သျှမ်းပြည်မြောက်ပိုင်း ကွတ်ခိုင်မြို့နှင့် အခြားမြို့နယ်အများစု မြေငလျင် (၇)ကြိမ် လှုပ်ခတ်မှုကြောင့် ပြည်သူများထိတ်လန့်ခဲ့ရကြောင်း စုံစမ်းသိရသည်။
ယနေ့( ဒီဇင်ဘာလ ၉) ရက် နံနက် (၃)နာရီခန့်တွင် ကွတ်ခိုင်မြို့၊ သိန္နီမြို့၊ လားရှိုးမြို့ အရှေ့မြောက်ဘက်တွင် ငလျင် (၇)ကြိမ်တိတိ လှုပ်ခတ်သွားခဲ့သည်ဟု ဒေသခံများက ပြောသည်။
ထိုကဲ့သို့ ငလျင်လှုပ်ခတ်မှုသည် အင်အားမပြင်းထန်သော်လည်း သျှမ်းမြောက်ဒေသခံများအတွက် ထိတ်လန့်စေခဲ့ပြီး နေအိမ်အနည်းစု အုပ်များအက်ကွဲသွားသည်ဟု ကွတ်ခိုင်မြို့ခံတစ်ဦးက ပြောသည်။
“ငလျင်က ဒါပထမဆုံးလို့ပြောလို့ရတယ်။ အင်အား က အရမ်းပြင်းဘူး။ ၃ဆင့် လောက်ပဲ ရှိမယ်။ ထိခိုက်ပျက်စီးမှုတော့ အုတ်နံရံတွေ နဲနဲ ပျက်စီးသွားတာလောက်ပဲ။ ကြောက်တော့ ကြောက်မိတာပေါ့။ ငလျင်လှုပ်ခတ်တာက တပြိုင်တည်း (၇)ကြိမ်တောင်လှုပ်တာ။” ဟု ကွတ်ခိုင်မြို့ခံ တစ်ဦးက သျှမ်းသံတော်ဆင့်ကို ပြောသည်
ထိုဒေသအတွင်းတိုက်ခတ်သွားသည့် ငလျင်သည် မဂ္ဂနီကျု ၄ဒသမ၆ မှ မဂ္ဂနီကျု ၃ဒသမ၂ အကြားရှိကြောင်း မြန်မာနိုင်ငံမြေငလျင်များသတင်းစင်တာ ထုတ်ပြန်ချက်အရသိရသည်။
မြန်မာနိုင်ငံတွင် ယခုနှစ် ၂၀၂၄ ခုနစ်အတွင်း မြေငလျင် ၃၁ကြိမ်လှုပ်ခဲ့ကြောင်း သိရသည်။
မြေငလျင်များလှုပ်နိုင်သဖြင့် ပြည်သူများအနေဖြင့်လည်း သတိထားနေထိုင်ရန်လည်း ၎င်း ကတိုက်တွန်းထားသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments