မြန်မာ-တရုတ်နယ်စပ်ဒေသ မူဆယ်မြို့တွင် တရုတ်ဘက်မှ စက်သုံးဆီတင်သွင်းခွင့် ကန့်သတ်လိုက်ခြင်းကြောင့် စက်သုံးဆီပြတ်လပ်ကာ ဓာတ်ဆီဆိုင်အချို့တွင် ဆီဝယ်ရန် တန်းစီးနေရသည်ဟု ဒေသခံများထံမှ စုံစမ်းသိရသည်။

ပြီးခဲ့သည့် (အောက်တိုဘာလ ၂၂ )ရက်နေ့မှ စတင်ပြီး တရုတ်အာဏာပိုင်များဘက်မှ စားနပ်ရိက္ခာနှင့် စက်သုံးဆီ တင်သွင်းခွင့်ကို ကန့်သတ်လိုက်ခြင်းကြောင့် စက်သုံးဆီပြတ်လပ်နေကြောင်း ဒေသခံများကပြောသည်။

ယနေ့ (နိုဝင်ဘာလ ၈ ရက်)နေ့အထိ မူဆယ်မြို့ရှိ စက်သုံးဆီဆိုင်အချို့တွင် ဆီဝယ်ရန် အလုအယက် တန်းစီဝယ်ယူနေရပြီး ဆီဆိုင်ကြီးတချို့ လည်း ပိတ်လိုက်ရသည်ဟု မြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“အောက်တိုဘာ ၂၂ ရက်နေ့ကတည်းကပဲ ဆီတွေ အလုယက်လိုက်ဝယ်နေရတယ် ဒီနေ့အထိပဲ။ အကန့်သတ်နဲ့ရောင်းတာ တချို့ဆိုင်ကြီးတွေဆို ပိတ်လိုက်ရတယ်။ ဆီဈေးက ဆိုင်ကြီးမှာဝယ်ရင် ပုံမှန်ဈေးနဲ့ရတယ်။ အပြင်ဆိုင်တွေက ဈေးအရမ်းတင်ရောင်းကြတယ်။ အခုဆို တရုတ်ဘက်က လာတဲ့ ဆီတွေ တစ်ပက်ကို ၁ ရက် ကား ၂ စီးပဲ ပေးသွင်းတော့တယ်” ဟု ၎င်းက ပြောသည်။

တရုတ်ဘက်မှ စက်သုံးဆီတင်သွင်းခွင့် မကန့်သတ်ခင်က မူဆယ်မြို့၌ တစ်ပတ်လျှင် ၃ ရက် ဆီဘောက်ဆာကားများ ပေးသွင်းလျက်ရှိရာ ယခု တစ်ပတ်ကို ၁ ရက်သာ ဆီဘောင်ဆာကား ၂ စီး ပေးသွင်းနေကြောင်း ၎င်းအမျိုးသား ထပ်လောင်းပြောသည်။

ထို့အပြင် မူဆယ်မြို့အဝင်ရှိ အေးရှားဝေါးဂိတ်တွင်လည်း ဓာတ်ဆီ နှင့် ဒီဇယ်ကို စစ်ကောင်စီတပ်ဖွဲ့က သယ်ယူခွင့်မပြုသောကြောင့် ဒေသခံများနှင့် တောင်သူလယ်သမားများ အခက်တွေ့နေကြောင်း ကျေးရွာဒေသခံတစ်ဦးက ပြောသည်။

“နမ့်ခမ်းကနေ မူဆယ်လာတဲ့လမ်း အေးရှားဝေါလ်ဂိတ်မှာ ဓာတ်ဆီ၊ ဒီဇယ် ပေးမသယ်ဘူး။ တကယ် ဒုက္ခရောက်နေတာ။ နမ့်ခမ်းနဲ့ မူဆယ်ကြား ကုန်သွယ်ဖြတ်လိုက်တာ။ စယ်လန့်နဲ့ အေးရှားဝါးကြားမှာ ရှိတဲ့ရွာတွေပဲ အခက်ခဲရောက်နေတာ။ ဆီလည်းဝယ်မရ၊ မီးလည်းမမှန်တော့ တောင်သူလယ်သမားတွေဘဲ ခက်ခဲနေတာ။ လယ်ယာတွေလုပ်ဖို့ ခက်ကုန်ပြီ” ဟု ၎င်းကပြောသည်။

လက်ရှိတွင် စစ်ကောင်စီနှင့် ယူနန်ပြည်နယ်အကြား တရားဝင် ကုန်သွယ်မှု ပြုလုပ်နေသည့် မူဆယ်-ရွှေလီ နယ်စပ်ဂိတ်၊ ကချင်ပြည်နယ်ရှိ ကန်ပိုက်တီ နယ်စပ်ဂိတ်တို့တွင်လည်း အောက်တိုဘာလ (၂၅) ရက်မှ စတင်ပြီး တရုတ်ဘက်မှ စားနပ်ရိက္ခာနှင့် စက်သုံးဆီ တင်သွင်းခွင့် ပိတ်လိုက်ခြင်းကြောင့် ကုန်ဈေးနှုန်း အဆမတန် မြင့်တက်လာကြောင်း ဒေသခံများက ပြောဆိုသည်။

မြန်မာ-တရုတ် နယ်စပ်တလျှောက် စစ်ကောင်စီထိန်းချုပ်နိုင်သည့် နယ်စပ်ဂိတ် အပါအဝင် တိုင်းရင်းသားလက်နက်ကိုင်တပ်ဖွဲ့ ထိန်းချုပ်သည့် နယ်စပ်ဂိတ်စုစုပေါင်း (၇) ဂိတ် ဆက်လက်ဖွင့်လှစ်ထားသော်လည်း ပို့ကုန်သွင်းကုန် စစ်ဆေးမှု တင်းကြပ်ပြီး အခြား (၈) ဂိတ်မှာ ပိတ်ထားကြောင်း ယူနန်ပြည်နယ် ကုန်သွယ်ရေးဌာန ထုတ်ပြန်ချက်အရ သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။