သျှမ်းမြောက် မြို့တော် လားရှိုးကို ယနေ့ (စက်တင်ဘာလ ၂၇ ရက်) နံနက် အစောပိုင်း ၃ နာရီခွဲခန့် လူအိပ်မောကျချိန် စစ်ကောင်စီ လေကြောင်းမှ ဗုံး ၃ ကြိမ်ကြဲချ တိုက်ခိုက်သဖြင့် ပြည်သူ ၂ ဦး သေဆုံးပြီး ၆ ဦး ဒဏ်ရာ ရရှိခဲ့ကြောင်း ကိုးကန့်တပ်-MNDAA က ထုတ်ပြန်သည်။

လားရှိုးမြို့ရှိ စစ်ရေးပစ်မှတ်မဟုတ်သည့် လားရှိုး မြို့မဈေးကြီး၊ ရပ်ကွက်(၁) နယ်မြေ (၈)၊ ရပ်ကွက် (၂) Green Park ဟိုတယ်အနီး နေရာ အနှံ့အပြား လေကြောင်းမှ ပေါင် (၅၀၀) နှင့် ပေါင် (၂၀၀) အပါအဝင် ဖျက်အားပြင်း ဗုံး အနည်းဆုံး ၁၅ လုံး ကြဲချတိုက်ခိုက်ခဲ့ကြောင်း ဆိုသည်။

ဗုံးထိမှန်မှုကြောင့် နေအိမ်၊ အဆောက်အအုံ များစွာ ပျက်စီးခဲ့ရာ ပေါင် (၅၀၀) ဗုံး ၃ လုံး ထိမှန်ခဲ့သည့် မြို့မဈေးကြီး အတွင်းရှိ ဈေးဆိုင်ခန်းများစွာ ပျက်စီးဆုံးရှုံးခဲ့ကြောင်း ထုတ်ပြန်ချက်တွင် ဖော်ပြသည်။

စစ်ကောင်စီ၏ လူမဆန်စွာ ဗုံးကြဲ တိုက်ခိုက်မှုကြောင့် ပြည်သူများ ထိတ်လန့်တုန်လှုပ်နေသည့်အပြင် ပျက်စီး ဆုံးရှုံးမှုများကြောင့် အခက်အခဲများစွာ ကြုံတွေ့နေရကြောင်း၊ လူသားချင်းစာနာမှု ကင်းမဲ့စွာ ရက်ရက်စက်စက် ဗုံးကြဲ တိုက်ခိုက်မှုများကြောင့် မြို့ပြန်လည်ထူထောင်ရေး များစွာ အနှောင့်အယှက် ဖြစ်ရကြောင်း ဆိုသည်။

လားရှိုးမြို့ ဗုံးကြဲခံရမှုနှင့် ပတ်သက်၍ “ညဆို မအိပ်ရဲဘူး။ လေယာဉ်သံ နားစွင့်နေရတယ်။ နေ့ဘက် အလုပ်မလုပ်နိုင်တော့ ဝင်ငွေကမရှိ၊ ပြန်ထွက်သွားဖို့ကလည်း ငွေမရှိနဲ့။ ပိုက်ဆံ တတ်နိုင်တဲ့လူတွေက ပြန်ထွက်သွားကြတာ ရက်ကြာပြီ။ ဒီမှာ ကျန်နေကြတာက ဆင်းရဲသားတွေများတယ်” ဟု လားရှိုးမြို့ခံ အမျိုးသမီး တဦးက ပြောသည်။

ကိုးကန့်တပ်-MNDAA သိမ်းပိုက်ထားသည့် လားရှိုးမြို့ အရပ်ဘက် ပစ်မှတ်များကို ပြီးခဲ့သည့် ဩဂုတ်လ ၃၀ ရက်နေ့မှ စတင်၍ ဆက်တိုက် ဗုံးကြဲ တိုက်ခိုက်နေရာ ပြည်သူ ထိခိုက် သေဆုံးမှု မြင့်တက်နေသော်လည်း စစ်ကောင်စီ ဝါဒဖြန့် လူမှုကွန်ရက် စာမျက်နှာများတွင်မူ စစ်ရေးပစ်မှတ်များ ဗုံးကြဲခြင်း ဖြစ်ကြောင်း လိမ်လည် ဝါဒဖြန့်နေသည်ကို တွေ့ရသည်။

လက်နက်ကိုင် တော်လှန်နေသည့် တိုင်းရင််သား လက်နက်ကိုင်တပ်ဖွဲ့များနှင့် ပြည်သူ့ကာကွယ်ရေးတပ် (PDF) များ လက်နက်ကိုင်လမ်းစဉ်ကို စွန့်လွှတ်၍ နိုင်ငံရေး ပြဿနာကို နိုင်ငံရေး နည်းလမ်းဖြင့် ဖြေရှင်းနိုင်ရေး ရွေးကောက်ပွဲ ဝင်ရောက် ယှဥ်ပြိုင်ရန် ကမ်းလှမ်းကြောင်း စစ်ကောင်စီက ယမန်နေ့ (စက်တင်ဘာလ ၂၆ ရက်) ည ၈ နာရီက ထုတ်ပြန်ပြီးနောက် ယခုကဲ့သို့ ထပ်မံ ဗုံးကြဲ တိုက်ခိုက်ခဲ့ခြင်း ဖြစ်သည်။