သျှမ်း-မန္တလေးနယ်စပ် နောင်ချိုနှင့် ပြင်ဦးလွင်မြို့အကြား တောလမ်းတွင် မိုးရွာသွန်းမှုကြောင့် ကားရာနှင့်ချီ ပိတ်မိနေကြောင်း စုံစမ်းသိရသည်။
စက်တင်ဘာလ ဒုတိယပတ်မှ စတင်ပြီး နောင်ချိုမြို့နယ် အုမ္မသီးကျေးရွာ လမ်းခွဲမှ စတင်၍ ပြည်ထောင်စုလမ်းမကြီးကို အသုံးပြု၍ မရတော့ခြင်းကြောင့် ပြင်ဦးလွင်မြို့သို့ သွားရောက်ရာတွင် တောလမ်းမှတဆင့် သွားလာနေရပြီး မိုးရွာသွန်းမှုကြော်င့ ကားအစီးရေ (၅၀၀) ကျော် ပိတ်မိနေကြောင်း နောင်ချိုဒေသခံများက ပြောသည်။
“နောင်ချို အုမ္မသီးလမ်းခွဲကနေ ပန်ခံ၊ သပြေဝန်းဘက် သွားပြီးတော့ လွန်းကျော်ကနေ ထွက်လာပြီး ပြင်ဦးလွင် ဆက်သွားတာ။ ဗွက်နဲ့ဆိုတော့ ပြောင်းသယ်တဲ့ ၁၂ ဘီးကားတွေလည်း နစ်တယ်၊ လိုင်းကားကော ကားကြီးကားသေး ပေါင်းစုံပဲ။ အဲ့မှာ ကားအစီးပေါင်း ၅၀၀ ကျော် ပိတ်နေတာ။ ကားခံရင် ပိုက်ဆံရှိလည်း ဘာမှဝယ်စားလို့ မရဘူး”ဟု နောင်ချိုမြို့မှ ယာဉ်မောင်းအမျိုးသားတစ်ဦးက သျှမ်းသံတော်ဆင့်ကို ပြောသည်။
နောင်ချိုမြို့နယ် အုမ္မသီးကျေးရွာ လမ်းခွဲမှ ပန်ခံ၊ သပြေဝန်းမှတဆင့် လွန်းကျော်အကြား လမ်းမှာ အမာခံလမ်း မဟုတ်ဘဲ နွေရာသီ ကြံသယ်သည့် သဲခင်းလမ်းဖြစ်ကာ မိုးရွာသွန်းမှုကြောင့် ဗွက်ထပြီး ကားကြီး၊ ကားသေးများ လမ်းကျွံချိန် ပြန်မထွက်နိုင်ဘဲ အစီးရေ ရာနှင့်ချီ ပိတ်မိနေကြောင်း ဆိုသည်။
ထို့အပြင် စက်တင်ဘာလ (၁၂) ရက်မှ စပြီး နောင်ချိုမြို့နယ်သို့ စစ်ကောင်စီတပ်မှ လေကြောင်းဖြင့် နေ့စဉ်နီးပါး လေကြောင်းဗုံးကြဲ တိုက်ခိုက်လျက်ရှိရာ အုမ္မသီးကျေးရွာတွင် ပြည်သူနေအိမ် (၅) လုံးထက်မနည်း မီးလောင်ပျက်စီးခဲ့ပြီး (၂၀) လုံးထက်မနည်း ထပ်မံပျက်စီးဆုံးရှုံးခဲ့ကြောင်း သိရသည်။
အလားတူ နောင်ချိုမြို့ပေါ် ဘူတာရပ်၊ ရဲစခန်း၊ တိုးဂိတ်နှင့် ကံကြီး-တောင်းခမ်းဘက် သွားသည့် မြို့အထွက်ဘက်လည်း လေကြောင်းဗုံးကြဲခံရခြင်းကြောင့် နေအိမ်အများအပြား ပျက်စီးကြောင်း နောင်ချိုဒေသခံများက ပြောသည်။
“တောင်ခမ်း၊ သရက်ကုန်း၊ သရက်ချို၊ မကျီးရေဘက်မှာတော့ တိုက်နေတာ မပြီးသေးဘူးထင်တယ်။ လက်နက်ကြီးသံတော့ နေ့နေ့ညည ကြားနေရတယ်။ လေယာဉ်ကတော့ နေ့တိုင်းလာတယ်၊ မနက်မိုးလင်းတာနဲ့ လာဝဲနေပြီ။ မြို့ထဲဘက်တော့ အဆက်အသွယ် ပြတ်နေတယ်”ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် စက်တင်ဘာလ (၁၃) ရက်တွင် နောင်ချိုမြို့နယ် ပင်တီးအုပ်စု ပန်စုံကျေးရွာသို့ စစ်ကောင်စီတပ်မှ လေကြောင်းဖြင့် ဗုံးနှစ်လုံး ကြဲချတိုက်ခိုက်မှုကြောင့် အမျိုးသမီး မြေးအဖွား (၂) ဦး သေဆုံးပြီး အမျိုးသားတစ်ဦး ဒဏ်ရာရရှိခဲ့သည်ဟု ဒေသခံများထံမှ သိရသည်။
စက်တင်ဘာလ (၁၄) ရက်နေ့ကလည်း နောင်ချိုမြို့ တောင်ရပ်ကွက်နှင့် ရွှေမုဋ္ဌောဘုရားဘက်တွင် ပေါင် (၅၀၀) ဗုံး သုံးလုံးကြဲချ တိုက်ခိုက်ခဲ့ရာ ဒေသခံနေအိမ် (၅) လုံး ထိခိုက်ပျက်စီးသွားကြောင်း TNLA သတင်းနှင့် ပြန်ကြားရေးဌာနမှ စက်တင်ဘာလ (၁၅) ရက်တွင် သတင်းထုတ်ပြန်ထားသည်။
Leave a Comments