သျှမ်းပြည်တောင်ပိုင်း၊ တောင်ကြီးမြို့တွင် တန်ဆောင်တိုင် ကာလအတွင်း ပြည်သူ၁၄၀ ကျော်ဖမ်းဆီးခံရကြောင်း ဒေသတွင်း သတင်းရင်းမြစ်ဆီက သိရသည်။
ပြီးခဲ့သည့် အောက်တိုဘာလကတည်းက တောင်ကြီး မြို့ပေါ်တွင် ဖမ်းဆီးမှုတွေ လုပ်ဆောင်ခဲ့ပြီး တန်ဆောင်တိုင်ပွဲတော်ကာလအတွင်း ညဘက်ပေါ်တာဆွဲဖမ်းဆီးခံရမှုများ ပိုများပြားလာကြောင်း မြို့ခံများထံမှ သိရသည်။
ထိုကဲ့သို့ ဖမ်းဆီးခံရသူများမှာ စဝ်စံထွန်းရပ်ကွက်တွင် (၁၀) ဦး၊ ညောင်ဖြူစခန်း (၁၂)ဦး၊ ရတနာသီရိတွင် (၁၅)ဦး၊ ချမ်းမြရပ်ကွက် (၁၀)ဦး၊ ရွှေတောင်ရပ်ကွက် (၂၀)ဦး၊ စိန်ပန်းရပ်ကွက် (၁၆) ဦး၊ကံသာရပ်ကွက် (၁၄)ဦး၊ ကျောင်းကြီးစုတွင် (၂၃)ဦး၊ မင်္ဂလာဦးတွင် (၁၀)ဦးနှင့် ဘုရားဖြူရပ်ကွက်တွင် (၁၆)ဦး တို့ ပေါ်တာဆွဲ ဖမ်းဆီးခံရကြောင်း TGI SRမှ နိုဝင်ဘာလ ၂၄ ရက်တွင် ထုတ်ပြန်ထားသည်။
ဖမ်းဆီးခံရသူ အများစုမှာ ဆေးသမားများဖြစ်ပြီး ဖမ်းဆီးရမိသူများကို စစ်မှုထမ်းတပ်သားအဖြစ် အသုံးပြုနေကြောင်း မြို့ခံတစ်ဦးက ပြောသည်။
“ တန်ဆောင်တိုင် မတိုင်ခင်ကတည်းက ပေါ်တာဆွဲနေတာ။ ညဘက်ဆို အပြင်တောင်မထွက်ရဲဘူး။ ဖမ်းခံရတဲ့သူ အများစုက ဆေးသမားတွေ။ သူတို့က ငွေနဲ့ တောင်မရွေးခိုင်းတော့ဘူး။ တပ်သားအနေ့နဲ့ စုဆောင်းတာ ဖြစ်မယ်။အိမ် အထိတော့ဝင်မဆွဲဘူး။လမ်းသွားလမ်းလာတွေကိုဆွဲတာ။” ဟု မြို့ခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ကောင်စီ၏ပေါ်တာဆွဲမှုကြောင့် အမျိုးသားများအနေဖြင့် ညဘက်အပြင်ထွက်ချိန် သတိရှိသင့်ကြောင်းနှင့် မလိုအပ်ဘဲ အပြင်မထွက်ရန် တိုက်တွန်းပြောဆိုထားသည်။
“အခုတလော ရေအေးကွင်း ရပ်ကွက်နဲ့ ဝါးပြားလမ်းဆုံမှာ အခုပိုဖမ်းနေတယ်။ တန်ဆောင်တိုင် အတွင်းတုန်းကလည်း အဖမ်းခံရတာတွေလည်းကြားတယ်။ မလိုအပ်ဘဒ အပြင်မထွက်တာ အကောင်းဆုံးပဲ။ ညနေရောက်ပြီဆို ကိုယ့်အိမ်မှာ ကိုယ်ရှိနေတာ အကောင်းဆုံးပဲ။ မဟုတ်ရင် အဖမ်းလည်း ခံရ ငွေလည်း ညှစ်ခံရဆို နှစ်ခါနစ်နာတယ်။” ဟု မြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယခုလက်ရှိတောင်ကြီးမြို့တွင် အဖမ်းအဆီးကြမ်းနေပြီး ပြီးခဲ့သည့် တောင်ကြီးတန်ဆောင်တိုင် ကာလအတွင်း လိုင်စင်မရှိသည့် ကားနှင့် ဆိုင်ကယ်အများပြားကို စစ်ကောင်စီဖက်မှ ဖမ်းဆီးနေပြီး လူငယ်များကိုလည်း ပေါ်တာဆွဲသွားကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments