သျှမ်းပြည် ကျောက်မဲမြို့နယ် TNLA ပူးပေါင်းတပ်နှင့် စစ်ကော်မရှင်တပ် ထိတွေ့တိုက်ပွဲကြား အရပ်သားတစ်ဦး သေနတ်ထိမှန် သေဆုံးခဲ့ပြီး နေရပ်ပြန်စစ်ရှောင်တစ်ဦးလည်း မြေမြှုပ်မိုင်းနင်းမိကာ သေဆုံးသွားကြောင်း စုံစမ်းသိရသည်။
စက်တင်ဘာလ ၁၇ ရက်တွင် ကျောက်မဲမြို့နယ် နောင်ပိန်တိုက်နယ်အတွင်းရှိ ခဲလုံကျေးရွာဘက်တွင် TNLA ပူးပေါင်းတပ်နှင့် စစ်ကော်မရှင်တပ် ထိတွေ့တိုက်ပွဲကြား တောထဲ ထွက်ပြေးတိမ်းရှောင်နေသည့် အရပ်သားတစ်ဦး သေနတ်ပစ်ခတ်ခံရပြီး ယမန်နေ့ (စက်တင်ဘာလ ၁၈ ရက်) တွင် သေဆုံးသွားခဲ့ကြောင်း ဒေသခံများက ပြောသည်။
“ခဲလုံရွာသား ဗိုက်ထိဒဏ်ရာနဲ့ ပြင်ဦးလွင်ဆေးရုံမှာ မနေ့က သေဆုံးသွားတယ်၊ တောထဲမှာ စစ်ရှောင်ရင်း ပစ်ခံရတာ။ တောထဲမှာနေလဲ မလုံခြုံ၊ အိမ်ပြန်တော့လည်း မလုံခြုံဘူး။ ဒီနေ့တော့ ခဲလုံဘက် ငြိမ်သွားပေမယ့် နမ့်စော့ရွာမှာ ထိတွေ့မှုဖြစ်တယ်၊ နောင်ပိန်နဲ့ နည်းနည်းဝေးတယ်။ တောထဲ ရှောင်နေတဲ့ ခိုက်တုန်ဟုန်းနဲ့ နားအိုက်ခန့်ရွာဘက် အစားအသောက် ခက်ခဲကြတာ”ဟု နောင်ပိန်စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
တိုက်ပွဲကြား သေနတ်ကျည် ထိမှန်သူမှာ ခဲလုံကျေးရွာမှ အသက် (၅၀) ကျော်အရွယ် ဦးထွန်းစိန် ဖြစ်ပြီး ဝမ်းဗိုက်ထိမှန်ဒဏ်ရာဖြင့် ပြင်ဦးလွင်ဆေးရုံတွင် သေဆုံးသွားခဲ့ကြောင်း နောင်ပိန်စစ်ဘေးရှောင်များထံမှ သိရသည်။
အလားတူ ယမန်နေ့ (စက်တင်ဘာလ ၁၈ ရက်) တွင် နောင်ပိန်တိုက်နယ်အတွင်းရှိ နောင်ပြစ်ကျေးရွာသို့ တောထဲတွင် စစ်ဘေးရှောင်နေရသည့် အိမ်ထောင်စု (၂၀) ကျော် နေရပ်ပြန်ကြစဉ် အသက် (၃၀) ကျော်အရွယ် စိုင်းကျော်သိန်းသည် နေအိမ်ခြံဝင်းအတွင်း မြေမြှုပ်မိုင်းနင်းမိပြီး ခြေထောက်တစ်ဖက် ပြတ်သွားခဲ့ကာ ယနေ့ (စက်တင်ဘာလ ၁၉ ရက်)တွင် သေဆုံးသွားကြောင်း ဒေသခံများက ပြောသည်။
“မနေ့က နောင်ပြစ်ရွာ တောင်ယာဘက်မှာ စစ်သွားရှောင်နေတဲ့ ပြည်သူတွေ ရွာကို ပြန်လာလို့ရပြီ ဆိုပြီး အချို့ရွာသားတွေ ပြန်လာကြတယ်။ အဲ့ထဲ စိုင်းကျော်သိန်းက အိမ်ရှေ့ခြံဝန်းအကျော် မိုင်းနင်းမိပြီး ခြေထောက်ပြတ်သွားတယ်။ ဘယ်ဆေးရုံမှ မပို့နိုင်ဘူး သေသွားတယ်၊ ရွာသားအကုန်လုံး ပြန်ထွက်ပြီ။ တစ်ရွာလုံး မီးလောင်ထားတာ ၂ အိမ်ပဲ ကျန်တယ်”ဟု အဆိုပါ နောင်ပိန်စစ်ဘေးရှောင် အမျိုးသမီးက သျှမ်းသံတော်ဆင့်ကို ဆက်ပြောသည်။
ဩဂုတ်လ နောက်ဆုံးပတ်တွင် စစ်ကော်မရှင်တပ် ပြန်လည်ထိန်းချုပ်ထားသည့် နောင်ပိန်ရွာထဲသို့ စစ်ဘေးရှောင်များကို ဝင်ခွင့်မပေးသေးဘဲ နောင်ပိန်၊ ဇီးပင်စခန်း၊ ပင်ပေါ၊ နောင်ပြစ်၊ လုံကြိမ်၊ မန်ကောင်း၊ ပင်တိန်နှင့် လုပ်ပါကျေးရွာများမှ ပြည်သူနေအိမ်ထဲရှိ တန်ဖိုးကြီးပစ္စည်းများ၊ ကားနှင့် ထော်လာဂျီများကို စစ်ကော်မရှင်တပ်သားများနှင့် ၎င်းနောက်လိုက်များက ဖောက်ထွင်းခိုးယူနေကြောင်း စစ်ဘေးရှောင်များက ပြောသည်။
လက်ရှိတွင် နောင်ပိန်ရွာထဲ တပ်စွဲထားသည့် စစ်ကော်မရှင်လက်အောက်ခံ တပ်မ-၁၁ သည် ပြည်ထောင်စုလမ်းမကြီးတလျှောက် လက်နက်ကြီး ရမ်းသမ်းပစ်ခတ်နေပြီး ကျောက်မဲမြို့နှင့် ၈ မိုင်ခန့်သာ ကွာဝေးသည့် ခိုက်တုန်ဟုန်းရွာဘက်သို့ မြေပြင်စစ်ကြောင်းထိုး နေခြင်းကြောင့် ဒေသခံများ ထပ်မံထွက်ပြေးနေရကြောင်း ဒေသခံများထံမှ သိရသည်။
TNLA ပူးပေါင်းတပ်နှင့် မြေပြင်ထိတွေ့တိုက်ပွဲ ဖြစ်ပွားနေသည့် စစ်ကော်မရှင်တပ်သည် စက်တင်ဘာလ ဒုတိယပတ်မှ စတင်ပြီး ပြန်လည်ပြင်ဆင်ထားသည့် ဂုတ်တွင်းတံတားဘက်မှတဆင့် နောင်ပိန်တိုက်နယ်အတွင်း တပ်အချိန်းအပြောင်း ပြုလုပ်နေပြီး နောင်ပိန်ရွာထဲတွင် ဗျူဟာမှူးကိုယ်တိုင် အထိုင်ချကာ စစ်ရေးအမိန့်ပေးနေကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
Leave a Comments