သျှမ်းပြည်တောင်ပိုင်း ကျေးသီးမြို့နယ် မိုင်းနောင်မြို့အနီး ဝမ်စိမ်းကျေးရွာတွင် နွားစာအတွက် ထော်လာဂျီဖြင့် မြက်သွားရိတ်သည့် အရပ်သား (၃) ဦး မိုင်းနင်းမိရာ တစ်ဦး ပွဲချင်းပြီး သေဆုံးပြီး၊ နှစ်ဦးဒဏ်ရာ ပြင်းထန်ကြောင်း စုံစမ်းသိရသည်။
စက်တင်ဘာလ (၂၁) ရက် နံနက် (၇) နာရီကျော်တွင် ကျေးသီးမြို့နယ် မိုင်းနောင်မြို့အနီး ဝမ်စိမ်း (ဝၢၼ်ႈၸိင်း) ကျေးရွာရှိ သုံးခွလမ်းဆုံတွင် မိသားစုမှ မွေးမြူထားသည့် နွားများ စားရန်အတွက် ထော်လာဂျီဖြင့် မြက်သွားရိတ်ပြီး ပြန်လာသည့် အမျိုးသား (၃) ဦး မိုင်းနင်းမိရာ တစ်ဦး ပွဲချင်းပြီး သေဆုံး၍ သားအဖ (၂) ဦး ဒဏ်ရာရရှိကြောင်း မိုင်းနောင်ဒေသခံများက ပြောသည်။
“သူတို့မိသားစု နွားစာ မြက်သွားရိတ်တာ၊ ထော်လာဂျီနဲ့ ပြန်လာတဲ့အချိန် မိုင်းကွဲတာ။ တစ်ယောက်ကတော့ အဲ့မှာ ဆုံးသွားတယ်၊ ၂ ယောက်က ဒဏ်ရာရတယ်။ ပြန်လိုက်ကြည့်ရင် ရှော့မိုင်းလို့ပြောတာ၊ တစ်လုံးပဲ ကွဲတာ လမ်းနဲ့ တစ်လံလောက်ပဲ ခြားတယ်။ ဘယ်သူ့မိုင်းလဲတော့ မသိနိုင်ဘူး”ဟု ဖြစ်စဉ်သိရှိသူ မိုင်းနောင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မိုင်းနောင်မြို့၊ ဝမ်စိမ်းကျေးရွာအနီး မိုင်းယန်း (မိူင်းယၢင်း)၊ ဝမ်ရွက် (ဝၢၼ်ႈယွတ်ႈ) နှင့် လဲချားသွားသည့် လွယ်တန်(လွႆတၢင်ႈ) သုံးခွလမ်းဆုံတွင် ထော်လာဂျီဖြင့် မိုင်းနင်းမိကာ ပွဲချင်းပြီး သေဆုံးသူသည် အသက် (၃၅)နှစ် အရွယ်ရှိ ကြာထီး ဆိုသူ ဖြစ်သည်။
မိုင်းနင်းမိပြီး ထိခိုက်ဒဏ်ရာရသူများသည် အသက် (၃၆) နှစ်ရှိ လုံးငို့ နှင့် အသက်(၁၃)နှစ်ရှိ မိုးဒီ ဟု သိရသည်။
“သူ့အဖေက ခြေထောက်၊ လက်၊ ဗိုက်နဲ့ လက်ချောင်းတွေ ထိတယ်။ အခု ဝမ်ဟိုင်းကို ခေါ်သွားတယ်။ သူတို့(SSPP) ကုပေးမယ်ဆိုပြီးတော့ သားအဖကို အပေါ်ကို ခေါ်သွားပြီ။ ကလေးတော့ ဗိုက်မှာ ထိတယ်။ လောလောဆယ် ခြေထောက်ခွဲစိတ်ရင် အကြောထိမှာ စိုးရိမ်ရတယ်လို့ ပြောတယ်”ဟု ဖြစ်စဉ်သိရှိသူ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
အဆိုပါ မိုင်းနင်းမိသည့်နေရာသည့် ရှမ်းပြည်တိုးတက်ရေးပါတီ (SSPP) နှင့် သျှမ်းပြည်ပြန်လည်ထူထောင်ရေးကောင်စီ (RCSS) တို့ စစ်ရေးပဋိပက္ခ ဖြစ်ပွားခဲ့သည့် ဒေသတစ်ခုလည်း ဖြစ်သည်။
ထို့ပြင် SSPP တပ်ဖွဲ့ဘက်မှ ယခုဖြစ်စဉ်နှင့် ပတ်သက်ပြီး RCSS တပ်ဖွဲ့၏ ရှော့တိုက်မိုင်းကြောင့် မိုင်းနောင်မြို့နယ်အတွင်း အရပ်သား ထိခိုက်သေဆုံးမှု ဖြစ်ပွားရကြောင်း စက်တင်ဘာလ (၂၂) ရက်စွဲဖြင့် ထုတ်ပြန်ထားသည်။
မိုင်းနောင်မြို့ ဝမ်စိမ်းကျေးရွာ မိုင်းပေါက်ကွဲမှုဖြစ်စဉ်နှင့် ပတ်သက်ပြီး သျှမ်းသံတော်ဆင့်မှ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ကို ဆက်သွယ်မေးမြန်းရန် ကြိုးစားခဲ့သော်လည်း ဖုန်းစက်ပိတ်ထားပြီး RCSS ပြောရေးဆိုခွင့်ရှိသူ ဗိုလ်မှူးစိုင်းခမ်းစံထံ ဖုန်းဖြင့် ဆက်သွယ်ခဲ့သော်လည်း လက်ခံဖြေကြားခြင်း မရှိပါ။
အလားတူ ဩဂုတ်လ (၂၀) ရက်နေ့ကလည်း ကွန်ဟိန်းမြို့နယ် ဝမ်ဆိုင်းမွန်ရွာ ဒေသခံများသည် တောင်ယာသွားရောက်စဉ် မြေမြှုပ်မိုင်း နှစ်ကြိမ်နင်းမိပြီး အသက် (၁၅) နှစ်အရွယ် ယောကျ်ားလေးတစ်ဦး သေဆုံးပြီး အမျိုးသမီး (၁၀) ဦး အပါအဝင် စုစုပေါင်း (၂၀) ဦး ဒဏ်ရာရရှိခဲ့ကြောင်း ဒေသခံများထံမှ သိရသည်။
ပုံစာ – မိုင်းနောင်မြို့ ဝမ်စိမ်းကျေးရွာမှ မြက်သွားရိတ်သည့် အရပ်သား (၃) ဦး မိုင်းနင်းမိ (ဓာတ်ပုံ-SSPP Info)
Leave a Comments