သျှမ်းပြည် ပင်လောင်းမြို့အတွင်း စစ်ကောင်စီ နှင့် ကရင်နီ တော်လှန်ရေးတပ်ပေါင်းစုတို့ တိုက်ပွဲ တဖန် ပြန်လည် ပြင်းထန်လာကြောင်း စုံစမ်းသိရသည်။
ပင်လောင်းမြို့နယ် တောင်ပိုင်း ဗန်းမောက်၊ ဆောင်လှန်၊လွယ်ဟိုဝိုး ကျေးရွာ တကြောတွင် စစ်ကောင်စီနှင့် ကရင်နီ တော်လှန်ရေးတပ်ပေါင်းစုတို့သည် နိုဝင်ဘာလမှ စ၍ တိုက်ပွဲများ တဖန်ပြန်လည်ပြင်းထန်လာကြောင်း ပင်လောင်းမြို့နယ် အသက် ၄၀ ဝန်းကျင် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“တိုက်ပွဲတွေက ပြန်ဖြစ်နေလာတာ ၃ ရက် ၄ ရက်ပဲရှိသေးတာ။ အဲ့ရှေ့ရက်တွေက ခဏရက်ပိုင်းလောက် ငြိမ်းသွားတာ။ အခုပြန်ဖြစ်တာက တော်တော်အခြေအနေဆိုးတယ်။ ရွာတွေလည်း မီးလောင်ကုန်တယ်။ လေယာဉ်တွေ လက်နက်ကြီးတွေနဲ့ ဒရုန်းတွေနဲ့ ပါပစ်နေကြတာပဲ။ လေယာဉ်တွေကတော့ နေ့တိုင်းမြင်နေရတာ”ဟု ပင်လောင်းမြို့နယ် အသက် ၄၀ ဝန်းကျင် ဒေသခံအမျိုးသားတစ်ဦးက ပြောသည်။
လက်ရှိတွင် ကျေးရွာအတွင်း၌ တိုက်ပွဲများဖြစ်ပွားနေကြပြီး လေကြောင်း ၊ လက်နက်ကြီး ပစ်ခတ်မှုများလည်း ရှိနေပြီး ကျေးရွာအတွင်းတွင် ဒေသခံများ အနည်းငယ်ကျန်ရှိနေကြောင်း ပင်လောင်းမြို့နယ် အသက် ၄၀ ဝန်းကျင် ဒေသခံအမျိုးသားတစ်ဦးက ဆက်ပြောသည်။
“အခုချိန်က စပါးတွေရိတ်သိမ်းချိန်ဆိုတော့ တချို့တွေက မပြေးကြသေးတာ။ တချို့တွေက တိုက်ပွဲတွေ ငြိမ်နေတယ် ဆိုပြီးတော့ စပါးတွေ ပြန်သိမ်းတာတွေလုပ်ကြတာရှိတယ်။ အဲ့လိုရုတ်တရက် ပြန်ဖြစ်လာတော့ ရွာထဲမှာ လူအနည်းစု ကျန်နေတာ ပိတ်မိနေတာရှိတယ်”ဟု ၎င်းက ပြောသည်
ထိုတိုက်ပွဲဖြစ်ပွားနေသော ကျေးရွာများသည် ပင်လောင်းမြို့နှင့် မိုင် ၂၅ ကျော် ကွာဝေးကြောင်းသိရသည်။
ပြီးခဲ့သည့် (အောက်တိုဘာလ ၃၁ ရက်)တွင် ဗန်းမောက်ရွာရှိ ပြည်သူများ ထော်လာဂျီ၊ နှင့် စစ်ဘေးရှောင်ရန် ပြင်ဆင်နေစဉ် စစ်ကောင်စီတပ်မှ ဒရုန်းဗုံးဖြင့် ကြဲချတိုက်ခိုက်ခဲ့ခြင်းကြောင့် မိန်းကလေးငယ်တစ်ဦး အပါအဝင် စစ်ဘေးရှောင် နှစ်ဦး သေဆုံးသွားပြီး(၇)ဦး ဒဏ်ရာရ ရှိခဲ့ကြောင်း သိရသည်။
ပင်လောင်းနယ်စပ်တွင်းရှိသော ဟိုဝိုး၊လွယ်ကျိုင်း၊ လင်ခံကျေးရွာများကို ( နိုဝင်ဘာလ ၁ ရက် ) တွင် နှစ်ဖက်တိုက်ပွဲများကြောင့် နေအိမ်များ မီးရှို့ဖျက်ဆီးခံရကြောင်း ဒေသခံများကပြောသည်။
အဆိုပါတိုက်ပွဲဖြစ်ပွားနေသည့် ကျေးရွာများမှ ဒေသခံများသည် ညောင်ရွှေ မြို့နယ် နှင့် ပင်လောင်းမြို့အတွင်း သို့ ပြီးခဲ့သည့် စက်တင်ဘာလ နောက်ဆုံးပတ်မှစတင်၍ ထွက်ပြေး တိမ်းရှောင်ခဲ့ရကြောင်း သိရသည်။
Leave a Comments