သျှမ်းပြည်တောင်ပိုင်း နမ့်စန်မြို့နယ်တွင် စစ်မှုထမ်းရန်အတွက် မူးယစ်ဆေးသုံးစွဲသူနှင့် ဂိမ်းကစားရုံ ဂိမ်းဆော့နေသူများကို လိုက်လံဖမ်းဆီးကာ ကျိုင်းတုံစစ်သင်တန်းသို့ ပို့ဆောင်ကြော်း စုံစမ်းသိရသည်။
ပြီးခဲ့သည့် (ဒီဇင်ဘာလ ပထမပတ် )နေ့မှစပြီး ယနေ့ (ဒီဇင်ဘာလ ၂၄ ရက်)အထိ နမ့်စန်မြို့တွင် မူးယစ်ဆေးဝါးသုံးစွဲသူနှင့် ငါးဂိမ်းရုံတွင် ဂိမ်းကစားနေသူများကို တံခါးပိတ်ပြီး ဖမ်းဆီးသွားပြီး၊ ဖမ်းဆီးရမိသူ ၂၀ ဦးထက်မနည်း ရှိကြောင်း နမ့်စန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ပြောရမယ်ဆို ဒီလမှာ ဖမ်းဆီးမှုတွေ ရှိလာတယ်။ ဖမ်းမိတာ တော်တော်တော့များတယ်။ ၁၀ ယောက်တောင်မကဘူး။ ဘာလိုဆို လမ်းဘေးက ဆေးသမားတွေ၊ ငါးဂိမ်းရုံတွေမှာ ဝင်ဖမ်းတာ နည်းတာမဟုတ်ဘူး။ ဟိုနေ့က ၅ယောက်ကို ဖမ်းပြီး ပို့တယ်ဆိုတာက ဆူပူသောင်းကျန်းတာမို့ သွားပို့တယ်လို့ ပြောတယ်”ဟု ၎င်းက ပြောသည်။
ကျိုင်းတုံသို့ ပို့ခံရသည် ဒေသခံ ၅ ဦးသည် နမ့်စန်မြို့နယ် အမှတ် ၃ ရပ်ကွက်တွင် နေထိုင်သူဖြစ်ပြီး၊ ရပ်ကွက်တွင် ဆူပူသောင်းကျန်း ပြုလုပ်ခြင်းကြောင်း ရပ်ကွက် ဥက္ကဌ ဦးထွန်း၊ ထွေအုပ်စာရေးဝန်ထမ်း ဦးကျော်မိုးဝင်းနှင့် စစ်ကောင်စီ ရဲလက်အောက်ခံတို့က သွားရောက်ဖမ်းဆီးသွားကြောင်း အသက် ၄၀ ရှိ ဒေသခံ အမျိုးသမီးတစ်ဦးက ပြောသည်။
ထို့အပြင် ကျိုင်းတုံသို့ ပို့ခံရသည့် ၅ ဦးသည် စစ်သင်တန်း အပတ်စဉ်(၈) ဖြစ်ပြီး၊ နမ့်စန်မြို့တွင် ဖမ်းဆီးမှုပိုမိုတင်းကြပ်လာခြင်းကြောင်း လူငယ်အများစုသည် ပြင်ပသို့ ထွက်ခွာသူနှင့် နမ့်စန်ပြည်သူစစ်ထဲတွင်လည်း အများဆုံးရောက်ရှိနေသည်ဟု ၎င်းက ဆက်ပြောသည်။
“အခုလိုဖမ်းသွားတာက တိုင်တဲ့သူရှိလို့ လာဖမ်းသွားတာ။ ဒီတိုင်းပဲ ဆူညံရုံလောက်ပဲဖြစ်ကြတယ်။ အရင်ကတည်းက လူငယ်တော်တော်များများက ပြည်သူစစ်ထဲကို ဝင်ကြတာ။ တချိ့လည်း ပြင်ပထွက်ကြတယ်။ ပြည်သူစစ်ထဲဝင်ရင် စစ်မှုမထမ်းရဘူးလည်း ပြောသေးတယ် ဖမ်းတာလည်း သူတို့ပဲ။ ညဘက်ကို ပိုဖမ်းတော့ အပြင်တောင် သိပ်မထွက်ရဲကြတော့ဘူး”ဟု ၎င်းက ပြောသည်။
လက်ရှိ နမ့်စန်မြို့ရှိ ဒေသခံများသည် ညအချိန် အပြင်ထွက်ရန် ပိုမို စိုးရိမ်နေရ ကြောင်း သိရသည်။
ပြီးခဲ့သည့် ဖေဖော်ဝါရီလ ၁၀ ရက်တွင် စစ်ကောင်စီတပ်က ပြည်သူ့စစ်မှုထမ်းဥပဒေကို အတင်းအကြပ် ပြဋ္ဌာန်းလိုက်ပြီးနောက်ပိုင်း နမ့်စန်မြို့နယ်အတွင်း စစ်ကောင်စီတပ်ထံ စစ်မှုမထမ်းလိုသည့် လူငယ်များသည် ဒေသခံပြည်သူ့စစ်အဖွဲ့များထံ ဝင်ရောက်မှုများ ရှိလာကြောင်း နမ့်စန်မြို့နယ် ဒေသခံများက ပြောသည်။
နမ့်စန်မြို့နယ်တွင် စစ်ကောင်စီ လက်အောက်ခံ SSS (မဟာဂျာ) ပြည်သူ့စစ်၊ မက်ကျန်း ပြည်သူ့စစ် နှင့် နားရိုင်းပြည်သူ့စစ် အဖွဲ့များလည်း လှုပ်ရှားနေပြီး နမ့်စန်လေတပ်စခန်းနှင့် စစ်ကောင်စီတပ်၏ အရှေ့အလယ်ပိုင်း တိုင်းစစ်ဌာနချုပ် (ရလခ) လည်း ခိုလမ်မြို့တွင် အခြေစိုက်ထားသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments