သျှမ်းပြည် ကျေးသီးမြို့ရှိ စစ်ဘေးရှောင် ၂၀၀ ကျော်အတွက် ရေရှည်ထောက်ပံ့နိုင်ရန် ခက်ခဲလာကြောင်း စုံစမ်းသိရသည်။

ပြီးခဲ့သည့် ဇွန်လ နောက်ဆုံးပတ်မှ စတင်ပြီး လားရှိုး၊ ကျောက်မဲနှင့် သီပေါမြို့တို့တွင် စစ်ကောင်စီတပ်နှင့် ညီနောင်မဟာမိတ်တပ်များ တိုက်ပွဲပြန်လည် ပြင်းထန်ခဲ့ပြီးနောက် ဒေသခံများ ကျေးသီးမြို့အတွင်းသို့ ထွက်ပြေးသိမ်‌ရှောင်လာကြသည်။

တိုက်ပွဲများကြောင့် ၄ လ‌ကျော်ကြာ ကျေးသီးမြို့သို့ ထွက်ပြေးတိမ်းရှောင်နေရသည့် စစ်ဘေးရှောင် ၂၀၀ ကျော်အတွက် အလှူရှင်များမရှိသည့်အပြင် လက်ရှိတွင် စားနပ်ရိက္ခာအခက်အခဲများကြုံတွေ့နေရကြောင်း စစ်ဘေးရှောင်ကူညီသူအမျိုးသားတစ်ဦးက သျှမ်းသံတော်ဆင့်ကို ပြောသည်။

“ရေကြီးမှုဖြစ်ပြီးတဲ့နောက်ပိုင်း အလှူရှင်တွေကမရှိတော့ဘူး။ကျေးသီးက လူတွေအချင်းချင်းစုပြီး လှူပေး နေရတာပေါ့။ သူတို့ရဲ့ စားသောက်ဖို့ကိုပဲ အဓိကတော့ထားပြီး လှူပေးနိုင်တာ ကြာလည်း ကြာလာတော့ ရန်ပုံငွေလည်းနည်း လာပြီ လေ။ကျနော်တို့ လက်ရှိ ကျန်နေသလောက်ဆိုရင်တော့ ၂ပတ် လောက်ပဲ အလွန်ဆုံးကူညီနိုင်တော့တယ်။” ဟု စစ်ဘေးရှောင်ကူညီသူအမျိုးသားတစ်ဦးက ပြောသည်။

စစ်ဘေးရှောင်များကိုကူညီထောက်ပံ့သည့် အလှူရှင်များ နည်းပါးလာသည့်အတွက် စစ်ဘေးရှောင် အများစုသည် ကြုံရာကျပန်း အလုပ်များကိုသာ လုပ်ကိုင်နေရပြီး စားဝတ်နေရေးအတွက် နေ့စဉ် ရုန်းကန်နေရကြောင်း စစ်ဘေးရှောင်ကူညီသူအမျိုးသားတစ်ဦးက ဆက်ပြောသည်။

“အခုတော့ နေ့စားလိုက်နေတာရှိတယ်။ဒီဖက်မှာက စပါးတွေရိတ်တယ်၊ကြံတွေချိုးတယ်စတဲ့အလုပ်တွေကို သူတို့တွေကလည်း လိုက်လုပ်နေကြတာပေ့ါ။တချို့ကလည်း နေရပ်ပြန်ကြတယ်။ အများစု မပြန်ကြသေးတာက အိမ်မရှိတော့တာ”ဟု ၎င်းက ပြောသည်။

ကျေးသီးမြို့ပေါ်သို့ ရောက်ရှိနေသည့် စစ်ဘေးရှောင်များသည် ဘာသာရေး အဆောက်အဦးနှင့် ဘုရားကျောင်းများတွင် နေထိုင်နေကြပြီး အများစုသည် ကလေးနှင့် သက်ကြီးရွယ်အိုများ ဖြစ်ကြောင်း သိရသည်။