သျှမ်း-မန္တလေးနယ်စပ် မိုးကုတ်နှင့် မိုးမိတ်မြို့နယ်ရှိ ရွှေမျှောလုပ်ကိုင်သူများကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA မှ ရွှေ(၁၀)ပိဿာ အခွန်ကောက်ခံခဲ့ရာ မပေးဆောင်နိုင်သည့် ရွှေမျှောပိုင်ရှင်များ ထွက်ပြေးတိမ်းရှောင်နေရကြောင်း စုံစမ်းသိရသည်။

ပြီးခဲ့သည့် စက်တင်ဘာလကုန်တွင် ပေးဆောင်ရန် TNLA မှ မိုးကုတ်နှင့် မိုးမိတ်တကြောရှိ ရွှေမျှောပိုင်ရှင်များထံ ရွှေ(၁၀)ပိဿာ အခွန်ကောက်ခံခဲ့ရာ ကောက်ခံခဲ့ရာ ခွဲတမ်းကျ သတ်မှတ်လိုက်သော်လည်း မြစ်ဆုံနှင့် မိုးဟောက်ရွှေတောဘက်မှ မျှောပိုင်ရှင်အချို့မှာ အခွန်မပေးဆောင်နိုင်ခြင်းကြောင့် မန္တလေးဘက်သို့ ထွက်ပြေးတိမ်းရှောင်နေရကြောင်း မိုးမိတ်ဒေသခံများက ပြောသည်။

“မျှောတွေကို ခွဲတမ်းတော့ ပစ်ထားပြီ၊ တချို့လည်း မပေးနိုင်လို့ မန္တလေးဘက်ကို ရှောင်ကြတယ်။ အခုလောလောဆယ်တော့ သူတို့ TNLA က ရက်ပြန်ဆုတ်ပေးတာပေါ့။ ရက်ထက်တိုးထားပေးတာ ဒီလကုန်အထိပဲ။ လုံးဝ မပေးနိုင်တဲ့လူကတော့ မျှောထဲကနေ စက်တွေထုတ်ပြီးတော့မှ အပြင်ထွက်နေပေါ့ အဲ့လို”ဟု မိုးမိတ်ဒေသခံ ရွှေမျှောလုပ်ကိုင်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုးကုတ်နှင့် မိုးမိတ်မြို့နယ်ရှိ ရွှေမျှောပိုင်ရှင်များမှာ TNLA က ကောက်ခံသည့် ရွှေ(၁၀)ပိဿာကို ခွဲတမ်းချလိုက်သည့်အခါ မျှောပိုင်ရှင်တစ်ဦးလျှင် ရွှေတစ်ဆယ်သားခန့် ကျသင့်သော်လည်း လုပ်ငန်းမလည်ပတ်နိုင်ခြင်းကြောင့် မတတ်နိုင်ကြကြောင်း ရွှေမျှောပိုင်ရှင်များထံမှ သိရသည်။

လက်ရှိတွင် ၎င်းရွှေမျှောများ လည်ပတ်နိုင်ရန် ဒီဇယ်ဆီ အခက်အခဲများနှင့်လည်း ရင်ဆိုင်နေရပြီး ရွှေခွန်ကိစ္စကို ပြန်လည်သတ်မှတ်ပေးရန် TNLA တပ်ဖွဲ့နှင့် ပြန်လည်ညှိနှိုင်းနေကြောင်း ဒေသခံများက ပြောဆိုသည်။

“ဒီဇယ်မှ လောက်လောက်ငှငှ မရတာကိုး၊ ဒီနောက်ပိုင်းဆို ရေကလည်း ရှားတော့မှာလေ။ ဆီလည်း မရှိဘူး၊ ရေလည်း မရှိဘူးဆိုရင် ဒုက္ခရောက်မှာလေ။ ပေးကြေးကမ်းကြေးနဲ့ဆို မလွယ်ဘူး။ အဲ့တာ အခွန်ဈေးနှုန်းကို ပြန်သတ်မှတ်မှာလားတော့ မသိဘူး။ မလုပ်စားရတဲ့ အခါကျတော့လေ ဒီကတော့ အသနားခံစာလို ပုံစံမျိုးလည်း တင်နေကြတယ်”ဟု မိုးမိတ်ဒေသခံ ရွှေမျှောပိုင်ရှင်တစ်ဦးက ဆက်ပြောသည်။

စစ်ကောင်စီတပ်မှ သျှမ်းပြည်မြောက်ပိုင်းသို့ စက်သုံးဆီ သယ်ဆောင်ခွင့်ကို ကန့်သတ်ထားပြီး မတ္တရာနှင့် သပိတ်ကျင်းဘက်မှလည်း ဖြတ်သန်းခွင့်မပြုခြင်းကြောင့် မိုးကုတ်နှင့် မိုးမိတ်ဘက်တွင် ဒီဇယ်အခက်အခဲကြောင့် ရွှေမျှောများ လုပ်ငန်းမလည်ပတ်နိုင်ကြောင်း ၎င်းအမျိုးသားက ရှင်းပြသည်။

“အဓိက ဆီရရင် လုပ်နိုင်တယ်၊ ဆီက သျှမ်းမြောက်တကြော စစ်ကောင်စီက ပိတ်ထားတော့ မှောင်ခိုဈေးနဲ့ဆို အဆမတန် တက်တယ်လေ။ အလုပ်က မလုပ်ရတဲ့အခါကျတော့ လစဉ်ကြေးလို ပုံစံမျိုးနဲ့ ငွေနဲ့ ဖြတ်မယ်ပေါ့။ အဲ့လိုပုံစံတော့ ညှိနေကြတယ်။ သူက ရွှေကျတော့ တစ်နှစ်စာလေ၊ လစဉ်ကြေးကျတော့ လုပ်တဲ့လကို ငွေသတ်မှတ်ပြီးတော့ ငွေပေးမယ်ပေါ့”ဟု ၎င်းရွှေမျှောပိုင်ရှင်က သျှမ်းသံတော်ဆင့်ကို ပြောသည်။

အလားတူ မိုးကုတ်၊ မိုးမိတ်ဘက်တွင် ရွှေကောက်သူ၊ ရွှေလှော်သူနှင့် ရွှေ့သန့်စင်ပေးသူ များကိုလည်း ရွှေမျှောပိုင်ရှင်များနည်းတူ TNLA မှ အခွန်ကောက်ခံနေခြင်းကြောင့် မန္တလေးမြို့ရှိ ရွှေပေါက်ဈေးနှင့် ဈေးအဆမတန် ခွာ၍ ရောင်းဝယ်နေရခြင်းကြောင့် တွက်ခြေမကိုက်ဘဲ လုပ်ငန်းရပ်နားထားရသည်အထိ ရှိလာကြောင်း ဒေသခံများထံမှ သိရသည်။