သျှမ်းပြည် နောင်ချိုမြို့ပေါ်သို့ စစ်ကောင်စီမှ လေကြောင်းဖြင့် ဆက်တိုက်ဗုံးကြဲ တိုက်ခိုက်သဖြင့် အရပ်သား ထိခိုက်ဒဏ်ရာရရှိကြောင်း စုံစမ်းသိရသည်။
စက်တင်ဘာ (၁၉)ရက် မှ စတင်ပြီး နောင်ချိုမြို့ပေါ် လူနေရပ်ကွက်နှင့် မြို့မစျေး၊ စာသင်ကျောင်းအနီးသို့ စစ်ကောင်စီမှ လေကြောင်းဖြင့် ဗုံးကြဲတိုက်ခိုက်သဖြင့် အရပ်သား(၄)ဦး ထိခိုက်ဒဏ်ရာရရှိကြောင်း တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ယမန်နေ့ (စက်တင်ဘာ ၂၂)ရက်ထုတ်ပြန်ချက်အရသိရသည်။
နောင်ချိုမြို့ နောက်ဆုံးကျန်ရှိနေသည့် စစ်ကောင်စီ ၏ အမှတ် (၆၀၆) ဒုံးတပ်ရင်းကို ဇူလိုင်လ ၁၀ ရက်တွင် သိမ်းပိုက်လိုက်ပြီး နောင်ချိုတစ်မြို့လုံးကို ထိန်းချုပ်ထားနိုင်သည့်အတွက် စစ်ဘေးရှောင်များသည် နေရပ်ပြန်နေကြပြီး၊ လက်ရှိစစ်ကောင်စီတပ်၏ လေကြောင်းဆက်တိုက် ဗုံးကြဲမှုကြောင့် ထပ်မံပြေးနေရကြောင်း နောင်ချိုမြို့ ဒေသခံများ၏ ပြောပြချက်အရသိရသည်။
“မြို့ထဲတွေ ဗုံးချနေတာအခုက စာသင်ကျောင်းနား ဈေးနားလေ၊ ပြီးတော့ လူနေအိမ်လည်း ထိတယ်။ EPC ရုံးတို့ ရဲစခန်းတို့ဘက်မှာတော့ TNLA အလံထောင်ထားတယ်။ ဈေးပတ်ပတ်လည် ဈေးနားပဲ ၃ ခါရှိပြီ၊ စစ်ဘေးရှောင်ပြီး ပြန်လာနေတဲ့ လူတွေလည်း အခု ပြန်ထွက်ကုန်ကြပြီ”ဟု နောင်ချိုဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
စက်တင်ဘာလ ၂၁ ရက်နှင့် ယမန်နေ့ (စက်တင်ဘာ ၂၂)ရက်တို့တွင် နောင်ချိုမြို့ပေါ် ဈေးရပ်ကွက်ရှိ မြို့မဈေး၊ အထက (၁)၊ ညဈေးတန်းအနီး ပွဲရုံဂိုဒေါင်နှင့် သဖန်းကိုင်းကျေးရွာဘက်သို့ စစ်ကောင်စီတပ်မှ လေကြောင်းဖြင့် ပေါင် (၅၀၀) ဗုံး အသုံးပြု၍ တိုက်ခိုက်ခဲ့သည်။
၎င်းလေကြောင်း တိုက်ခိုက်မှု နှစ်ရက်အတွင်း နောင်ချိုမြို့ပေါ်တွင် အရပ်သား (၄) ဦးထက်မနည်း ထိခိုက်ဒဏ်ရာရရှိခဲ့ပြီး ပြည်သူနေအိမ်နှင့် ဆိုင်ခန်းများလည်း ထိခိုက်ပျက်စီးခဲ့ခြင်းကြောင့် ပြည်သူများမှာ လေကြောင်းအန္တရာယ် စိုးရိမ်နေရကြောင်း သိရသည်။
“ရုံးဟောင်းနားက အိမ်တွေဆို မအိပ်ရဲကြဘူး၊ တခြား ဝေးတဲ့နေရာ ရှာအိပ်ကြတယ်။ အဓိက စစ်သားတွေ ပြည်သူနဲ့ ရောနေတာမျိုး မဖြစ်စေချင်ဘူး၊ ဖြစ်နိုင်ရင် အဝေးမှာ နေစေချင်တာပေါ့ ဘယ်သူမှ အဲ့လို မပြောရဲဘူးလေ။ အခုက အကုန်လုံးကို ကြောက်နေရတယ်။ ညဘက်တော့ TNLA ကင်းလှည့်တာ ရှိတယ် ကားနဲ့၊ အသွားအလာ စစ်တယ်”ဟု ၎င်းဒေသခံ အမျိုးသမီးက သျှမ်းသံတော်ဆင့်ကို ဆက်ပြောသည်။
နောင်ချိုမြို့နယ်တွင် စစ်ကောင်စီတပ်က ပေါင် (၅၀၀) ဗုံး အပါအဝင် နေ့စဉ် လေကြောင်းဗုံးကြဲ တိုက်ခိုက်မှုနှင့် လက်နက်ကြီးများဖြင့် ပစ်ခတ်တိုက်ခိုက်မှုကြောင့် ကလေးငယ် (၂) ဦး အပါအဝင် အရပ်သား (၁၅) ဦး သေဆုံးပြီး (၁၃) ဦး ထိခိုက်ဒဏ်ရာ ရရှိခဲ့ကာ ပြည်သူနေအိမ် (၃၀) နီးပါး၊ ဘုန်းကြီးကျောင်း (၂) ကျောင်းနှင့် စာသင်ကျောင်း (၁) ကျောင်း ပျက်စီးဆုံးရှုံးခဲ့ကြောင်း TNLA ဘက်မှ ထုတ်ပြန်ထားသည်။
စစ်ကောင်စီခေါင်းဆောင် မင်းအောင်လှိုင်၏ စက်တင်ဘာလဆန်း သျှမ်းပြည်တောင်ပိုင်း ခရီးစဉ်အတွင်း တိုင်းရင်းသားလက်နက်ကိုင်များထံ လက်လွတ်ဆုံးရှုံးခဲ့ရသည့် နယ်မြေများကို တန်ပြန်ထိုးစစ်ဆင်မည်ဟု ကြုံးဝါးပြီးနောက် ညီနောင်မဟာမိတ်တပ်များ ထိန်းချုပ်ထားသည့် လားရှိုးနှင့် နောင်ချိုမြို့များသို့ လေကြောင်းဖြင့် ခပ်စိပ်စိပ် ဗုံးကြဲတိုက်ခိုက်လာသည်။
ပြည်သူလူထုအနေဖြင့် စစ်ကောင်စီ၏ လေကြောင်းအန္တရာယ်ကို သတိထားကြရန်နှင့် စစ်ကောင်စီ၏ လုပ်ရပ်များကိုလည်း သတိထား စောင့်ကြည့်ထားရန် ညီနောင်မဟာမိတ်တပ်များက တိုက်တွန်းထားသည်။
ပြီးခဲ့သည့် ဩဂုတ်လ (၆) ရက်တွင် ညီနောင်မဟာမိတ်တပ်များ ထိန်းချုပ်ထားသည့် နယ်မြေဒေသများတွင် တိုက်ပွဲဖြစ်ပွားခြင်း မရှိဘဲ စစ်ကောင်စီတပ်မှ လေကြောင်းပစ်ခတ် တိုက်ခိုက်နေခြင်းအပေါ် တားဆီးဟန့်တားပေးရန် တရုတ်နိုင်ငံအား အဓိကထားပြီး နိုင်ငံတကာ မိသားစုများအားလုံးကို ညီနောင်မဟာမိတ် ၃ ဖွဲ့ က တောင်းဆိုခဲ့ဖူးသည်။
သို့သော် စစ်ကောင်စီတပ်သည် လေကြောင်းအားကိုးဖြင့် ညီနောင်မဟာမိတ် ထိန်းချုပ်နယ်မြေများထံ ဆက်လက်ဗုံးကြဲ တိုက်ခိုက်နေပြီး စစ်ရာဇဝတ်မှု၊ လူသားမျိုးနွယ်အပေါ် ပြစ်မှုကျူးလွန်နေသော အကြမ်းဖက် တိုက်ခိုက်မှုများကို ဆက်တိုက်ကျူးလွန်နေကြောင်း ညီနောင်မဟာမိတ်တပ်များက စက်တင်ဘာလ (၁၀) ရက်တွင် ထုတ်ပြန်သည်။
Leave a Comments