သျှမ်းပြည် လွိုင်လင်မြို့နယ်ရှိ လွိုင်လင်၊ ပင်လုံနှင့် မိုင်းပွန်မြို့များတွင် စစ်ကော်မရှင် ကျင်းပပြုလုပ်သည့် ရွေးကောက်ပွဲတွင် ဆန္ဒမဲပေးသူ နည်းပါးကြောင်း စုံစမ်းသိရသည်။
ယနေ့ (ဒီဇင်ဘာလ ၂၈ ရက်) တွင် စစ်ကော်မရှင် စတင်ကျင်းပသည့် ရွေးကောက်ပွဲ ပထမပိုင်းတွင် လွိုင်လင်မြို့နယ်လည်း ပါဝင်ပြီး လွိုင်လင်မြို့၊ ပင်လုံမြို့၊ မိုင်းပွန်မြို့နှင့် ကျေးရွာများဘက်ရှိ မဲရုံများတွင် ဆန္ဒမဲပေးသူ နည်းပါးကြောင်း လွိုင်လင်မြို့နယ် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ပြီးခဲ့တဲ့ နှစ်တွေကလို လူမများဘူး လွိုင်လင်မှာလည်း။ မဲလာထည့်တဲ့ လူတွေလည်း နည်းတယ် ဒီနှစ်က။ လုံခြုံရေးကိုလည်း ရဲတွေ လာစောင့်တာ”ဟု လွိုင်လင်မြို့နယ် ဒေသခံ အမျိုးသမီးတစ်ဦးက ပြောသည်။
အလားတူ လွိုင်လင်မြို့နယ်အတွင်းရှိ မိုင်းပွန်မြို့တွင်လည်း ဆန္ဒမဲပေးရန် မဲစာရင်း၌ အမည်မပါသူ များသည့်အပြင် မဲရုံများတွင် အမှန်တကယ် မဲလာပေးသူ အရေအတွက်လည်း နည်းပါးကြောင်း မိုင်းပွန်မြို့ဒေသခံ အမျိုးသားတစ်ဦးက ဆက်ပြောသည်။
“မဲရုံ ၃ ရုံ ရှိတယ်၊ အခြေအနေက အရင်နဲ့မတူဘူး။ ပြီးခဲ့တဲ့ နှစ်တွေတုန်းက ၅ ရက်အလို ဆိုရင် လူတွေက စိတ်လှုပ်ရှားနေကြတာ။ မနက်တုန်းကတော့ လူတွေလည်းမရှိဘူး၊ အရင်တုန်းကဆိုရင် လူတွေ ပြည့်နေတာပဲ”ဟု မိုင်းပွန်မြို့ခံ ၎င်းအမျိုးသားက ပြောသည်။
လွိုင်လင်မြို့နယ်အတွင်း မဲရုံပေါင်း (၆၈) ရုံရှိကြောင်း သိရပြီး အဆိုပါ မဲရုံများတွင် စစ်ကော်မရှင်တပ်သားများ၊ ၎င်းလက်အောက်ခံ ရဲတပ်ဖွဲ့ဝင်များနှင့် မဲရုံစောင့် တာဝန်ကျသူများက လုံခြုံရေးတာဝန်ယူ စောင့်ကြည့်ပေးခဲ့ရကြောင်း သိရသည်။
လွိုင်လင်မြို့နယ် မဲဆန္ဒနယ်အတွက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) ၊ တိုင်းရင်းသား စည်းလုံးညီညွတ်ရေးပါတီ (NUP)၊ ပအိုဝ်းအမျိုးသားအဖွဲ့ချုပ်ပါတီ (PNO)နှင့် တစ်သီးပုဂ္ဂလ ကိုယ်စားလှယ်လောင်းများ ဝင်ရောက်ယှဉ်ပြိုင်ကြသည်။
စစ်ကော်မရှင် ကျင်းပသည့် ရွေးကောက်ပွဲ ပထမပိုင်းတွင် သျှမ်းပြည်မှ မြို့နယ်ပေါင်း ၁၂ ခု ပါဝင်ပြီး ၎င်းမြို့များမှာ ပင်းတယ၊ ဟိုပုံး၊ နောင်ချို၊ ကျိုင်းတုံ၊ တာချီလိတ်၊ တောင်ကြီး၊ နမ့်စန်၊ မူဆယ်၊ မိုင်းဆတ်၊ လားရှိုး၊ လင်းခေးနှင့် လွိုင်လင်မြို့နယ်တို့ ဖြစ်သည်။
Leave a Comments