သျှမ်းပြည် ပင်လောင်းမြို့နယ် လဲလောင်းကျေးရွာအတွင်း တိုက်ပွဲများဆက်လက်ပြင်းထန်နေပြီး ပအိုဝ်း ပြည်သူ့စစ် (PNO/PNA) က စစ်အင်အားဖြည့်တင်းနေကြောင်း စုံစမ်းသိရသည်။
ပင်လောင်းမြို့နယ်ရှိ လဲလောင်းကျေးရွာ၊ နောင်ဝိုးကျေးရွာ၊ နမ့်ဖာမူကျေးရွာ၊ လင်ခမ်းကျေးရွာ စသည့်ကျေးရွာများတွင် အောက်တိုဘာလ ပထမပတ်မှစကာ စစ်ကောင်စီ၊ ပအိုဝ်းပြည်သူ့စစ် (PNO/PNA) တို့ပူးပေါင်းပြီး စစ်အင်အားဖြည့်ကာ စစ်ကြောင်းထပ်မံတိုးထားသဖြင့် ကရင်နီ တော်လှန်ရေးတပ်ပေါင်းစုများနှင့် ထိတွေတိုက်ပွဲ ပြင်းထန်မှုဖြစ်ပွားနေကြောင်း လဲလောင်းကျေရွာမှ ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ဒီလ ပထမအပတ်မှာ တိုက်ပွဲစဖြစ်တယ်။ လဲလောင်းနေရာကို အခြေစိုက်ပြီးတိုက်ကြတယ်။ ကျန်တဲ့ရွာတွေက လမ်းဘေးဖြစ်နေတယ်။ စစ်တပ်နဲ့ PNO တွေပေါင်းပြီး စစ်ထိုးကြတယ် PNOဘက်လည်း စစ်အင်အားတွေ နေတိုင်းဖြည့်နေတယ် ကားတွေနဲ့နေ့တိုင်းသွားတယ်” ဟု ၎င်းကပြောသည်။
ပင်လောင်းမြို့နယ် ဗန်းမောက်ကျေးရွာသည် ပြီးခဲ့သည့် မတ်လတွင် စစ်ကောင်စီနှင့် တော်လှန်ရေး တပ်ပေါင်းစုကြား တိုက်ပွဲပြင်းထန်ခဲ့ပြီး ဒေသခံများ ထွက်ပြေးတိမ်းရှောင်နေရကြောင်း သိရသည်။
လက်ရှိတိုက်ပွဲပြင်းထန်နေပြီး ပြည်သူများ ထပ်မံတိမ်းရှောင်နေရပြီး ထိုတိုက်ပွဲတွင် စစ်ကောင်စီနှင့် PNOဘက် အထိအခိုက်များကြောင်း တော်လှန်ရေးတပ်သား တစ်ဉီးက သျှမ်းသံတော်ဆင့်ကိုပြောသည်။
“ပြီးခဲ့တဲ့ မတ်လတုန်းလည်း တိုက်ပွဲတွေဖြစ်လို့ ရွာက စစ်ရှောင်နေကြတယ်။ အခုဆို အကုန်ရှောင်ကုန်ပြီ ဘယ်သူမှ မနေရဲကြတောဘူး။ စစ်တပ်က ဗုံးလာကြဲချင်ရင် လာကြဲတယ်။ ပြည်သူတွေကိုပဲ ထိခိုက်တယ်”ဟု ၎င်းကပြောသည်။
ပြီးခဲ့သည့် စက်တင်ဘာ ၁၇ရက်တွင်လည်း ပင်လောင်းမြို့နယ် အတွင်း တိုက်ပွဲ ဖြစ်ပွားမှုမရှိဘဲ စစ်ကောင်စီ လက်နက်ကြီး တဖက်သတ် ပစ်ခတ်မှုကြောင့် ဗန်းမောက်ကျေးရွာ ဒေသခံ တစ်ဦး ဒဏ်ရာပြင်းထန်စွာ ရရှိခဲ့ကြောင်း သတင်းရရှိသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments