ရွှေ့ပြောင်းအလုပ်သမားများအတွက် မည်သူမည်ဝါဖြစ်ကြောင်း သက်သေခံလက်မှတ် Certificate of Identity (CI) ထုတ်ပေးသည့်စင်တာတစ်ခုကို ထိုင်းနိုင်ငံ စမွတ်ဆာခွန်းခရိုင်တွင် ပြန်ဖွင့်ပေးမည်ဖြစ်ကြောင်း စုံစမ်းသိရသည်။

နိုဝင်ဘာလမှစတင်ပြီး ထိုင်းနိုင်ငံအတွင်း အလုပ်လုပ်နေသည့် မြန်မာအပါအဝင် ရွှေ့ပြောင်းအလုပ်သမား များအတွက် မည်သူမည်ဝါဖြစ်ကြောင်း သက်သေခံလက်မှတ်စာအုပ် လျှောက်ထားနိုင်သည့် CI စင်တာတစ်ခုကို စမွတ်ဆာခွန်းခရိုင်၌ ဖွင့်ပေးမည်ဖြစ်ကြောင်း ထိုင်းအလုပ်သမားဝန်ကြီး Phiphat က (အောက်တိုဘာလ ၂၁ ရက်နေ့) အလုပ်သမား စီမံခန့်ခွဲရေးအစည်းအဝေးတွင် ပြောကြားခဲ့သည်။

သို့သော် CI စင်တာဖွင့်မည့်ရက် အတိအကျကို မသိရှိရသေးပေ။

“ဟုတ်ပါတယ်။ CI စင်တာတစ်ခုကို စမွတ်ဆာခွန်းခရိုင်မှာ နောက်လကျရင် ပြန်ဖွင့်ပေးမှာပါ။ ဖွင့်တာက ဘယ်သူအတွက်လဲဆိုတော့ ပြီးခဲ့တဲ့ ၂၀၂၃ ခုနှစ်တုန်းက စာရင်သွင်းထားတဲ့သူတွေ၊ မလုပ်ရသေးတဲ့အတွက်ကို ဦးစားပေးပြီး လုပ်ပေးမှာပါ။ အခုမှလာတဲ့သူတွေကိုတော့ စာအုပ်အသစ်မလုပ်ပေးဘူး” ဟု MAP Foundation မှ ရွှေ့ပြောင်းအလုပ်သမားအရေး ကူညီပေးသူ ပီထောင်းခမ်းက ပြောသည်။

CI စင်တာကို ၂၀၂၄ ခုနှစ် နိုဝင်ဘာလမှ ၂၀၂၅ ခုနှစ် ဧပြီလအထိ ဖွင့်လှစ်ပေးမည်ဖြစ်ပြီး စာအုပ်လုပ်မည့် လူဦးရေများတိုးလာပါက CI စင်တာသစ်တွေ ခရိုင်အသီးသီးမှာ ထပ်ဖွင့်ပေးမည်ဟုလည်း ထိုင်းအလုပ်သမားဝန်ကြီးက ပြောထားသည်။

မြန်မာဘက်မှ တောင်းဆိုလာခြင်းကြောင့် CI စာအုပ်ထုတ်ပေးသည့် စင်တာအားလုံးကို ဇူလိုင်ထဲတွင် ပိတ်လိုက်ပြီးသည့်နောက် ယခုစင်တာအသစ်ကို ပြန်ဖွင့်ပေးခြင်း ဖြစ်သည်။

“အခုမြန်မာနိုင်ငံမှာ စစ်ရေး၊ နိုင်ငံရေး အမျိုးမျိုးကြောင့် ထိုင်းနိုင်ငံထဲကို လာကြတဲ့သူတွေအများကြီး ရှိပါတယ်။ တကယ်လို့ ထိုင်းအစိုးရဘက်က အခုလာတဲ့သူတွေအတွက် စာအုပ်အသစ်မြန်မြန်မထုတ်ပေးနိုင်ဘူးဆိုရင်တော့ ကျနော်တို့ မြန်မာ့အလုပ်သမားတွေ ပိုပြီးအကြပ်အတည်းရောက်လိမ့်မယ်။ အခုလာကြတဲ့သူတွေက ပိုက်ဆံတွေသိန်းချီကုန်ခံပြီးလာရတဲ့အပြင် ထိုင်းနိုင်ငံမှာ အထောက်အထားမရှိလို့ အလုပ်မရတဲ့သူတွေလည်း အများကြီးရှိပါတယ်” ဟု ရွှေ့ပြောင်းအလုပ်သမားအရေး ကူညီပေးသူ ပီထောင်းခမ်းက ထပ်လောင်းပြောသည်။

ထိုင်းရောက်မြန်မာရွှေ့ပြောင်းအလုပ်သမားအနေဖြင့်လည်း ထိုင်းနိုင်ငံမှ သတ်မှတ်ထားသော စည်းမျဉ်းစည်းကမ်းများနှင့်အညီ လိုက်နာသင့်ကြောင်း၊ အထောက်အထားများ မပြည့်စုံပါက ဆင်ခြင်ပြီးနေသင့်ကြောင်းလည်း ပီထောင်းခမ်းက တိုက်တွန်းထားသည်။

ထိုင်းအစိုးရ၏ နိုင်ငံတွင်း တရားမဝင်အလုပ်သမား ရှာဖွေဖမ်းဆီးခြင်း ရက် ၁၂၀ စီမံကိန်းအတွင်း မြန်မာအလုပ်သမား ဦးရေ ၂၁၀,၀၀၀ နီးပါး ဖမ်းဆီးရမိကြောင်း ထိုင်းအလုပ်သမားဝန်ကြီးဌာနက အောက်တိုဘာလ ၅ ရက်နေ့က ထုတ်ပြန်ထားသည်။