ့စဉ်ဗုံးကြဲတိုက်ခိုက်နေပြီး စစ်အင်အားထပ်မံဖြည့်တင်းနေကြောင်း ၎င်းက ဆက်ပြောသည်။

“လွန်ခဲတဲ့ ၂ ရက်ကတော့ ညနေလောက်ပစ်ကြတယ်။ အခုတော့ တချို့ရွာတွေထဲဝင်ပြီး တိုက်တာတွေရှိတယ်။ လက်နက်ကြီးနဲ့ ပစ်ခတ်တာတွေလည်း လုပ်တယ်။ ပြီးခဲ့တဲ့ ၁၀ ရက်နေ့ကလည်း ကျောက်ဂူက ဘုန်းကြီးကျောင်းထိ သွားတယ်။ ထိခိုက် သေဆုံးတဲ့သူလည်း ရှိတယ်။ အဲဘက်က တော်တော်ဆိုးနေတယ်ခု။ ကျောက်ဂူကနေ နောင်ဝိုးထိ ထွက်ပြေးလာတဲ့သူတွေလည်း ရှိတယ်။ ဈေးထဲမှာနေဖို့ နေရာတွေ ချပေးထာတာရှိတယ်”ဟု ၎င်းက ပြောသည်။

လက်ရှိ ကျောက်ဂူတိုက်ပွဲအခြေနေမှတစ်ဆင့် ရပ်စောက်မြို့တွင်း စစ်မီးကူးလာနိုင်ခြေရှိနေကြောင်း DPLF/DPLA ဥက္ကဌ ကိုထွန်းထွန်းနိုင်က သျှမ်းသံတော်ဆင့်ကို ပြောသည်။

“ရပ်စောက်မြို့တွင်းထဲမှာ ဘယ်ချိန်လိုတော့ ပြောလို့မရပေမယ့် တိုက်ပွဲက ကျိန်သေဖြစ်လာနိုင်တယ်။ မတိုက်လို့လည်း အပြီးဘူးဆိုတော့။ ကျနော်တို့က မတိုက်ဘူးလို့ ပြောအုံးလည်း မထူးပါဘူး။ တိုက်မယ်လို့ သိနေပြီးသား အခြေနေပါ”ဟု ၎င်းက ပြောသည်။

သျှမ်းတောင်နှင့် မြောက် ဆက်သွယ်ရာ အချက်အချာကျသည့် ကျောက်ဂူဒေသမှ နောင်ချိုမြို့နယ် တောင်ခမ်းဒေသသို့ စစ်ကောင်စီတပ် စစ်ကူများ ပေးပို့နေရာ ဓနုတပ် (DPLF) က ဆက်တိုက် ဖြတ်တောက် တိုက်ခိုက်ရာက ပြီးခဲ့သည့် ဒီဇင်ဘာလ အတွင်းက တိုက်ပွဲများ ဖြစ်ပွားလာခြင်း ဖြစ်သည်။

ကျောက်ဂူဒေသတွင် ပြီးခဲ့သည့် (ဒီဇင်ဘာလ ၁၈ ရက်)နေ့နံနက်ပိုင်းမှ စတင်၍ ယနေ့ (ဇန်နဝါရီ ၁၃ ရက်)နေ့အထိ တိုက်ပွဲပြင်းထန်ခဲ့ရာ စစ်ကောင်စီ လေကြောင်း ဗုံးကြဲမှုကြောင်း ပြည်သူ ထိခိုက် သေဆုံးမှုရှိပြီး ကျောက်ဂူအဝင် တံတား ပျက်စီးသွားကြောင်း သိရသည်။

ကျောက်ဂူဒေသတွင် ပြီးခဲ့သည့် ဆယ်စုနှစ်များစွာ ကတည်းက တော်လှန်ရေးတပ်များ လှုပ်ရှားခဲ့ရာ လက်ရှိ သျှမ်းတပ် နှစ်ခုဖြစ်သည့် RCSS နှင့် SSPP တို့လည်း လှုပ်ရှားနေပြီး မကြာခဏ တိုက်ပွဲများ ဖြစ်ပွားလေ့ရှိသည်။

စစ်ကောင်စီ၏ ဗထူးတပ်မြို့နှင့် မိုင်အနည်းငယ်သာ ကွာဝေးသည့် ကျောက်ဂူဒေသရှိ ရဲစခန်းနှင့် ကျောက်ဂူ အမြောက်တပ် (အမတ၃၄၉) ကို ပြီးခဲ့သည့် ဇန်နဝါရီလ ၄ ရက်နေ့တွင် တိုက်ခိုက်ခဲ့ပြီး၊ ဇန်နဝါရီလ ၅ ရက်နေ့တွင် တောင်ထိပ်ရွာနှင့် အင်တောမြို့ကြား တိုက်ပွဲများ ဖြစ်ပွားခဲ့ရာ ဒရုန်း တစီး သိမ်းပိုက်ရရှိခဲ့ကြောင်း ဓနုပြည်သူ့လွတ်မြောက်ရေးတပ်ဦး (DPLF) က ထုတ်ပြန်ထားသည်။

အလုပ်သင် သတင်းထောက် နန်းဆိုင်ခမ်းရေးသားသည်။