ေသျှမ်းပြည်တောင်ပိုင်း၊ တောင်ကြီးမြို့ တန်ဆောင်တိုင်ပွဲတော်အတွင်း လုံခြုံရေးတင်းကြပ်ထားသည့် ကြားမှ ဆိုင်ကယ်များ ပျောက်ဆုံးနေသည်ဟု မြို့ခံများပြောပြချက်အရသိရသည်။
တောင်ကြီးတန်ဆောင်တိုင် ပွဲတော်အတွင်း ဆိုင်ကယ်များအပ်နှံထားသည့်နေရာတွင် ဆိုင်ကယ် အစီး(၂၀) ကျော်ကို နိုဝင်ဘာလ (၁၁) ရက်နေ့တွင် ပျောက်ဆုံးသွားပြီး ဖုန်းနှင့် အခြားသော တန်ဖိုးကြီး ပစ္စည်းများပါ ပျောက်ဆုံးသွားကြောင်း ဖြစ်စဉ် သိရှိသူ တစ်ဦးက ပြောသည်။
“နိုဝင်ဘာလ (၁၁) ရက်နေ့တုန်းကလည်း ဆိုင်ကယ်အပ်ထားတဲ့ နေရာမှာ အစီး (၂၀) ကျော်ပျောက်သွားတယ်။ ဖုန်းတောင်ခါးပိုက်နှိုက်ခံလိုက်ရတယ်။ ဒီပွဲခင်းထဲမှာပဲ အိတ်ကပ်ထဲ ထည့်ထားတာကို ရအောင်နှိုက်သွားတာ။ အိုင်ဖုန်းတွေပဲ ပိုပျောက်ကြတာ။ သူတို့စားစရာမရှိတော့ ခိုးစားကြတယ်နေမှာပေါ့။”ဟု ဖုန်းပျောက်သွားသူ အမျိုုးသား တစ်ဦးက သျှမ်းသံတော်ဆင့်ကို ပြောသည်။
ထို့အပြင် တောင်ကြီး တန်ဆောင်တိုင် ပွဲအတွင်း လိုင်စင်ရှိသည့် ကားနှင့် ဆိုင်ကယ်ကိုသာ ဝင်ခွင့်ပြုပြီး လိုင်စင်မရှိသည့် ကားကို သိန်း(၃၀) ဖြင့် ပြန်ရွေးခိုင်းကြောင်း ၎င်းအမျိုးသားက ပြောသည်။
တန်ဆောင်တိုင်ပွဲတော်ကာလအတွင်း ဟိုပုံး-တောင်ကြီးလမ်း ပိုက်နေပြီး တောင်ကြီးမြို့ပေါ်တွင်လည်း ကားလမ်းပိတ်နေတာကြောင့် သွားလာရခက်ခဲသည်ဟု မြို့ခံတစ်ဦးကပြောသည်။
“ဒီနှစ် လူအရမ်းစည်တာ။ ဟိုပုံးဖက်ကနေ တောင်ကြီးလာမယ်ဆိုလည်း လမ်းက ပိတ်ထားတယ်။ မြို့ထဲမှာလည်း ကားတွေ ကြပ်ပိတ်နေတာပဲ။ သွားရလာရတာလည်း မလွယ်ဘူး။ ကြားထဲက လိုင်စင်မရှိတဲ့ကားတွေကို ဖမ်းလိုက်သေးတယ်။” ဟု မြို့ခံတစ်ဦးက ပြောသည်။
တောင်ကြီးမြို့တန်ဆောင်တိုင် မီးပုံပျံပွဲတော်ကို နိုဝင်ဘာလ (၁၁)ရက်မှ (၁၇) ရက်အထိ ခုနှစ်ရက်တိုင်တိုင် ကျင်းပပြုလုပ်သွားမည် ဖြစ်ကြောင်း သျှမ်းပြည်တောင်ပိုင်း ရိုးရာ မီးပုံးပျံပညာရှင်များ အသင်းက ထုတ်ပြန်ကြေညာထားသည်။
တန်ဆောင်တိုင်ပွဲတော်အတွင်း လုံခြုံရေးများကို ပွဲဈေးတန်း အဝင်မှ စပြီး အဝေရာမီးပုံးပျံကွင်း အဝင်မှ စ၍ ကွင်းအတွင်း တို့တွင် ယခင်နှစ်များထက် လုံခြုံရေး တိုးမြှင့်ချထား ပြီး စစ်ဆေးဆောင်ရွက်မှုများရှိနေသည်။
အလုပ်သင် သတင်းထောက် နန်းလရောင်ရေးသားသည်။
Leave a Comments