သျှမ်းမြောက်၊ လားရှိုးမြို.၊ (၈) ရပ်ကွက်ကို ယမန်နေ့၊(စက်တင်ဘာလ ၂၈ ရက်) ည ၈ နာရီခွဲခန့် စစ်ကောင်စီ လေကြောင်းမှ ဗုံးကြဲတိုက်ခိုက်ရာ လူနေအိမ်အဆောက်အအုံများစွာ သာမက ကားများ ထိခိုက် ပျက်စီးခဲ့ရကြောင်း မြို့ခံများက ပြောသည်။
ကိုးကန်တပ်- MNDAA သိမ်းပိုက်ထားသည့် လားရှိုးမြို့ပေါ် လေကြောင်းမှ ညစဉ် ဗုံးကြဲတိုက်ခိုက်နေရာ ယမန်နေ့ည ဗုံးကြဲမှုကြောင့်ရပ်ကွက် (၈) အတွင်းရှိ ကားဝေါ့ရှော့ အပါအဝင် နေအိမ်များစွာ ပျက်စီးခဲ့ကြောင်း မြို့ခံ တစ်ဦးက ပြောသည်။
“ကားဝေါ့ရှော့နဲ့ ကားတွေ အိမ်တွေ ထိတယ်။ အပျက်အစီးများတယ်။ ညဆို ကျီးလန့်စာစားပဲ၊ အိပ်မပျော်ဘူး” ဟု၎င်းကပြောသည်။
စစ်ကောင်စီ လားရှိုးမြို့ပေါ် ပြည်သူများကို ပစ်မှတ်ထား၍ ညစဉ် ဗုံးကြဲတိုက်ခိုက် နေရာ စက်တင်ဘာလ ၂၇ ရက်နေ့ နံနက် ၃ နာရီခွဲကျော်က ပေါင် (၅၀၀) နှင့် ပေါင် (၂၀၀) ဗုံး ၁၅ လုံး ကြဲချတိုက်ခိုက်ခဲ့၍ ပြည်သူ ၂ ဦး သေဆုံးပြီး ၆ ဦး ဒဏ်ရာရရှိခဲ့သည်။
ယင်းသို့ ဗုံးကြဲနေမှုကြောင့် ပြည်သူများ နေစဉ် မြို့မှ ပြန်လည်ထွက်ခွာနေကြောင်း သိရသည်။
စစ်ကောင်စီက အကြမ်းဖက် အဖွဲ့အဖြစ် ကြေညာထားသည့် MNDAA အပါအဝင် တိုင်းရင်းသား တော်လှန်ရေးတပ်များ၊ PDF များနှင့် ငြိမ်းချမ်းရေး ဆွေးနွေးလိုကြောင်း ထုတ်ပြန်ထားသော်လည်း ယခုကဲ့သို့ ညစဉ် လေကြောင်းက ဗုံးကြဲတိုက်ခိုက်နေခြင်း ဖြစ်သည်။
Leave a Comments