သျှမ်းပြည် ကျောက်မဲမြို့နယ် နောင်ပြစ်ကျေးရွာတွင် အမျိုးသမီးတစ်ဦး မြေမြှုပ်မိုင်းနင်းမိပြီး ခြေထောက်တစ်ဖက် ပြတ်သွားခဲ့ကြောင်း စုံစမ်းသိရသည်။
ယနေ့ (အောက်တိုဘာလ ၁၀ ရက်) နံနက် ၁၀ နာရီခွဲခန့်တွင် စစ်ကော်မရှင်တပ် ပြန်လည်ထိန်းချုပ်ထားသည့် ကျောက်မဲမြို့နယ်အတွင်းရှိ နောင်ပြစ်ကျေးရွာတွင် အသက် (၄၀) နှစ်အရွယ်ရှိ နန်းဟွမ်သည် မုံညင်းစိုက်ပျိုးရန် နေအိမ်ခြံဝင်းထဲ ပျိုးဘောင်ပြုလုပ်ထားသည့် နေရာတွင် မြေမြှုပ်မိုင်းနင်းမိကာ ခြေထောက်တစ်ဖက် ပြတ်သွားခဲ့ကြောင်း ဒေသခံများက ပြောသည်။
“မုန်ညင်းမျိုးစေ့ သွားကြဲမလို့တဲ့၊ ပျိုးဘောင်လုပ်တုန်းကတော့ ဘာမှ မဖြစ်ဘူး။ တစ်အ်ိမ်နဲ့ တစ်အိမ်ကူးတဲ့ ခြံစည်းရိုးနားမှာ နင်းမိတာ။ အကူအညီတော့ အကုန်လိုနေတာပေါ့၊ သူတို့အိမ်လည်း မီးလောင်သွားပြီ အိမ်လည်းမရှိတော့ဘူး။ ခုအိမ်လာနေတာတောင် မြေကြီးပေါ်ဆိုမနင်းရဲဘူး ကြောက်လို့၊ သူများအိမ်ဆို နေ့တိုင်းပဲ မိုင်း ၁ လုံး ၂ လုံး တွေ့နေတာ”ဟု ကျောက်မဲမြို့နယ် ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် မြေမြှုပ်မိုင်းနင်းမိသည့် နောင်ပြစ်ရွာမှ အဆိုပါ အမျိုးသမီးကို ဆေးကုသရန် ပြင်ဦးလွင်မြို့သို့ ခေါ်ဆောင်သွားပြီး ဆေးဝါးစရိတ် အကူအညီများ လိုအပ်လျက်ရှိကာ သားတစ်ဦးနှင့် သမီးတစ်ဦး ကျန်ရှိကြောင်း အဆိုပါအမျိုးသမီးက ဆက်ပြောသည်။
ပြီးခဲ့သည့် စက်တင်ဘာလ ၂၁ ရက်တွင်လည်း ကျောက်မဲမြို့နယ် ပန်မလွတ်ကျေးရွာတွင် စစ်ဘေးရှောင်နေရသော အသက် ၃၉ နှစ် အရွယ်ရှိ စိုင်းသောကြာနှင့် အသက် ၄၅ နှစ် အရွယ်ရှိ စိုင်းမိုးတို့သည် ဆိုင်ကယ်တစ်စီးဖြင့် နောင်ပြစ်ကျေးရွာသို့ ပစ္စည်းပြန်ယူနေစဉ် တောင်ယာအနီး တောလမ်းတစ်နေရာတွင် မြေမြှုပ်မိုင်းနင်းမိပြီး သေဆုံးသွားခဲ့သည်။
အလားတူ စက်တင်ဘာလ ၁၈ ရက်တွင် ကျောက်မဲမြို့နယ် နောင်ပိန်တိုက်နယ်ရှိ နောင်ပြစ်ကျေးရွာသို့ နေရပ်ပြန်သွားသူ အသက် (၄၀) နှစ်အရွယ် စိုင်းကျော်သိန်းသည် နေအိမ်ခြံဝင်းထဲတွင် မြေမြှုပ်မိုင်း နင်းမိကာ ညာဘက်ခြေထောက် ပြတ်သွားခဲ့ကြောင်း ဒေသခံများထံမှ သိရသည်။
ကျောက်မဲမြို့နယ် နောင်ပိန်တိုက်နယ်ရှိ နောင်ပြစ်ကျေးရွာသည် ယခင်က TNLA ပူးပေါင်းတပ်နှင့် စစ်ကော်မရှင်တပ်တို့အကြား မကြာခဏ ထိတွေ့တိုက်ပွဲ ဖြစ်ပွားခဲ့သည့် နေရာဖြစ်သည်။
လက်ရှိတွင် ကျောက်မဲမြို့နယ် နောင်ပိန်တိုက်နယ်တွင် စစ်ဘေးရှောင်များ နေရပ်ပြန်သွားသော်လည်း မိုင်းရှင်းလင်းရေး မလုပ်ဆောင်ရသေးခြင်းကြောင့် တစ်လအတွင်း မြေမြှုပ်မိုင်း နင်းမိ၍ သေဆုံးသူ (၄) ဦး၊ ထိခိုက်ဒဏ်ရာရရှိသူ (၄) ဦးထက်မနည်း ရှိနေကြောင်း ဒေသခံများက ပြောသည်။
Leave a Comments