တရုတ်- မြန်မာနယ်စပ်ရှိ မူဆယ်မြို့တွင် တရုတ်အာဏာပိုင်၏ ဖိအားပေးမှုကြောင့် စစ်ကောင်စီနှင် ရဲလက်အောက်ခံတပ်သည် ကျားဖြန့်လုပ်ငန်းလုပ်ကိုင်သူကို လိုက်လံ ဖမ်းဆီးနေစဉ် ပြည်သူစစ်နှင့် အပြန်အလှန် ပစ်ခတ်မှု ဖြစ်ပွားကြောင်း စုံစမ်းသိရသည်။

ယမန်နေ့ (ဒီဇင်ဘာလ ၁၆ ရက်) နေ့လည် ၃နာရီဝန်းကျင်တွင် ဟိုနားရပ်ကွက် နယ်မြေ(၂) ၊ စိန်စီဟိုတယ် နှင့် ၉၇ ဆပ်ပြာ ကုမ္ပဏီ အနီးတဝိုက်ရှိ ကျားဖြန်လုပ်ငန်း လုပ်ကိုင်သူကို ဖမ်းဆီးရမိကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ တရုတ် အာဏာပိုင်များသည် ကျားဖြန့်လုပ်ငန်း ဦးဆောင်နေသည့် သူ‌ဌေး ၄ ဦးကို ဖမ်းဆီးရန် ဖိအားပေးလာခြင်းကြောင့် ယခင်ကဲ့သို့ ရှောင်တခင် ဝင်ရောက်ဖမ်းဆီးနေရကြောင်း မျက်မြင်တွေ့ရှိသူ အမျိုးသားတစ်ဦးက ပြောသည်။

“တရုတ်အာဏာပိုင်တွေက စစ်တပ်ကို ဖိအားပေးပြီး ကျားဖြန့် သူဌေး ၄ ဦးကို ဖမ်းခိုင်းတယ်။ သူတို့လည်း လာဖမ်းမှာကို အကြောင်းကြားတာမျိုးမရှိဘဲ ဝင်လာတော့ ပစ်ခတ်မှုတွေဖြစ်တယ်။ သိရသလောက်က ဟိုနား နယ်မြေ(၂)၊ စိန်စီဟိုတယ်၊ ပန်လုံတဝိုက်နဲ့ ဘုံကျောင်းတဝိုက်တွေမှာ တော်တော်ဖမ်းရတယ်။ အဲ့နောကမှာ ပစ်ခတ်မှုတွေ ဖြစ်ပွားပြီး ထိခိုက်ဒဏ်ရာ ရရှိသူလည်း ရှိတယ်”ဟု ၎င်းက ပြောသည်။

ကျားဖြန့် လုပ်ကိုင်သည့်နေရာ ကို စစ်ကောင်စီဘက်မှ လာရောက်ဖမ်းဆီးမည်ကို အသိပေးခြင်းမရှိခြင်း။ ရှောင်တခင်ဝင်ရောက်လာသူများနှင့် ကျားဖြန့်လုပ်ငန်းလုပ်ကိုင်သူ၏ လုံခြုံရေးကို တာဝန်ယူထားသည့် ပြည်သူစစ်များက အချင်းချင်းပစ်ခတ်မှုဖြစ်ပွားကာ ထိခိုက်သည့်အထိရှိကြောင်း သိရသည်။

“ တကယ်တော့ ကျားဖြန့် လုံခြုံရေး ယူတာလည်း စစ်ကောင်စီရဲ့လက်အောက်ခံ ပြည်သူ့စစ်ပဲလေ။ သူတို့ အချင်းချင်းက မသိကြတာမဟုတ်ဘူးထင်တယ်။ ဟန်ရေးပြ ပစ်ရင်းနဲ့ ထိခိုက်တာလည်းဖြစ်နိုင်တယ်။ ကျားဖြန့် ကရတဲ့ငွေတွေ ခွဲဝေ ခွဲစားတွေပဲလေ” ဟု မူဆယ်ဒေသခံအသက် (၅၀)အရွယ်ရှိ အမျိုးသားတစ်ဉီးက ပြောသည်။

ပြီးခဲ့သည့် (စက်တင်ဘာလ ၂၃ )ရက်တွင်လည်း တရုတ်အာဏာပိုင်၏ ဖိအားကြောင့် စစ်ကောင်စီသည် မူဆယ်မြို့နယ်တွင် ကျားဖြန့် (၆၀၀)ဝန်းကျင် ဖမ်းဆီးခဲ့ရာ ထိုထဲမှ(၃၀၀)ကျော်တွင်မြန်မာနိုင်ငံသားများဖြစ်ကြောင်းသိရသည်။

ထိုမြန်မာနိုင်ငံသား ကျားဖြန့်လုပ်ကိုင်သူများကိုလည်း စစ်ကောင်စီတပ်ဖွဲ့က ပိုက်ဆံဖြင့်ပြန်လည်ရွေးခိုင်းပြီး လွှတ်ပေးခဲ့ကြောင်းလည်း အကြောင်းသိရှိသည့် မူဆယ်ဒေသခံအမျိုးသားက ဆိုသည်။

“ အခုဖမ်းခံရတဲ့သူတွေလည်း ပိုက်ဆံနဲ့ပြန်လွှတ်ပေးမှာပဲ။ ကျနော် ဘယ်မိတဲ့ဦးရေတော့ အတိအကျမသိရသေးဘူး။ တော်တော်တော့များတယ်” ဟု ၎င်းက ဆက်ပြောသည်။

လက်ရှိ သျှမ်းမြောက်လူငယ် အများစုသည် ကျားဖြန့်လုပ်ငန်းကိုသာ အဓိက လုပ်ကိုင်လှုပ်ရှာနေပြီး အွန်လိုင်း ငွေလိမ်လည်မှုများ ဆက်လက်ရှိနေသေးကြောင်း သိရသည်။

သျှမ်းပြည်မြောက်ပိုင်းအတွင်း ညီနောင်မဟာမိတ် တပ်ဖွဲ့တွေဟာ ကျားဖြန့် တိုက်ဖျက်ရေး၊ အွန်လိုင်း ငွေလိမ်လည်မှုကိစ္စ ပပျောက်ရေးဆိုသည့် ခေါင်းစဉ်ဖြင့် ၂၀၂၃ ခုနှစ် အောက်တိုဘာ ၂၇ ရက် တွင် “၁၀၂၇ စစ်ဆင်ရေး” ဟုဆိုပြီး စစ်ရေးပဋိပက္ခ ဖြစ်ပွားလာခဲ့သော်လည်း ကျားဖြန့် လုပ်ငန်းကြီးသည့် ပပျောက်သွားခြင်းမရှိဘဲဆက်လက်ပြန့်နေသည်။

အလုပ်သင် သတင်းထောက် နန်းဆိုင်ခမ်း ရေးသားသည်။