သျှမ်းပြည် မူဆယ်မြို့တွင် ကိုယ်ပိုင်လုပ်ငန်းများအတွက် အသုံးပြုရန်နှင့် ကား၊ ဆိုင်ကယ်များကို သတ်မှတ်ဂါလန်အတိုင်း ခွင့်ပြုရန် စက်သုံးဆီ ဝယ်ယူခွင့်မှတ်တမ်းစာအုပ် ပြုလုပ်ရမည်ဖြစ်ကြောင်း စုံစမ်းသိရသည်။

လာမည့် ဒီဇင်ဘာလ ၂ ရက်နေ့မှ စတင်ပြီး မူဆယ်မြို့ပေါ်ရှိ တရားဝင် လိုင်စင်ရယူထားသည့် ကိုယ်ပိုင်လုပ်ငန်းများ အသုံးပြုရန်နှင့် ကညနတွင် မှတ်ပုံတင်ထားသည့် ကား၊ ဆိုင်ကယ်များကို သတ်မှတ်ဆီဂါလန်အတိုင်း ခွင့်ပြုရန် စက်သုံးဆီ ဝယ်ယူခွင့်မှတ်တမ်းစာအုပ်ကို လုပ်ငန်းလိုင်စင်၊ မှတ်ပုံတင်နှင့်တကွ စစ်ကောင်စီထံ လျှောက်ထားရမည်ဖြစ်ကြောင်း ဒေသခံများက ပြောသည်။

“သမဝါယမ ပုံစံလို ပြန်သွားတာပေါ့၊ မူဆယ်က လူတွေကို တန်းစီရအောင် အမျိုးမျိုးလုပ်နေတာ။ လုံးဝ ပိတ်လိုက်ရင်တောင် ပြည်သူတွေ အခုလို ဒုက္ခရောက်ပြီး စုပြုံမတိုးရတော့ဘူး။ စက်သုံးဆီက တပိုင်တနိုင်လည်း တရုတ်က ပေးမသယ်ဘူး၊ အခု ရောင်းပေးမှာလည်း ကိုယ်လိုချင်သလောက် မရဘဲ ဆီဆိုင်ဖွင့်ပြီး ဆီထည့်မရဘူး ဖြစ်မှာ”ဟု အသက် (၃၀) ကျော်အရွယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

မူဆယ်မြို့တွင် စက်သုံးဆီ ဝယ်ယူခွင့်ရရန် စစ်ကောင်စီလက်အောက်ခံ ဌာနဆိုင်ရာ ပူးပေါင်းအဖွဲ့ဖြစ်သည့် မြို့နယ် စက်သုံးဆီ ဝယ်ယူရေးနှင့် ဖြန့်ဖြူးရောင်းချမှု ကြီးကြပ်ရေးကော်မတီသို့ လျှောက်ထားရမည်ဖြစ်ကြောင်း ကြေညာချက်တွင် ဆိုထားသည်။

အလားတူ မူဆယ်မြို့ ဆင်ဖြူနယ်စပ်ဂိတ်တွင် မီးဖိုချောင်သုံး သီးနှံနှင့် သားငါးများကို သယ်ယူခွင့်ရရန် စာရင်းပေးထားသည့် ကား၊ ဆိုင်ကယ်များကို အများရှေ့တွင် မဲနှိုက်၍ ဝင်ရောက်ရမည့် နေ့ရက်ကို သတ်မှတ်ပေးမည်ဖြစ်ကြောင်း ဒေသခံများက ပြောဆိုသည်။

“တံတားနားကနေပဲ ဒီဘက်ကို စပေးမဖြတ်တာ၊ တရုတ်ဘက်က အသီးတွေ၊ ဟင်းသီးဟင်းရွက်နဲ့ ပင်လယ်စာလိုဟာမျိုး မရဘူး။ ဆိုင်ကယ်ထဲ ထည့်လာတဲ့ နည်းနည်းပါးပါးဆိုရတယ်။ ပိဿာအများကြီးနဲ့ ပြန်ရောင်းဖို့လိုဟာ သယ်လို့မရဘူး။ အသီးအနှံ၊ အာလူးတို့ဆိုလည်း လက်ဆွဲအိတ်နဲ့ တနိုင်ပဲ သယ်လာလို့ရတယ်”ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် နိုဝင်ဘာလ ၂၇ ရက်မှ စတင်ပြီး မူဆယ်မြို့ စစ်ကောင်စီထိန်းချုပ်ထားသည့် ဆင်ဖြူစစ်ဆေးရေးဂိတ်တွင် ကုန်ပစ္စည်း သယ်ယူခွင့်ကို ထပ်မံတင်းကြပ်လိုက်ပြီး သတ်မှတ်ချက်အတိုင်း သယ်ယူလာသည့် တပိုင်တနိုင် ကုန်ပစ္စည်းများကိုပါ အကောက်ခွန်နှင့် ကညန ပူးပေါင်းအဖွဲ့များက ဆွဲချသိမ်းယူထားကြောင်း မူဆယ်ဒေသခံများထံမှ သိရသည်။

လာမည့် ဒီဇင်ဘာလ (၁) ရက်မှ စတင်ပြီး မူဆယ်မြို့နယ်အတွင်း မီးဖိုချောင်သုံး အသီးအနှံများ၊ အသားနှင့် ငါးများကို ခွင့်ပြုမိန့်ရသည့် ကားနှင့် ဆိုင်ကယ်များသာ သယ်ယူနိုင်မည်ဖြစ်ပြီး အခြားလူသုံးကုန်ပစ္စည်းများကို တင်ဆောင်ခွင့် ပြုမည်မဟုတ်ကြောင်း ဆင်ဖြူစစ်ဆေးရေးဂိတ်မှ ထုတ်ပြန်ထားသည်။