သျှမ်းပြည် သီပေါမြို့နယ်တွင် တိုက်ပွဲများ ငြိမ်သက်နေသော်လည်း လက်ရှိအချိန်ထိ ဒေသခံများ နေရပ်ပြန် နေထိုင်ရန် စိုးရိမ်နေရကြောင်း စုံစမ်းသိရသည်။
အောက်တိုဘာလ (၁၃) ရက်တွင် သီပေါမြို့ရှိ စစ်ကောင်စီလက်ကျန် ခလရ-(၂၃) တပ်ရင်းကို တအာင်း (ပလောင်) အမျိုးသားလွတ်မြောက်ရေးတပ်မတော် TNLA က တိုက်ခိုက်သိမ်းပိုက်ပြီးနောက် တိုက်ပွဲများ ငြိမ်သက်သွားခဲ့သည်။
သီပေါမြို့အတွင်း၌ ဒေသခံများ ပြန်လည်ဝင်ရောက် နေထိုင်နိုင်သော်လည်း စစ်ကောင်စီတပ်၏ လေကြောင်း ဗုံးကြဲတိုက်ခိုက်မှု အန္တရာယ်ကို စိုးရိမ်နေရသည့်အတွက် လက်ရှိ အချိန်ထိ မြို့အတွင်းသို့ ပြန်ရောက် နေထိုင်ရန် စိုးရိမ်နေရကြောင်း သီပေါမြို့ စစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။
“မြိုထဲမှာတော့ ဘယ်သူမှ အဲ့လောက်မနေရဲကြသေးဘူး။ ဒီရက်ပိုင်း ပြန်တဲ့လူတွေတော့ ရှိတယ်။ နေ့လယ်ဆို အိမ်မှာ ပြန်နေတယ်၊ ပြန်ကြည့်တယ်။ ညဆို ဘေးရွာတွေ မြို့ပြင်တွေမှာ အိပ်တာပေါ့။ ပြန်လည်း အရင်လို အလုပ်တွေ ပြန်လည်ပတ်နိုင်ဖို့ကလည်း ခက်နေတယ်။ အဓိကတော့ လေကြောင်းနဲ့ ဗုံးကြဲမှာမလို့ မပြန်ရဲကြသေးတာ သူတို့က ညလူအိပ်ချိန်တွေ ကြဲတော့ ပိုဆိုးတယ်”ဟု သီပေါမြို့ ဒေသခံအမျိုးသားတစ်ဦးက ပြောသည်။
သီပေါမြို့တွင် လက်ရှိ ပြန်လည်နေထိုင်သူ နည်းပါးနေပြီး ဈေးနှင့် ကုန်စုံဆိုင်များလည်း ပြန်ဖွင့်နိုင်ခြင်း မရှိသေးကြောင်း သီပေါမြို့ စစ်ဘေးရှောင် အမျိုးသားတစ်ဦးက ပြောသည်။
“မြို့အပြင်တွေလောက်ပဲ ဆိုင်တွေ ဖွင့်ရောင်းနေကြသေးတာ။ မြို့လယ်မှာတော့ ဆိုင်ဖွင့်ရောင်းနေကြတာ ဈေးရောင်းနေတာတွေ သိပ်မရှိသေးဘူး။ အများစုကတော့ ကိုယ်ရောင်းတဲ့ ပစ္စည်းတွေပါ သယ်သွားကြတာ ဆိုတော့လေ။ ပြန်လာပြီး တခုခုပြန်ဖြစ်ရင်လည်း ပြန်ပြေးဖို့ ပိုက်ဆံက ထပ်ကုန်တယ်လေ အဆင်မပြေကြဘူး”ဟု သီပေါမြို့ အမျိုးသားတစ်ဦးက ဆက်ပြောသည်။
ထိုအပြင် မြို့အတွင်း၌ သူခိုးများ သောင်းကျန်းလာပြီး ပြည်သူနေအိမ်များ ပစ္စည်းဖောက်ထွင်း ခိုးယူခံနေရကြောင်း ဒေသခံများက ပြောသည်။
သီပေါမြို့ပေါ် ရွှေဓားကျောင်းတိုက်၊ ရေဟော်ဘုန်းကြီးကျောင်းနှင့် ဘိုးတော်ကျောင်းတို့တွင် စစ်ဘေးရှောင် များ ဆက်လက်တိမ်းရှောင် ခိုလှုံနေပြီး စားနပ်ရိက္ခာများ လိုအပ်နေကြောင်း သိရသည်။
အလားတူ လားရှိုး၊ ကျောက်မဲနှင့် သီပေါမြို့တွင်း တိုက်ပွဲများကြောင့် ကျေးသီးမြို့သို့ ရောက်ရှိလာသည့် စစ်ဘေးရှောင် (၅၀၀) ကျော်သည် (၃) လကျော်ကြာ တိမ်းရှောင်နေပြီးနောက် လက်ရှိတွင် စားဝတ်နေရေး ခက်ခဲသည့်အပြင် စောင်နှင့် အနွေးအထည် အဝတ်အစားများ လိုအပ်နေကြောင်း စစ်ဘေးရှောင်များထံမှ သိရသည်။
Leave a Comments