ကရင်နီပြည် စစ်ရှောင်များ နေထိုင်နေသည့် စစ်ရှောင်စခန်းကို စစ်ကောင်စီမှ လေယာဉ်ဖြင့် ဆက်တိုက်ဗုံးကြဲ တိုက်ခိုက်ခြင်းကြောင်း စစ်ရှောင်ဒဏ်ရာရရှိသူ ရှိသည်ဟု စုံစမ်းသိရသည်။
ယမန်နေ့ (ဇန်နဝါရီ ၁ ရက်)နေ့ ညနေပိုင်းအချိန်တွင် ဒီးမော့ဆို အနောက်ဘက်ခြမ်းရှိ ကျေးရွာကို စစ်ကောင်စီမှ လေယာဉ်ဖြင့် ဗုံးကြဲတိုက်ခိုက်မှုများ ထပ်မံပြုလုပ်နေကြောင်း စစ်ရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့ကလည်း လာကြဲသွားတယ်။ နေ့တိုင်းဆက်တိုက် လေယာဉ်နဲ့ လာကြဲတာ တချို့နေရာက ဖုန်းလိုင်းမရတော့ ဆက်သွယ်လို့ မရတဲ့နေရာလည်း ရှိတယ်။ စစ်ရှောင်စခန်းကို သူတို့ ဦးတည်ပြီး လာကြဲတယ်လို့ ပြောလို့ရတယ်။ ဒဏ်ရာရတဲ့သူလည်း ရှိတယ်”ဟု ၎င်းက ပြောသည်။
ထို့အပြင် ပြီးခဲ့သည့် (ဒီဇင်ဘာလ ၃၁ ရက်) နှစ်သစ်ကူးညတွင် လွိုင်ကော်မြို့ အရှေ့ဘက်ခြမ်းရှိ စစ်ရှောင်စခန်းကို စစ်ကောင်စီမှ လေကြောင်းတိုက်ခိုက်မှုကြောင်း ကလေး(၁)အပါအဝင် (၃) သေဆုံးသွားပြီ၊ ၁ ဦး ဒဏ်ရာရရှိနေသည်ဟု လွိုင်ကော် စစ်ရှောင် အမျိုးသမီးတစ်ဦးက ပြောသည်။
“စစ်ရှောင်တွေနေတဲ့ နေရာကိုမှ စစ်တပ်က လာကြဲတာ။ တယောက်နဲ့ဆို ၃ ယောက် ဆုံးသွားတယ်။ ပေါင် (၂၀၀) ဗုံး ၃ လုံးလောက် လာကြဲသွားသေးတယ်။ ဒဏ်ရရရှိသူတွေလည်း ရှိတယ် ခုတော့ ဆေးရုံမှာ ဆေးကုသမှုခံယူနေတယ်”ဟု ၎င်းက ပြောသည်။
လက်ရှိ စစ်ကောင်စီတပ်သည် ကယားပြည်(ကရင်နီ)နယ်စပ် တကြောရှိ စစ်ရှောင်စခန်းများကို ဆက်တိုက်ဗုံးကြဲမှု ပြုလုပ်လာခြင်းကြောင်း စစ်ရှောင်ဒေသခံများ စိုးရိမ်နေရကြောင်း ၎င်းက ဆက်ပြောသည်။
စစ်ကောင်စီတပ်မှ ယခင်လို ဗုံးကြဲတိုက်ခိုက်မှုများ ပြုလုပ်နေသည်ကို ကရင်နီ အမျိုးသားများကာကွယ်ရေးတပ် (KNDF) က ရှုတ်ချပြီး မိဘပြည်သူအနေဖြင့် လေကြောင်းရန် သတိပြုဖို့ ထုတ်ပြန်ထားသည်။
လွိုင်ကော်မြို့နှင့် မိုးဗြဲမြို့ကို ပြည်လည် ထိန်းချုပ်နိုင်ရန် စစ်ကောင်စီတပ်မှ စစ်အင်အား အလုံးအရင်းဖြင့် စစ်ကြောင်းထိုးနေကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments