သျှမ်းပြည်တောင်ပိုင်း၊ ပင်းတယမြို့နယ် မိုင်းလီ ကျေးရွာ ရှိ ဘုန်းကြီးကျောင်းတွင် စစ်ကောင်စီတပ် လာရောက်တပ်စွဲထားကြောင်း ဒေသခံများထံ စုံစမ်းသိရသည်။
ပြီးခဲ့သည့် ( ဒီဇင်ဘာလ ပထမ ပတ်) ကတည်းကစပြီး စစ်ကောင်စီ တပ် အင်အား (၁၀၀) ခန့် သည် ပင်းတယမြို့နယ် မိုင်းလီကျေးရွာရှိ ဘုန်းကြီးကျောင်းတွင် တပ်လာရောက်စွဲပြီး ပြည်သူပိုင်ကားများကို အသုံးပြုကာ တပ်သားများကို ပို့ဆောင်နေသည်ဟု ဒေသခံများက ပြောသည်။
ထို့အပြင် စစ်သားများသည် ကျေးရွာတွင်းရှိ ပြည်သူပိုင် ကြက်များကို အတင်းယူ၍ ချက်စားကြပြီး ရွာမှ ဘုန်းကြီးကျောင်းအတွက်လှူထားသည့် တစ်နှစ်စာ ဆန်များကို စစ်တပ်မှ စားသုံးနေကြသည်ဟု ဒေသခံ အမျိုးသာားတစ်ဦးက ပြောသည်။
“ ရွာက ဘုန်းကြီးကျောင်းမှာ စစ်သား (၁၀၀) လောက်ရှိမယ်ထင်တယ် ။တပ်စွဲနေတာ။ဘုန်းကြီးကျောင်းက တစ်နှစ်စာ အလှူခံထားတဲ့ ဆန်တွေကို သူတို့အကုန်ယူစားနေတာ။ ရွာထဲက ကြက်တွေကိုလည်း လာဖမ်းပြီးချက်စားကြတာ။ ကိုယ်က ကြောက်တော့ နှမြောလည်း ပေးလိုက်ရတယ်။” ဟု ၎င်းအမျိုးသားက သျှမ်းသံတော်ဆင့် ကို ပြောသည်။
မိုင်းလီ ကျေးရွာသည် ရပ်စောက်မြို့နှင့် မိုင်( ၂၀ )ခန့်သာ ကွာဝေးပြီး စစ်တပ်ဘက်မှ ရပ်စောက်သို့ စစ်အင်အားဖြည့်တင်းချိန် ရွာသားများ၏ ကားဖြင့် လိုက်လံ မောင်းပို့ ရသည်ဟု အဆိုပါ အမျိုးသားက ထပ်လောင်း ပြောသည်။
ဒေသခံများသည် စစ်ကောင်စီတပ် လာရောက်တပ်စွဲသည့် နေ့မှ စပြီး တောင်ယာသို့ စောစောသွားပြီး နေမဝင်ခင် အရောက်ပြန်ရကြောင်း အဖော်မပါဘဲ တခြားနေရာသို့ တစ်ယောက်တည်း မသွားရဲတော့ကြောင်း အမျိုးသမီး တစ်ဦးက ပြောသည်။
“အခုဆို တောင်ယာသွားလည်း အစောပြန်ရတယ်။ တစ်ယောက်ထဲ ဟိုနားဒီနား မသွားရဲဘူး။ တစ်ခုခုဆို ကြောက်နေရတယ်။ အရင်က ဂျပန်တွေ ရွာထဲ ဝင်လာသလိုပဲ။ အကုန်ကြောက်လန့်နေရတာ။” ဟု အသက် ၃၀ ဝန်းကျင်ရှိ အမျိုးသမီး တစ်ဦးက ပြောသည်။
စစ်သားတွေ ရွာထဲတွင် တပ်စွဲထားတာကြောင့် ဘုန်းကြီးကျောင်းသို့မသွားဖြစ်ကြတော့ပဲ အိမ်နှင့် တောင်ယာသာလျှင် သွားလာနေကြရသည်ဟု ၎င်းက ထပ်လောင်း ပြောသည်။
လက်ရှိ ပင်းတယ မြို့နယ်တွင် စစ်ကောင်စီ ဂိတ်များတွင် စစ်ဆေးမှုတင်းကျပ်နေပြီး စစ်ကားများ မကြာခဏ ရပ်စောက်ဖက် သွားလာ နေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments