ထိုင်း-မြန်မာနယ်စပ် တာချီလိတ်မြို့တွင် ရေကြီး၊ ရေလျှံဖြစ်ပွားမှုကြောင့် သေဆုံးသူ ၁၃ ဦးထက်မနည်းရှိလာပြီး ရေဘေးရှောင်နေစဉ် နေအိမ်ဖောက်ထွင်း ခိုးခံမှုများရှိကြောင်း စုံစမ်းသိရသည်။

ယခုလ စက်တင်ဘာလ (၁၁ ရက်)မှ ယနေ့(စက်တင်ဘာ ၁၉)ရက် ကောက်ယူရရှိထားသည့် စာရင်းတွေဖြစ်ပြီး ရေကြီး၊ မြေပြိုမှုကြောင့် သေဆုံးသူ ၁၃ ဦးထက်မနည်းရှိကြောင်း ရေဘေးကူညီသူတစ်ဦးက သျှမ်းသံတော်ဆင့်ကို ပြောသည်။

“ ဒီနေ့အထိ သေဆုံးသူ ၁၃ ဦးထက်မနည်းတော့တွေ့ရှိထားတယ်။ ဆက်လက်ရှာဖွေပြုလုပ်နေတော့ စာရင်းအသိအကျ မသိရသေးပါဘူး။ တချို့နေရာတွေက မိသားစုလိုက်ပျောက်နေတာလည်းရှိတယ် တောင်ပြိုတဲ့နေရာတွေ” ဟု ၎င်းကပြောသည်။

ထိုရေကြီးရေလျှံမှုကြောင့် ဘေးလွှတ်ရာသို့ တိမ်းရှောင်နေစဥ် အချို့ရပ်ကွက်ရှိ နေအိမ်များ၊ ဆိုင်များ ဖောက်ထွင်းခိုးခံရပြီး၊ တန်ဖိုးကြီးသည့် ပစ္စည်းများကိုသာ အဓိက ခိုးယူသွားကြောင်း၊ ထို့အပြင် ဆိုင်ကယ်များကိုပါ ခိုးသွားက
ကြောင်း နေအိမ်ဖောက်ထွင်းခံရသည့် အမျိုးသမီး တစ်ဉီးက သျှမ်းသံတော်ဆင့်ကိုပြောသည်။

“ ကျမတို့ အိမ်က ဆိုင်ကယ်လည်းခိုးခံရတယ်။ လူမရှိတဲ့အိမ်တွေဆိုရင် ဖောက်ပြီးဝင် တန်ဖိုးရှိပစ္စည်းတွေ ယူသွားတာ။ သူခိုးတွေက အုပ်စုလိုက်ဖွဲ့ထားတာထင်တယ်။ သူများတွေ ဒုက္ခရောက်ချိန်မှာ ဒီလိုအခွင့်ကောင်းသမားတွေက တမျိုး” ဟု ၎င်းအမျိုးသမီး ကဆိုသည်။

သျှမ်းပြည်တစ်ဝိုက်တွင် သစ်ထုတ်လုပ်မှု၊ ရွှေတူးဖော်ရေးလုပ်ငန်း၊ ကျောက်မီးသွေးတူဖော်ရေး လုပ်ငန်းများကို လုပ်ကိုင်တူးဖော်မှုကြောင့် ရေစုတ်ယူသည့် သစ်ပင်များကို အဓိကထားပြီး ခုတ်ယူသည့်အတွက် ယခုကဲ့သို့ ရေစီးဆင်းမှုနှုန်းများပိုမို လျင်မြန်လာစေကြောင်း ရှမ်းပြည် သဘာဝပတ်ဝန်းကျင် ထိန်းသိမ်းရေး လုပ်ဆောင်သူ စိုင်းခေးဆိုင် က သျှမ်းသံတော်ဆင့်ကိုပြောသည်။

၂၀၂၁ ခုနှစ်မှစပြီး စစ်တပ်အာဏာသိမ်းပြီးနောက်ပိုင်း မြန်မာနိုင်ငံမှာ နောက်ဆက်တွဲ လက်နက်ကိုင် ပဋိက္ခများကြောင့် နိုင်ငံအနှံ့ လူပေါင်းသိန်းနှင့်ချီ နေရပ်စွန့်ခွာနေရစဥ် ရာဂီတိုင်ဖွန်း မုန်တိုင်းဒဏ်နှင့် ထပ်မံရင်ဆိုင်ရနေခြင်း ဖြစ်သည်။

အလုပ်သင် သတင်းထောက် နန်းဆိုင်ခမ်း ရေးသားသည်။