သျှမ်းပြည် မိုင်းရယ်မြို့နယ် စစ်ကောင်စီနှင့် ကိုးကန့်တပ် (MNDAA) တို့စစ်ရေးတင်းမာမှုကြောင့် တောင်ယာသွားရန် အခက်ကြုံနေကြောင်း သတင်းရရှိသည်။

မိုင်းရယ်မြို့နယ် ဟိုယကျေးရွာတွင် ပြီးခဲ့သည့် စက်တင်ဘာလ နောက်ဆုံးပတ်မှ စပြီး အင်အားဖြည့်တင်းလာတာကြောင့် ကိုးကန့်တပ်ဖွဲ့ (MNDAA)တို့ စစ်ရေးတင်းမာမှုများဖြစ်ပေါ်နေပြီး စစ်ကောင်စီမှ လေကြောင်းတိုက်ခိုက်မှုများပြုလုပ်သဖြင့် ဒေသခံပြည်သူများ တောင်ယာ ကြံစိုက်ခင်းသို့ မသွားရဲဖြစ်နေကြသည်။

စစ်ကောင်စီမှ အင်းအား မကြာခဏဖြည့်တင်းမှုများပြုလုပ်နေခြင်းကြောင့် ကြံစိုက်ခင်းပိုင်ရှင်များ စိုက်ခင်းသွားမကြည့်ရသည်မှာ ၂ လရှိပြီဖြစ်ပြီး ခြံသွားသည့်အချိန်တွင် စစ်ပွဲ ဖြစ်မည်ကိုစိုးရိမ်ကြောင်း ဒေသခံများကပြောသည်။

“ ကြံစိုက်ခင်းမသွားတာ ၂ လလောက်ရှိပြီ။တကယ်လို့ စိုက်ခင်းသွားရင်လည်း မိုင်းနင်းမိမှာ ကြောက်တယ်။ပြီးတော့ စိုက်ခင်းသွားကြည့်နေရင်း စစ်ပွဲ ဖြစ်လာမှာစိုးတယ်။ ဒါကြောင့် မသွားရဲဘူး။” ဟု ကြံစိုက်ခင်းပိုင်ရှင် အမျိုးသားတစ်ဦးက ပြောသည်။

ထို့အပြင် ဟိုယကျေးရွာဖက်တွင် MNDAA မှ ပြည်သူများကို ခေတ္တရှောင်ခိုင်းထားပြီး စစ်ဖြစ်မည့်အလားလာရှိသဖြင့် ပို၍စိုးရိမ်နေရကြောင်း ၎င်း အမျိုးသားကဆိုသည်။

မိုင်းရယ်နှင့် ဟိုယ ကျေးရွာဘက်တွင် ကြံခင်း ၄ သောင်းဧက ရှိပြီး နိုဝင်ဘာလတွင် ကြံခုတ်ချိန်ရောက် ပြီဖြစ်ပြီး ပိုက်ဆံချေးငှားကာ အကြွေးယူပြီး စိုက်ထားရတာကြောင့် ကြံမခုတ်ရမည်ကိုလည်း စိုးရိမ်ကြောင်း သိရသည်။

“ ကြံခင်းပဲကို ဧက လေးသောင်းလောက်ရှိတယ်။ အကုန်နီးပါးက အကြွေးယူပြီးစိုက်ထားရတာ။ ကြံပင်မခုတ်ရပဲ စစ်ဖြစ်လာပြီး အကုန်ပျက်စီးသွားမှာ စိုးရိမ်တယ်။”လို့ ဟိုယ ဒေသခံတစ်ဦးက ပြောသည်။

မိုင်းရယ်ဖက်တွင် ကြံ၊ စပါးနှင့် ပြောင်းကို သာစိုက်ပျိုးကြပြီး ယခုနှစ်များတွင် ကြံကိုသာအဓိက စိုက်ပျိုးလာကြသည်။

ယခုလက်ရှိတွင် MNDAA သည် ဟိုယကျေးရွာအပြင်ဖက်တွင် ရှိပြီး မိုင်းရယ်မြို့တွင် စစ်ကောင်စီတပ်များနေရာယူထားကာ SSPP အဖွဲ့များလည်း ကင်းစောင့်ပေးနေကြောင်း သိရသည်။

ပြီးခဲ့သည့် စက်တင်ဘာလ ၂၉ ရက်နေ့ည ၈ နာရီအချိန်တွင် စစ်တပ်က ကောင်းမွန်ရွာကို ဗုံးလာကြဲကြောင့် ထိခိုက်ဒဏ်ရာရသူများမှာ ၄ ယောက်ရှိပြီး နေအိမ်ပျက်စီးမှုများလည်းရှိကြောင်းသိရသည်။

အလုပ်သင် သတင်းထောက် နန်းလရောင် ရေးသားသည်။