သျှမ်းပြည်နယ်တောင်ပိုင်း၊ ညောင်ရွှေမြို့နယ် အင်းလေးဒေသတွင် ရေကြီးမှုကြောင့် သောက်ရေသန့်ပြတ်လပ်နေကြောင်း သတင်းရရှိသည်။

ပြီးခဲ့သည့် စက်တင်ဘာလ ၁၁ ရက်မှစပြီး အင်းလေးဒေသဘက်တွင် စံချိန်တင် ရေမြင့်တက်လာပြီး ကျေးရွာအများပြား ရေနစ်မြုပ်ကာ ဒေသခံပြည်သူအများပြား ရေဘေးသင့်နေကြသည်။

ထိုသို့ ရေကြီးရေလျှံမှုကြောင့် သောက်သုံးရေများပြတ်လပ်ကာ မိုးရေခံပြီး သောက်ရေအတွက် ဖြေရှင်းနေကြရကြောင်း ဒေသခံ အမျိုးသမီး တစ်ဉီးက ပြောသည်။​။

“ ရေလည်းသောက်စရာမရှိဘူး။ မိုးရွာရင်တော့ မိုးရေခံသောက်လို့ရတယ်။ မိုးမရွာရင်တော့ ရေနှောက်တွေကိုပဲ ကြိတ်မှိတ်သောက်ရတာပေါ့။ မသေရုံတမယ်ပဲ။ အလှူရှင်တွေလည်း မရောက်လာဘူး။”ဟု ၎င်းက ပြောသည်။

အင်းလေးဒေသ ကျေးရွာအများစုတွင် အလှူရှင်မရောက်သည့် နေရာများ ရှိနေပြီး အချို့အလှူရှင်များမှာ ကမ်းစပ်နှင့် သွားရလာရ အဆင်ပြေသည့် နေရာများတွင်သာ လာရောက်လှူဒါန်းခဲ့ကြသဖြင့် သွားရလာရခက်ခဲပြီး ကျေးရွာများ အငတ်ဘေးကြုံနေရကြောင်းသိရသည်။

တုံလည်ကျေးရွာအုပ်စု တောင်ပို့ကြီးရွာဘက်တွင်လည်း အိမ်ခြေ ၇၃ စုရှိပြီး အလှူရှင်မရောက်သဖြင့် စားနပ်ရိက္ခာ၊ဆေးဝါး နှင့် အဝတ်ထည်၊ အိုးခွက်များပါလိုအပ်နေကြောင်း သိရသည်။

“ အိမ်က အပေါ်ထပ်တော့နေလို့ရတယ်။ မြုပ်သွားတဲ့အိမ်တွေက သူတွေနဲ့ စုနေကြတာ။ ဘယ်မှ သွားမရလာမရနဲ့။ အလှူရှင်တွေလည်း ဒီဖက်မရောက်ဘူး။ သူတို့ ကိုယ်တိုင်လာလှူရင်တော့ ကောင်းတာပေါ့။ မဟုတ်ရင် လာလှူတာတွေ ငါတို့ဆီရောက်မှာမဟုတ်ဘူး။” ဟု တုံလည်ရွာ ဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။

လက်ရှိအင်းလေးတွင်ရေတစ်လက်မခန့် ကျနေပြီး စပါးနှင့် ခရမ်းချဉ်စိုက်ခင်း အများအပြား ရေနစ်မြှုပ်ကုန်သဖြင့် စားဝတ်နေရေးအတွက် ပို၍စိုးရိမ်လာကြသည်။

တဖက်တွင်လည်း စစ်ကောင်စီ ၏ ထိုးစစ်ဆင်မှုများကြောင့် ကရင်နီပြည်မှ အင်းလေးဒေသသို့ စစ်ဘေးရှောင်နေရသည့် ပြည်သူများသည် လက်ရှိမှာ ရေကြီးမှုကြောင့် နှစ်ထပ်ကွမ်း အခက်အခဲကြုံတွေ့နေရပြီး အချိုနေရာတွင် တောင်ကျချောင်းကြောင့် သေဆုံးမှုများရှိနေသည်။

အလုပ်သင် သတင်းထောက် နန်းလရောင် ရေးသားသည်။