သျှမ်းပြည် ဟိုပုံးမြို့နယ် စံဖူးကျေးရွာအုပ်စု ဗန်းစောက်ကျေးရွာတွင် ဖြစ်ပွားခဲ့သည့် တောင်ပြိုကြောင့် သေဆုံးသွားသော မြေအဖွား နှစ်ဦး အလောင်းကို တစ်ပတ်ကျော်ကြာမှ ပြန်သယ်ထုတ်နိုင်ခဲ့ကြောင်း သတင်းရရှိသည်။
ပြီးခဲ့သည့် (စက်တင်ဘာလ ၁၁ ရက်) တွင် မိုးသည်းထန်စွာရွာသွန်းမှုကြောင့် ဟိုပုံးမြို့နယ် ဗန်းစောက်ရွာတွင် တောင်ပြိုမှု ဖြစ်ပွားကာ မြေးအဖွား ၂ ဦး မြေပိသေဆုံးခဲ့သည်။
ထိုအလောင်းနှစ်လောင်းကို တစ်ပတ်ကျော်ကြား ယမန်နေ့ (စက်တင်ဘာလ ၁၈ )ရက်တွင် ရွာသားများစုပေါင်းပြီး တူးဖော်သယ်ထုတ်နိုင်ခဲ့ကြောင်း ဗန်းစောက်ကျေးရွာ အမျိုးသားတစ်ဦးက သျှမ်းသံတော်ဆင့်ကို ပြောသည်။
“သူတို့အိပ်ပျော်နေတဲ့အချိန်မှာ တောင်ပြိုပြီး မြေတွေကအိမ်အောက်ကိုဝင်လာ မြေပြိသွားတာ။ သူတို့အိမ်က တောင်ခြေမှာရှိတာ” ဟု ၎င်းကပြောသည်။
သေဆုံးသူမှာ အဖွားဖြစ်သူ ဒေါ်မြနှင့် မြေးမလေးဖြစ်သူ နန်းသက်နွယ်ဦး ဖြစ်ကြသည်။
အလားတူ ဗန်းစောက်ကျေးရွာအတွင်းတွင် တောင်ပြိုမှုကြောင့် နုန်းမြေနှင့်အတူပါသွားသော အမျိုးသမီး ၁ ဦးနှင့် အမျိုးသား ၂ ဦးတို့၏ အလောင်းကိုလည်း ယခုအချိန်ထိ ရှာမတွေ့သေးကြောင်း ဒေသခံများက သျှမ်းသံတော်ဆင့်ကိုပြောသည်။
ပျောက်ဆုံးသူများမှာ သျင်းမွိုးဆန်း၊ သျင်းဖါပျာ့နှင့် ခွန်ထွန်းဖေတို့ဖြစ်ကြပြီး ၎င်းတို့၏ အလောင်းများကို ရှာမတွေ့သေးသောကြောင့် မိသားစုဆွေးမျိုးတို့က ကုသိုလ်ပြုပြီး လှူဒါန်းပေးခဲ့သည်ဟု သိရသည်။
ထို့အပြင် ရေကြီးရေလျှံ၊ မြေပြို၊ တောင်ပြိုမှုများကြောင့် ဗန်စောက်ရွာမှ နေအိမ်စုစုပေါင်း ၄၀ ခန့် ပျက်စီးသွားကြောင်း သိရသည်။
စက်တင်ဘာလ ၁၀ ရက်မှစ၍ မိုးအဆက်မပြတ်ရွာသွန်းမှုကြောင့် တောင်ကြီးခရိုင်အတွင်းရှိ မြို့နယ်နှင့် ကျေးရွာအပါအဝင် လွိုင်လင်မြို့နယ်နှင့် မောက်မယ်မြို့နယ်တွင် ရေကြီးခြင်း၊ တောင်ပြိုခြင်းနှင့် မြေပြိုခြင်းများ ရုတ်တရက် ဖြစ်ပေါ်ခဲ့သောကြောင့် လူ ၁၄၀ ဦး သေဆုံးခဲ့သည်ဟု ပအိုဝ်းလူငယ်အစည်းအရုံး PYO က ထုတ်ပြန်ထားသည်။
Leave a Comments