ကိုးကန့် မြို့တော်ဖြစ်သည့် လောက်ကိုင်မြို့ကို စစ်ကောင်စီက ယနေ့ (အောက်တိုဘာလ ၂၇ ရက်) ည ၁၂ နာရီကျော်တွင် လေကြောင်းမှ ဗုံး ၂ ကြဲချ တိုက်ခိုက်ခဲ့သောကြောင့် ထိခိုက် ပျက်စီးမှုများရှိကြောင်း သတင်းရင်းမြစ်က ပြောသည်။

စစ်ကောင်စီကို တုန်လှုပ်စေခဲ့သည့် ညီနောင်မဟာမိတ်များ၏ “၁၀၂၇ စစ်ဆင်ရေး” တနှစ်ပြည့်နေ့တွင် လောက်ကိုင်မြို့ကို စစ်ကောင်စီ ဗုံး ၂ ကြိမ်ကြဲချ တိုက်ခိုက်ရာ မြို့တွင်း အဆောက်အအုံများ ထိခိုက် ပျက်စီးမှု ရှိခဲ့ကြောင်း သိရသည်။

“လူထိခိုက် သေဆုံးမှုရှိမရှိ မသိသေးဘူး” ဟု သတင်းရင်းမြစ်က ဆိုသည်။

ယနေ့ ကျရောက်သည့် ၁၀၂၇ စစ်ဆင်ရေး တစ်နှစ်ပြည့်နေ့တွင် သျှမ်းမြောက် ဒေသကို စစ်ကောင်စီ လေကြောင်းက ပြင်းပြင်းထန်ထန် တိုက်ခိုက်မည် ဆိုသည့် သတင်းများ ထွက်ပေါ်ခဲ့ပြီးနောက် ယခုကဲ့သို့ တိုက်ခိုက်ခဲ့ခြင်း ဖြစ်သည်။

ယနေ့ လောက်ကိုင်မြို့ အပြင် သျှမ်းမြောက်ရှိ တော်လှန်ရေးတပ်များ သိမ်းပိုက်ထားသည့် မြို့ရွာများကို စစ်ကောင်စီ လေကြောင်းမှ တိုက်ခိုက်ခြင်း ရှိ၊ မရှိ ဆက်လက် စုံစမ်းနေဆဲ ဖြစ်သည်။

လက်ရှိ တရုတ်နိုင်ငံသည် စစ်ကောင်စီ အလိုကျ သျှမ်းမြောက် တော်လှန်ရေးတပ်များ စစ်ရပ်တန့်ရေး ဖိအား ကြီးမားစွာ ပေးနေရာ အထူးသဖြင့် လားရှိုးမြို့မှ ကိုးကန့်တပ်များ ပြန်လည် ဆုတ်ခွာရေး ဖိအားပေးနေသည့် နည်းတူ စစ်ကောင်စီကလည်း လေကြောင်းမှ ဗုံးကြဲ တိုက်ခိုက်ခြင်းဖြင့် ဖိအားပေးနေကြောင်း စစ်ရေးလေ့လာသူများက သုံးသပ်ထားသည်။

ပြီးခဲ့သည့် ရက်ပိုင်းကလည်း ကိုးကန့်တပ် ထိန်းချုပ်ထားသည့် လားရှိုးနှင့် သိန္နီမြို့ကို စစ်ကောင်စီ လေကြောင်းက တိုက်ခိုက်ခဲ့ရာ အရပ်သား ထိခိုက် သေဆုံးမှုများ ရှိခဲ့သည်။