သျှမ်းပြည် အရှေ့ပိုင်း မိုင်းဆတ်မြို့တွင် တစ်လကျော်ကြာ လမ်းပန်းဆက်သွယ်ရေးပြတ်တောက်မှုကြောင့် ကုန်သွယ်ရေးခက်ခဲကာ အခြေခံစားသောက်ကုန်များ ဈေးနှုန်းမြင့်တက်နေကြောင်း စုံစမ်းသိရသည်။

ပြီးခဲ့သည့်လ (စက်တင်ဘာ ၁၀ ရက်) တွင် မိုးရွာသွန်းမှုကြောင့် မိုင်းဆတ်-တာချီလိတ်သွားသည့် ဆိုက်ခေါင်တံတားသည် တောင်ကျရေတိုက်စားမှုကြောင့် ပျက်စီးခဲ့သည်။

ပြီးခဲ့သည့် စက်တင်ဘာလ ဒုတိယပတ်မှစပြီး မိုင်းဆတ်-တာချီလိတ်ကို ဆက်သွယ်သော လမ်း၊ တံတားများ စတင်ပြတ်တောက်သွားပြီး အခြေခံစားသောက်ကုန်များ ဈေးနှုန်းမြင့်တက်ခဲ့ကြောင်း မိုင်းဆတ်မြို့ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

လက်ရှိ မိုင်းဆတ်မြို့တွင် ဆန် (၈) ပြည့်ဆံ့ ဆန်တစ်အိမ်လျှင် ကျပ်ငွေ ၅ သောင်းခွဲ၊ ကြက်ဉ တစ်လုံးလျှင် ကျပ်ငွေ ၆၀၀ ၊စားသုံးဆီ ၂ လီတာ တစ်ဗူးလျှင် ကျပ်ငွေ ၂ သောင်းခွဲ ခန့် ရှိပြီး အခြေခံစားသောက်ကုန်းများ ယခင်ထက် ၃ ပုံ ၁ ပုံ မြန်မာငွေ ၁ သောင်းခွဲမှ ၂ သောင်း ခွဲထိ ဈေးနှုန်းမြင့်တက်နေကြောင်း ၎င်းက ဆက်ပြောသည်။

“လမ်းတွေတံတားတွေကျိုးတော့ ခက်ခဲတယ်။ အခုက ဒီလိုတွေဖြစ်နေတော့ ကုန်ဈေးနှုန်းတွေတက်တယ်။ သူတို့က ကုန်ပစ္စည်းတွေကို ကမ်းကူးတဲ့အချိန် ပိုက်ဆံထပ်ကုန်ရတော့ ကုန်ဈေးနှုန်းတွေကတက်တာပေါ့။ သွားလို့မရတာ ၁ လပြည့်ပြီ။ ကားတွေ သွားလာလို့မရသေးဘူး။” ဟု မိုင်းဆတ်မြို့ ဒေသခံအမျိုးသားတစ်ဦးက ပြောသည်။

မိုင်းဆတ်မြို့နှင့် တာချီလိတ်မြို့ကြားတွင် လမ်းတံတားများ ပျက်စီးမှုကြောင့် ကားများသည် ယခုအချိန်ထိ သွားလာ၍ မရသည့်အတွက် ကုန်ပစ္စည်းများကို ဆိုက်ခေါင်တံတားအနီးတွင် ဖောင်များဖြင့်ပစ္စည်းများကို သယ်ယူနေရကြောင်း မိုင်းဆတ်မြို့ ဒေသခံအမျိုးသားတစ်ဦးက ပြောသည်။

“တံတားတွေကြိုးထားတော့ ပစ္စည်းတွေကို ရေထဲကနေဖြတ်ရတာပေါ့။ ကျိုးနေတဲ့ တံတားနားရောက်ရင်တော့ လူလျှောက်တဲ့ တံတားလေးနဲ့ ပစ္စည်းတွေသယ်ဖို့ ဖောင်လေးလုပ်ထားတယ်၊ တချို့ကလည်း ပစ္စည်းတွေကို လှေနဲ့ ပြန်သယ်ရတာပေါ့။ ကုန်တွေကတော့ လက်ရှိမှာ အဲ့လိုပဲ သယ်နေရတာ သူတို့က ယာယီတံတားပဲ လုပ်ပေးနေတာလေ။” ဟု ၎င်းက ပြောသည်။

လက်ရှိတွင် တစ်လကျော်ကြာလမ်းပန်းဆက်တွက်ရေးပြတ်တောက်ပြီး ကုန်ဈေးနှုန်းမြင့်တက်မှုကြောင့် အခြေခံလူတန်းစား ဒေသခံများ အတွက်အခက်အခဲများကြုံတွေ့ နေရကြောင်း ၎င်းက ဆက်ပြောသည်။

သျှမ်းပြည်အရှေ့ပိုင်းတွင် သစ်တောများ အလွန်အကျွံ ခုတ်ယူခြင်း၊ သတ္တုများ အလွန်အကျွံ တူးဖော်ခြင်းနှင့် တောတောင်တွင် သစ်ပင်များမရှိတော့သဖြင့် မိုးရွာသွန်းသည်အခါ မြေကြီးမှ ရေစုပ်ယူမှု မရှိတော့သဖြင့် ယခုကဲ့သို့ ရေကြီးရေလျှံမှု ဖြစ်ပွားလာရခြင်းဖြစ်ကြောင်း သဘာဝပတ်ဝန်းကျင်စောင့်ကြည့်လေ့လာသူများက ဆိုသည်။