သိန္နီမြို့မှာ ကိုးကန့်တပ်မတော် MNDAA က မူးယစ်ဆေးဝါး အကြောင်းပြပြီး အရပ်သားတွေကို ဖမ်းဆီးကာ ငွေကြေးနဲ့ ပြန်လည် ရွေးခိုင်းတဲ့ အထဲတွင် မကျော့(အမည်လွှဲ) ကလည်း ပါဝင်သွားခဲ့တာ ဖြစ်ပါတယ်။

“ကျမကို ရတဲ့ နည်းနဲ့ အပြင်ကို ထုတ်ပေးပါလို့ ပြောပေးပါရှင်”လို့ အပြင်မှာ ရှိနေတဲ့ တစ်စုံတစ်ဦးက ကူညီပေးရန်အတွက် မကျော့(အမည်လွှဲ)က အမှာ ပါးလိုက်တာလည်း ဖြစ်ပါတယ်။

မကျော့(အမည်လွှဲ)ကိုတော့ သတင်းပေးဟု စွပ်စွဲကာ ကိုးကန့်တပ်က ဖမ်းဆီးခေါ်ဆောင်သွားခဲ့တာ ဖြစ်ပြီး တစ်လကျော်ကြာ အိမ်နဲ့ အဆက်အသွယ် ပေးမလုပ်ဘဲ ဖမ်းဆီးထားခဲ့တာ ဖြစ်ပါတယ်။

မကျော့(အမည်လွှဲ )က မြို့တွင်းကို ပြန်လည် ဝင်ရောက်လာတဲ့ အသိမိတ်ဆွေ (Non-CDM) ဝန်ထမ်းအချို့ကို စားရေးသောက်ရေးနဲ့ နေထိုင်ရေးတို့ကို ကူညီပေးခဲ့ရာမှ မကျော့ ရော ဝန်ထမ်းတွေပါ ဖမ်းဆီးခံခဲ့ရတာလည်း ဖြစ်ပါတယ်။

“၁၀၂၇ စစ်ဆင်ရေး”မှာ ဒေသခံ စစ်ကောင်စီ ဝန်ထမ်း(Non-CDM) အများအပြား ထွက်ပြေးခဲ့ကြရပြီးနောက် ဒေသတွင်း အနည်းငယ် ပြန်တည်ငြိမ်နေချိန်မှာ MNDAA က ဝန်ထမ်းများကို ဖမ်းဆီးခြင်း ပြုလုပ်မှာ မဟုတ်ဘူး ဆိုတဲ့အတွက် မြို့တွင်း ပြန်လည် ဝင်ရောက်လာကြသလို အချို့ ဒေသခံတွေကတော့ မြို့ကို ပြန်မဝင်ရင် အိမ်တွေကို သိမ်းမယ် ဆိုတဲ့ အတွက် မြို့ကို ပြန်လာခဲ့ကြတာလည်း ဖြစ်ပါတယ်။

“ဘာတွေဖြစ်လဲ ဆိုတာတော့ မပြောချင်ဘူး၊ အဆင်ပြေပါတယ်။ အစားအသောက်ကလည်း ထောင်ထမင်း ဟင်း ဆိုတော့ ရေလုံပြုတ်ပေါ့၊ လေကြောင်းရန်တော့ ပိုကြောက်ရတာပါ၊ အခန်းပိတ်ထားတော့ ပြေးစရာလည်း မရှိဘူး”လို့ တစ်လကျော် ဖမ်းဆီးခံထားရာမှ လွတ်မြောက်လာသူတစ်ဦးက ပြောပြပါတယ်။

လွတ်မြောက်ဖို့ရာအတွက် ငွေကြေးတစ်စုံတစ်ရာ မပေးရပေမယ့် အဆင့်ဆင့် တောင်းပန်နှိမ့်ချ ပြောဆိုခဲ့ပြီးနောက် လွတ်မြောက်ခဲ့ရတာ ဖြစ်တယ်လို့ ၎င်းက ဆိုပါတယ်။

လက်ရှိ သိန္နီမြို့မရဲစခန်းမှာ ဖမ်းဆီးခံရထားသူ အယောက် (၁၆၀) နီးပါး ကျန်ရှိသေးတယ်လို့ ပြန်လည် လွတ်မြောက်လာသူက ပြောပါတယ်။

“အကုန်လုံးက ဒီမြို့မှာမွေး ဒီမြို့မှာ ကြီးကြတာလေ၊ တစ်ဘက်လူ ဒုက္ခဖြစ်ရင်လည်း ကူညီ၊ အချင်းချင်း ကူညီကြတာပဲလေနော်။ အဲ့ဒါကို ကူညီလို့ သတင်းပေးလို့ ဆိုပြီး ဖမ်းသွားကြတာ၊ အိမ်နဲ့လည်း အဆက်အသွယ် ပေးမလုပ်ဘူး”လို့ မကျော့(အမည်လွှဲ)ရဲ့ မိတ်ဆွေဖြစ်သူ ဒေသခံ အသက် (၅၀) အရွယ် အမျိုးသမီးကြီး တစ်ဦးက ပြောပါတယ်။

ဖမ်းဆီးခံရသူတွေထဲမှာတော့ မူးယစ်ဆေးဝါး သုံးစွဲသူတွေ၊ ဒေသခံ စစ်ကောင်စီ ဝန်ထမ်းတွေ (Non-CDM) ၊ အဆိုပါ ဝန်ထမ်းတွေကို ကူညီပေးသူတွေကိုတော့ သတင်းပေး ဒလန် လို့ စွပ်စွဲကာ ဖမ်းဆီး ခေါ်ဆောင်သွားတာလို့ ဖမ်းဆီးခံရသူတွေရဲ့ မိသားစုဝင်တွေနဲ့ ဒေသခံတွေက ပြောပါ တယ်။

“အခု အချင်းချင်းတောင် ဘာမှမပြောရဲကြဘူး၊ ကူညီလည်း မကူညီရဲကြတော့ဘူး၊ အသိတွေ အမျိုးတွေလည်း ဖမ်းဆီးခံထားရတယ်။ သတင်းလည်း သွားမမေးရဲဘူး၊ တစ်ချို့ဆို ဝန်ထမ်း မဟုတ်ဘူး၊ အိမ်တွေ ပြန်တောင်းတာ မပေးပဲ အိမ်ပိုင်ရှင်တွေကို ဖမ်းထားတာ”လို့ အဖမ်းခံရသူ တစ်ဦးရဲ့ မိတ်ဆွေဖြစ်သူ အသက် (၄၀) အရွယ် ဒေသခံအမျိုးသားတစ်ဦးက ပြောပါတယ်။

မူးယစ်ဆေးဝါးနဲ့ အကြောင်းပြ ဖမ်းဆီးသူတွေကိုတော့ တစ်ဦးကို ကျပ်သိန်း ၂၀ နဲ့ အထက် ပြန်လည်ရွေးထုတ်ရတာတွေ ရှိပြီး အခြား အကြောင်းပြချက် နဲ့ ဖမ်းဆီးထားတဲ့ သူတွေကိုတော့ လွှတ်ပေးတာမျိုး မရှိဘူးလို့ ဒေသခံတွေက ဆိုပါတယ်။

“ထွက်လာတဲ့ သူတွေကို မေးမြန်းရတာပေါ့။ အခြေအနေ ဘယ်လိုရှိလဲ၊ ဘာတွေ လုပ်ခိုင်းလဲ၊ သိပ်လည်း မပြောရဲကြဘူး၊ အခုကလည်း စစ်တပ်က မြို့တွေကို ပြန်သိမ်းမယ်လို့ ကြားနေရတော့ ဖမ်းဆီးထားတဲ့ သူတွေကို ပြန်လွှတ်ပေးစေချင်တယ်။ အထဲမှာက ပြေးစရာမရှိဘူးလေ၊ အပြင်မှာက လွတ်ရာ ရှောင်လို့ရသေးတယ်”လို့ ဖမ်းဆီးခံထားရသူ တစ်ဦးရဲ့ မိသားစုဝင် အသက် (၆၀) အရွယ် အမျိုးသမီးကြီးက ပြောပါတယ်။

အားကိုးတကြီး ပြန်လာရာမှ ဝန်ထမ်းဖြစ်တဲ့အတွက် ဖမ်းဆီးခေါ်ဆောင်သွားခံရတာလို့ အမျိုးသမီးကြီးက ဆက်ပြောပါတယ်။

ဖမ်းဆီးခံထားရတာနဲ့ ပတ်သတ်ပြီးတော့ ကိုးကန့်တပ်မတော်က သီးသန့် ထုတ်ပြန်ထားတာ မရှိပါဘူး။

အခြားဒေသတွေမှာလည်း MNDAA နဲ့ TNLA တို့က မူးယစ်ဆေးဝါး တိုက်ဖျက်ရေး ခေါင်းစဉ်နဲ့ ဖမ်းဆီးစစ်ဆေးတာတွေ လုပ်ပြီး ငွေကြေးနဲ့ ပြန်လည် ရွေးထုတ်ခိုင်းတာတွေ ရှိနေတယ်လို့ သတင်းမီဒီယာတွေမှာလည်း ဖော်ပြထားပါတယ်။

စစ်ကောင်စီက ပြီးခဲ့တဲ့ လေးလ အတွင်း MNDAA ထိန်းချုပ်ထားတဲ့ နယ်မြေတွေ ဖြစ်တဲ့ လောက်ကိုင်၊ လားရှိုး၊ သိန္နီမြို့ စတဲ့ ဒေသတွေကို လေကြောင်းကနေတဆင့် ဗုံးကြဲတိုက်ခိုက်ခဲ့တာ အကြိမ် ၅၀ ကျော် ပြုလုပ်ခဲ့တယ်လို့ MNDAA က နိုဝင်ဘာ ၁ ရက်နေ့က ထုတ်ပြန်ထားပါတယ်။

ထိုသို့ လေကြောင်းတိုက်ခိုက်တာတွေမှာ စစ်ရေးပစ်မှတ်မဟုတ်တဲ့ ဘုန်းကြီးကျောင်း၊ စာသင်ကျောင်း၊ ဆေးရုံ၊ ဘုရားရှိခိုးကျောင်းတွေ ပါဝင်ပြီး အရပ်သား (၅၀) နီးပါး သေဆုံးခဲ့ပါတယ်။

“၁၀၂၇ စစ်ဆင်ရေး” တစ်နှစ်ပြည့်ကာလအတွင်း စစ်ကောင်စီက MNDAA စတည်းချရာလို့ သတ်မှတ်ထားတဲ့ နေရာ စာသင်ကျောင်း၊ ဆေးရုံ၊ ရဲစခန်း၊ အစိုးရရုံးတွေနဲ့ တိုးဂိတ်တွေကို အကြိမ်ကြိမ် လေကြောင်းမှတဆင့် တိုက်ခိုက်မှုတွေ ပြုလုပ်ခဲ့ပြီး ဒေသခံ (၂၀) နီးပါး သေဆုံးခဲ့ပြီး အများအပြား ဒဏ်ရာရခဲ့ကြပါတယ်။

သိန္နီမြို့ရဲ့ အနီးမှာရှိတဲ့ ကွတ်ခိုင်မြို့မှာလည်း နိုဝင်ဘာ (၁) ရက်နေ့နဲ့ နိုဝင်ဘာ (၁၇) ရက်နေ့က လေကြောင်းတိုက်ခိုက်တာတွေကြောင့် အရပ်သား (၄) ဦးသေဆုံးခဲ့ပြီး (၁၀) ဦးကျော် ဒဏ်ရာ ရခဲ့ပါတယ်။

စစ်ကောင်စီက သိမ်းပိုက်ခံမြို့တွေကို ပြန်လည် သိမ်းယူမယ်ဆိုတဲ့ သတင်းတွေအပြင် လက်ရှိ TNLA သိမ်းပိုက်ထားတဲ့ နယ်မြေတွေကို တိုက်ခိုက်နေတာတွေကြောင့် အရပ်သား ထိခိုက်သေဆုံးမှုတွေ အများအပြား ရှိနေကြတဲ့အတွက် ဒေသခံတွေ အနေနဲ့ စိုးရိမ်မှုတွေ ရှိနေတယ်လို့ ဆိုကြပါတယ်။

“အခုက တစ်ယောက်နဲ့တစ်ယောက် ကြည့်နေရတာပဲ။ဘာမှလည်း မကူညီရဲတော့ဘူး .. ၊ အဆင်ပြေလား အခြေအနေ ဘယ်လိုရှိလဲတောင် မမေးရဲဘူး”ဟု ဒေသခံတစ်ဦးက ဝမ်းနည်းစွာနဲ့ ထိုသို့ ပြောဆိုလာပါတယ်။

နန်းလောဝ် ရေးသားသည်။