သျှမ်းပြည် မြောက်ပိုင်း၊ နောင်ချိုမြို့ပေါ်ကို စစ်ကောင်စီ လေကြောင်းမှ ထပ်မံ ဗုံးကြဲတိုက်ခိုက်ခဲ့ပြီး တောင်းခမ်းတွင် တိုက်ပွဲများ ပြင်းထန်နေကြောင်း သတင်းရရှိသည်။

ယနေ့ (အောက်တိုဘာလ ၂၁ ရက်)၊ နံနက် ၁ နာရီ ဝန်းကျင်တွင် နောင်ချိုမြို့ပေါ် စစ်ကောင်စီ လေကြောင်း စုစုပေါင်း ဗုံး ၁၂ လုံး ကြဲချ တိုက်ခိုက်ရာ သပြေရပ်နှင့် ပါဟတ် ရပ်ကွက်ရှိ လူနေအိမ်နှင့် ဆိုင်များ ပျက်စီးပြီး အရပ်သား ထိခိုက် ဒဏ်ရာရမှုများရှိကြောင်း ဒေသခံများက ဆိုသည်။

ထို့အပြင် နောင်ချိုမြို့နယ်၊ ဂန့်ဂေါ် နှင့် တောင်းခမ်းဒေသတို့တွင် စစ်ကောင်စီတပ်နှင့် TNLA ပူးပေါင်းတပ်ဖွဲ့တို့ ပြီးခဲ့သည့် (အောက်တိုဘာလ ၁၉ ရက်) မှ ယနေ့ (အောက်တိုဘာလ ၂၁ ရက်) အထိ တိုက်ပွဲများ ပြင်းထန်နေကြောင်း အသက် ၃၀ ဝန်းကျင် နောင်ချို ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“ဒီမနက် ကတည်းကနေ ဒီနေ့ အခုချိန်ထိ လက်နက်ကြီး/ငယ် လေယာဉ်သံတွေ ကြားနေရတာ၊ တိုက်ပွဲတွေက တော်တော် ပြင်းနေတာ။ ဒီမနက်ကတော့ လက်နက်ကြီးသံက ပိုကျယ်လာတယ်။ တိုက်ပွဲဖြစ်နေတာကလည်း နှစ်နေရာ ဖြစ်နေတာ၊ ဂန့်ဂေါ် မှာကော တောင်းခမ်းနေမှာကော ၃ ရက်ဆက်တိုက်ပေါ့ တိုက်ပွဲတွေ ဖြစ်နေတာ။” ဟု ၄င်းကပြောသည်။

တိုက်ပွဲဖြစ်ပွားနေသည့် အနီးတဝိုက် ဒေသနေ ကျေးရွာခံများ ဆွေမျိုးအိမ်၊ နီးစပ်ရာကျေးရွာနှင့် နောင်ချိုမြို့သို့ ထွက်ပြေး တိမ်းရှောင်နေရကြောင်း ၎င်းက ဆက်ပြောသည်။

“မနေ့က လက်နက်ကြီးတွေနဲ့ ပစ်တော့ ဘေးကရွာတွေကိုလည်းကျတယ်လို့ သိရတယ်။ ဘေးရွာက ဒေသခံတွေ လည်း မနေ့ညက ထွက်ပြေးလာကြတယ်။ ထိခိုက်တာကတော့ ကျနော်တို့လည်း မသိရသေးဘူး။ အများစု ကတော့ ဆွေမျိုးတွေဆီ ထွက်ပြေးနေကြရတာ”ဟု ဒေသခံ အမျိုးသားက ဆက်ပြောသည်။

တိုက်ပွဲများကြောင့် ဒေသခံများ ထွက်ပြေးနေရပြီး လယ်ယာစိုက်ခင်းများ အတွက် စိုးရိမ်ရသည့်အပြင်၊ လက်နက်ကြီး၊ လေကြောင်းဖြင့် ထပ်မံဗုံးကြဲ တိုက်ခိုက်ခံ ရမည်ကို စိုးရိမ်ကြောင်း နောင်ချို ဒေသခံ နောက်တစ်ဦးက ပြောသည်။

“တချို့တွေက လယ်တွေ ကျွဲနွားတွေရှိလည်း ယူပြေးမရတော့ သွားကြည့်ဖို့လည်း သွားမကြည့် ရဲကြဘူး။ တိုက်ပွဲတွေကြောင့် လုပ်ထားတဲ့ လယ်ယာတွေ မသိမ်းရမှာကိုလည်း စိုးရိမ်တယ်။ လက်နက်ကြီးတွေ လေယာဉ်တွေကလည်း နေ့ ညမရွှေး ပစ်နေတာဆိုတော့ ကြောက်နေရတယ်”ဟု ၎င်းကပြောသည်။

တောင်ခမ်းဒေသတွင် ယနေ့ ညနေပိုင်းအထိ တိုက်ပွဲများ ပြင်းထန်နေကြောင်း၊ စစ်ကောင်စီ လေကြောင်း အသုံးပြု ခုခံနေကြောင်း၊ တိုက်ပွဲများ ဆက်လက် ပြင်းထန်နေမည်ဟု သုံးသပ်ကြောင်း စစ်ရေးသတင်းရင်းမြစ်က အတည်ပြုသည်။

လက်ရှိ တိုက်ပွဲများ ဖြစ်ပွားနေသည့် တောင်ခမ်းကျေးရွာသည် နောင်ချိုမြို့နှင့် ၂၅ မိုင်ခန့် ကွာဝေးပြီး၊ ဂန့်ဂေါ်ကျေးရွာ သည် နောင်ချိုမြို့ နှင့် ၁၅ မိုင်ကျော် ကွာဝေးကြောင်း ဒေသခံများက ပြောသည်။

တောင်ခမ်းဒေသတွင် စစ်ကောင်စီ၏ အရေးကြီး အမြောက်တပ် ဌာနချုပ်အပါအဝင် တပ်စခန်း ၄ ခု အထိုင်ချ တပ်စွဲထားပြီး စစ်ရေးအရ အရေးပါသဖြင့် TNLA ပူးပေါင်းတပ်ဖွဲ့၏ နှစ်လကျော်ကြာ ထိုးစစ်ဆင်မှုကို အသည်းအသန် ခုခံကာကွာနေခြင်း ဖြစ်သည်။

ယခုရက်ပိုင်း အတွင်း စစ်ကောင်စီက နောင်ချိုမြို့နယ်ကို ဖုန်းနှင့် အင်တာနက်လိုင်းများ ဖြတ်တောက်ပြီး လေကြောင်းမှ ဆက်တိုက် ဗုံးကြဲ တိုက်ခိုက်လျက်ရှိရာ (အောက်တိုဘာလ ၁၉ ရက်) တွင် နောင်ချိုမြို့ပေါ်ရှိ အရပ်ဘက် ပစ်မှတ်များကို လေကြောင်းက ဗုံးနှစ်ကြိမ် ကြဲချသဖြင့် အရပ်သား ထိခိုက်သေဆုံးမှုများ ရှိခဲ့သည်။

နောင်ချိုမြို့ကို ၁၀၂၇ စစ်ဆင်ရေးကာလ (စက်တင်ဘာလ ၁၃ ရက်) တွင် တအာင်း(ပလောင်) အမျိုးသားလွတ်မြောက်ရေး တပ်မတော်-TNLA ၊ ဓနုပြည်သူ့လွတ်မြောက်ရေးတပ် DPLA နှင့် PDF ပူးပေါင်းတပ်ဖွဲ့တို့က အပြီးသတ် သိမ်းပိုက်နိုင်ခဲ့သည်။