သျှမ်းပြည် တောင်ကြီး – ပင်လုံကြား ရှိ ကျောက်တန်းလမ်းတွင် လက်နက်ကိုင် စစ်ဆေးရေးဂိတ်များလာကြောင်း စုံစမ်းသိရသည်။
လွိုင်လင် နှင့် မိုင်းပွန်ကြားတွင် မကြာခဏ တောင်ပြိုမှုကြောင့် ကားသမားများက ကျောက်တန်းလမ်းကို အသုံးပြုသွားလာနေရကြောင်း ပြီးခဲ့သည့် စက်တင်ဘာလမှစ၍ လက်နက်ကိုင် စစ်ဆေးရေး ဂိတ်များ လာကြောင်း အသက် ၄၀ ဝန်းကျင် ကားသမားတစ်ဦးက သျှမ်းသံတော်ဆင့်ကို ပြောသည်။
“ဒီနောက်ပိုင်းမှာ ၈ ဂိတ်လောက် ရှိတယ် ။ကျောက်တန်းတဲ့ ဂိတ်က စစ်ကောင်စီ တစ်ဂိတ် ၊ ပြီးရင် ပြည်သူ့စစ်က ရွာအဝင်အတွက် တွေ ရှိတယ်။ပွန်ချောင်းရွာ နဲ့ ပွန်ချောင်းမရောက်ခင်က ရှမ်းတွေ ရှိတယ်။ဒါက မှတ်မိသလောက်ပေါ့ တခြားနေ ရာ တွေလည်း ရှိသေးတယ်။အရင်က နှစ်ဂိတ်လောက်ပဲရှိတယ်။ အရင်ကပိုက်ဆံလည်း မကောက်ဘူး။”ဟု ၎င်းက ပြောသည်။
တောင်ကြီး – ပင်လုံကြား ကျောက်တန်းလမ်းတွင် စစ်ကောင်စီ စစ်ဆေးရေး ၂ ဂိတ်၊စစ်ကောင်စီ လက်အောက်ခံ ပအိုဝ်းပြည်သူ့ စစ် ၄ ဂိတ် နှင့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၂ ဂိတ် စုစုပေါင်း ၈ ဂိတ်ရှိနေကြောင်း ကားသမားမျာက ပြောသည်။
မိုင်းပွန် – လွိုင်လင်လမ်းတွင် လက်ရှိအချိန်ထိ လမ်းကျဉ်းကာ ပြေပြိုမှုကြောင့် သွားလာရန်ခက်ခဲနေကြောင်း ပင်လုံမြို့ ကားသမားတစ်ဦက သျှမ်းသံတော်ဆင့်ကို ပြောသည်။
“မိုင်းပွန်ကနေလွိုင်လင်သွားရင်တော့ လမ်းပိတ်တယ်။ သူတို့လွှတ်တဲ့ အချိန်ပဲသွားရတာ။ မြေပြိုထားတော့ လမ်းကလည်း ပိတ်နေတုန်း။အချိန်အရမ်းကြာတယ်သွားလာရတာ။ ခေါင်းနွဲ့နား တစ်ဝိုက်ကိုပဲ သွားလာ ရခက်နေတာ။ အဲ့လမ်းမိုးရွာရင်တော့ ချော်တယ် သတိထားပြီး မောင်းရတယ် အတက်အဆင်းကို တလှည့် စီသွားရတာ။”ဟု ၎င်းက ပြောသည်။
ထို တောင်ကြီး – ပင်လုံကြားရှိ ကျောက်တန်းလမ်းတွင် သွားလာနေသော လိုင်းကားများ၊အိမ်သုံးကားများကို လက်နက်ကိုင်းများက အခွန်ငွေ ဆိုကာ တောင်ခံမှုများလည်း ပေးနေရကြောင်း ကားသမားများကပြောသည်။
Leave a Comments