သျှမ်းပြည်တောင်ပိုင်း၊ လွိုင်လင်မြို့နယ်တွင် ရေဘေးကြောင့် မြေပြိုခဲ့သော နောင်စံဖူးကျေးရွာမှ ဘုန်းကြီးကျောင်းနှင့် နေအိမ်အချို့ ပျက်စီးဆုံးရှုံးမှုများရှိကြောင်းသိရသည်။

စက်တင်ဘာလ ပထမအပတ်မှ မိုးသည်းထန်စွာရွာသွန်းခဲ့ပြီးနောက် လွိုင်လင်မြို့နယ် နောင်စံဖူးကျေးရွာ အတွင်း မြေပြို၊ မြေကွဲမှုများဖြစ်ပေါ်ခဲ့သောကြောင့် နေအိမ် ၁၁ လုံးနှင့် ကျေးရွာဘုန်းကြီးကျောင်းရှိဇရပ်တစ်လုံး ပျက်စီးဆုံးရှုံးခဲ့သည်။

လက်ရှိတွင် ကျေးရွာတွင်းဒေသခံများ ပြောင်းရွေ့နေထိုင်နေရပြီး အကူအညီများစွာ လိုအပ်နေကြောင်း  သွားရောက် ကူညီပေးနေသည့် မိုင်းပွန်မြို့ မင်္ဂလာဦးကျောင်းဆရာတော်မှ သျှမ်းသံတော်ဆင့်သို့ မိန့်ကြားသည်။ 

“ရွာက တောင်ပြို၊ မြေတွေကွဲပြီး အိမ်း ၁၁ လုံး ပျက်စီးတယ်၊ အနီးနားကအိမ်ခြေကလူတွေကလည်း ညညဆို တောင်တွေ၊ မြေကြီးတွေလှုပ်နေပြီး အသံကျယ်ကြီးကြားရတယ်လို့ပြောတယ်၊ ကိုယ့်အိမ်ကိုယ် လန့်ပြီး မအိပ်ရဲကြဘူး အနီးနားက ကျေးရွာရပ်ကွက်တွေဆီပြောင်းနေရတယ်” ဟု ဆရာတော် ဦးဝိဇ္ဇာနန္ဒ ကမိန့်သည်။ 

ကျေးရွာဒေသခံများမှာ တောင်ပြိုမည့် အန္တရာယ်ကို စိုးရိမ်သောကြောင့် ညဘက်တွင် မိမိတို့၏ နေအိမ်များတွင် မအိပ်ရဲကြကြောင်းသိရသည်။ 

နောင်စံဖူးကျေးရွာသည် အိမ်ခြေ ၁၂၀ ခန့်ရှိကာ မိုင်းပွန်မြို့နယ်မှ ၁ နာရီခွဲ့ခန့်သွားရပြီး လက်ရှိတွင် တောင်ပြို၊ မြေပြိုမှုများကြောင့် ကားများဝင်၍မရတော့ပဲ ဆိုင်ကယ်များဖြင့်သာဝင်၍ရကြောင်း ဆရာတော်မှ မိန့်ကြားသည်။

“တောဖက် ဆိုတော့ လျှပ်စစ်မီးမရှိ ဖုန်းလိုင်းမရှိ၊ ဖုန်းဆက်ချင်ရင် လိုင်းမိတဲ့ တောင်ပေါ်တက်ပြီး ခြင်အကိုက်ခံပြီးပြောရတယ်၊ အလှူရှင်တွေမသိကြတော့၊ ဦးဇင်းပဲ ဦးစီးပြီးအကူအညီတောင်းရတာ” ဟု ဆရာတော်က မိန့်သည်။ 

နောင်စံဖူးရွာဒေသခံများမှာ ကော်ဖီ၊ ထောပတ်၊ လက်ဖက်စသည်တို့ကို စိုက်ပျိုးကြပြီး လက်ရှိမြေပြိုမှုကြောင့် ခြံများပျက်စီးဆုံးရှုံးမှုများရှိကြောင်းလည်း သိရသည်။

စက်တင်ဘာလအတွင်း မုန်းတိုင်ရာဂီတိုက်ခတ်မှုကြောင့် သျှမ်းပြည်တောင်ပိုင်းတွင် မိုးသည်းသန်စွာရွာသွန်းခဲ့ပြီး နေရာအနှံ့ ရေကြီးမှုများစွာကြုံတွေ့ခဲ့ရပြီး လက်ရှိတွင်လည်း နောက်ဆက်တွဲ မြေပြိုမှု အန္တရာယ်များကို ပြည်သူအများအပြား ရင်ဆိုင်ကြုံတွေ့နေရပြီး ပြန်လည်ထူထောင်ရေးအတွက် အကူအညီများစွာလိုအပ်နေကြကြောင်း သိရသည်။

အလုပ်သင် သတင်းထောက် ယူဂျင်း ရေးသားသည်။